ខេត្តកំពង់ឆ្នាំង ប្រារព្ធទិវាពិភពលោកប្រយុទ្ធនិងជំងឺអេដស៍១ធ្នូ ឆ្នាំ២០១៩
05-December-2019 | ដោយ ពលមនសិការ
កំពង់ឆ្នាំង៖ នាព្រឹកថ្ងៃទី៥ ខែធ្នូ ឆ្នាំ២០១៩ នៅសាលា ស្រុកសាមគ្គីមានជ័យ មានប្រារព្ធទិវាពិភពលោកប្រយុទ្ធនិងជំអឺអេដស៍ថ្ងៃទី០១ ធ្នូក្រោមអធិបតីភាព ឯកឧត្តម អម សុភា ប្រធានគណៈកម្មា
ធិការសាខាកាកបាទក្រហមកម្ពុជាខេត្តនិងជាអភិបាលរង ខេត្តកំពង់ឆ្នាំង ដោយមានការចូលរួមពីប្រធានអង្គភាពជុំវិញខេត្ត លោកគ្រូអ្នកគ្រូ យុវជនកាកបាទក្រហមយុវជនកាយរិទ្ធ ប្រជាពលរដ្ឋ មន្ត្រីអង្គការក្រៅរដ្ឋាភិបាលចូលរួមសរុបចំនួន៤២២នាក់ នៅក្នុងនោះ កុមារនិងអ្នកកើតជំងឺអេដស៍ចូលរួមចំនួន៥០នាក់ផងដែរ។
លោកវេជ្ជបណ្ឌិត លឹម លៀងងួន អនុប្រធានលេខាធិការដ្ឋានប្រយុទ្ធនិងជំងឺអេដស៍ខេត្ត បានអានរបាយការណ៍ លទ្ធផលរយៈពេល៩ខែ ឆ្នាំ២០១៩នេះ អ្នកមកធ្វើតេស្តឈាមរកមេរោគអេដស៍នៅក្នុងមណ្ឌលសុខភាព៤២មណ្ឌល និង មន្ទីរពេទ្យខេត្តមានចំនួន៥,៥៩០នាក់ ក្នុងនោះបានរកឃើញលទ្ធផលវិជ្ជមានចំនួន៣៩នាក់ ស្មើនិង០.៦៩ភាគរយ នៃអ្នកធ្វើតេស្តឈាម។
មន្ទីរពេទ្យបង្អែកខេត្ត ផ្តល់ថ្នាំព្យាបាលជំងឺឱកាសនិយម និងថ្នាំប្រឆាំងមេរោគអេដស៍បានចំនួន៨៨៣នាក់ ក្នុងនោះមានកុមារ៦០នាក់ បានពិនិត្យស្ត្រីមានផ្ទៃពោះចំនួន១០,៨៧២នាក់ និងស្ត្រីស្ម័ក្រចិត្តធ្វើតេស្តឈាមរកមេរោគអេដស៍ចំនួន១០,៨២៣ នាក់ ក្នុងនោះលទ្ធផលជាវិជ្ជមាន មានចំនួន៣នាក់។
ឯកឧត្តម អម សុភា បានអានសាខាលិខិតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជានិងជាឥស្សរជនឆ្នើមថ្នាក់ជាតិនៃវេទិកាភាពជាអ្នកដឹកនាំតំបន់អាស៊ីប៉ាស៊ីហ្វិចឆ្លើយតបមេរោគអេដស៍ជំងឺអេដស៍និងអភិវឌ្ឍន៍នៅកម្ពុជាក្នុងឱកាសទិវាពិភពលោកប្រយុទ្ធនឹងជំងឺអេជស៍១ធ្នូឆ្នាំ២០១៩ក្រោមប្រធានបទ(ទាំងអស់គ្នារួមចរន្តជាតិតែមួយក្នុងការទប់ស្កាត់ការរីករាលដាលនៃមេរោគអេដស៍និងជំងឺអេដស៍)។
ឯកឧត្តម អម សុភា បានផ្តាំផ្ញើដល់សមាជិកក្នុងអង្គពិធីថាៈចំពោះយុវជនត្រូវតមនិងការរួមភេទ,មិនត្រូវភ្លើតភ្លើនការសប្បាយផ្លូវភេទ, មិនត្រូវភ្លើតភ្លើននឹងគ្រឿងញៀនឡើយ ចំណែកមនុស្សពេញវ័យ ត្រូវស្មោះប្តី១ ប្រពន្ធ១, មិនត្រូវមានដៃគូស្នេហាច្រើន, មិនត្រូវទិញសេវាផ្លូវភេទត្រូវប្រើស្រោមអនាម័យជានិច្ច និងត្រឹមត្រូវបើមានដៃគូស្នេហាក្រៅពីប្រពន្ធរបស់ខ្លួន, បើត្រូវការរួមភេទជាមួយដៃគូរផ្សេងក្រៅពីប្តីប្រពន្ធ ត្រូវតែប្រើសស្រោមអនាម័យ, កុំនិយមប្រើថ្នាំចាក់ និងស្រី្តគ្រប់រូបត្រូវយល់ដឹងអំពីជំងឺអេដស៍។
នៅក្នុងពិធីនេះដែរ គណៈអធិបតីភ្ញៀវចូលរួម និងសាខាកាកបាទក្រហមខេត្តកំពង់ឆ្នាំង បានចែកអំណោយជូនដល់កុមារ និងស្ត្រីកើតជំងឺអេដស៍នៅក្នុងក្រុងកំពងឆ្នាំងចំនួន៥០នាក់ ដែលម្នាក់ៗទទួលបានអង្គរ៣០គីឡូ មី១កេស ត្រីខ១យួរ ឃីត១កញ្ចប់ អាវយឺត១ទឹកត្រី១យួរ និងថវិកា៦០.០០០រៀល ជាអំណោយរបស់គណៈកម្មាធិការប្រយុទ្ធនឹងជំងឺអេដស៍ខេត្តកំពង់ឆ្នាំង៕
ចំនួនអ្នកទស្សនា
- ថ្ងៃនេះ441
- ម្សិលមិញ20231
- សប្តាហ៍នេះ79521
- ខែនេះ101401
- ឆ្នាំនេះ101401
- សរុប20543857