សម្ដេចក្រឡាហោម ស ខេង អញ្ជើញជាអធិបតី ទិវាជាតិប្រយុទ្ធប្រឆាំងការជួញដូរមនុស្ស១២ធ្នូ លើកទី១៣
12-December-2019 | ដោយ ពលមនសិការ
ភ្នំពេញ៖ នៅរសៀលថ្ងៃព្រហស្បតិ៍ ១រោច ខែមិគសិរ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃ១២ ខែធ្នូ ឆ្នាំ២០១៩នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស តំណាងដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានអញ្ជើញជាអធិបតី ទិវាជាតិប្រយុទ្ធប្រឆាំងការជួញដូរមនុស្ស១២ធ្នូ លើកទី១៣ ប្រារព្ធនៅមជ្ឈមណ្ឌលពិពណ៌ និងសន្និបាទកោះពេជ្រ។
អញ្ជើញមានប្រសាសន៍នាឱកាសនោះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងកោតសរសើរ និងវាយតម្លៃខ្ពស់ចំពោះគ្រប់ភាគីពាក់ព័ន្ធទាំងអស់ដែលបានខិតខំអស់ពីម្លាំងកាយវិត្តពុះពារគ្រប់ឧបសគ្គដើម្បីបំពេញការងារទទួលបានលទ្ធផលជាច្រើននៅក្នុងការប្រយុទ្ធប្រឆាំងអំពើជួញដូរមនុស្ស។
សម្ដេចបានមានប្រសាសន៍ថានៅឆ្នាំ២០១៩នេះ គណៈកម្មាធិការជាតិប្រយុទ្ធប្រឆាំងអំពើជួញដូរ មនុស្សបានសម្រេចកិច្ចការធំៗជាច្រើន ដូចជាការប្រកាសផ្សព្សព្វផ្សាយរបាយការណ៍ជាតិប្រឆាំងការជួញដូរមនុស្សឆ្នាំ២០១៨ និងទិសដៅឆ្នាំ២០១៩ កិច្ចប្រជុំរវាងប្រទេសបញ្ជូនចំនួន៣ កម្ពុជា ឡាវ និងមីយ៉ាន់ម៉ា ដើម្បីលើកកម្ពស់សុវត្ថិភាពពលករទេសន្តប្រវេសន៍ ការរៀបចំវេទិការជាតិអន្តរសាសនាប្រឆាំងការជួញដូរមនុស្ស និងទេសភាពសម័យទំនើប។
គណៈកម្មារធិការក៏បានប្រកាសដាក់ឲ្យប្រើប្រាស់ផែនការយុទ្ធសាស្ត្រជាតិប្រយុទ្ធប្រឆាំងអំពើជួញដូរមនុស្ស និងគោលនយោបាយវិធានការនានាដើម្បីលើកកម្ពស់ការយល់ដឹងរបស់ពលករក្រៅប្រទេសគោលដៅ នៅប្រទេសគោលដៅ និងនៅក្នុងស្រុក ចុះហត្ថលេខាលើអនុស្សារណៈ កិច្ចព្រមព្រៀងសហប្រតិបត្តិការជាមួយបណ្ដាអង្គការដៃគូជាតិ និងអន្តរជាតិ ក្នុងការប្រឆាំងការជួញដូរមនុស្ស ការលើកកម្ពស់សុវត្ថិភាពពលករពេលត្រឡប់មកមាតុភូមិវិញ។
សម្ដេចបានបន្តថានៅឆ្នាំ២០១៩នេះដែរ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ក៏បានការចុះហត្ថលេខាលើនីតិវិធីបទដ្ឋានអំពីដំណើការគ្រប់គ្រងករណីនៃការធ្វើការមាតុភូមិនិវត្តន៍ និងការធ្វើសមាហរន្តកម្មជនរងគ្រោះដោយអំពើជួញដូរមនុស្សជាមួយប្រទេសថៃ និងវៀតណាម ការរៀបចំសាងសង់មជ្ឈមណ្ឌលផ្ដល់សេវាដល់ជនរងគ្រោះដោយអំពើជួញដូរមនុស្ស និងបានប្រារព្ធទិវាជាតិប្រឆាំងការជួញដូរមនុស្ស១២ធ្នូនាឱកាសនេះ។
ដើម្បីភាពរីកចំរើន និងបំពេញសេចក្ដីត្រូវការជូនប្រជាពលរដ្ឋ រាជរដ្ឋាភិបាលបានយកចិត្តទុកដាក់សហការជាមួយវិស័យឯកជន បង្កើតឱកាសការងារក្នុងស្រុកសម្រាប់ពលកររាប់លាននាក់ ខណៈការធ្វើចំណាកស្រុកស្វែងរកការងារធ្វើនៅក្រៅប្រទេសក៏រាជរដ្ឋាភិបាលនៅតែផ្ដល់ជូនជាជម្រើសសម្រាប់ប្រជាពលរដ្ឋដោយបានរៀបចំពង្រឹងរបៀបរបនៃការគ្រប់គ្រង បង្កើនសមត្ថភាពបច្ចេកទេសពលករដែលធានាបាននូវការទទួលបានប្រាក់ចំណូលខ្ពស់ និងបង្កើនកិច្ចការពារឲ្យបានប្រសើរជាងមុន។
ក្នុងគោលដៅប្រយុទ្ធប្រឆាំងអំពើជួញដូរមនុស្ស សម្ដេចឧបនាយករដ្ឋមន្ត្រីបានគូសបញ្ជាក់ថារាជរដ្ឋាភិបាលបានខិតខំប្រឹងប្រែងអប់រំផ្សព្វផ្សាយជូនសិស្សនិស្សិតប្រជាពលរដ្ឋឲ្យបានយល់ដឹងអំពីកល្បិចរបស់ជនជនល្មើស និងផលប៉ះពាល់នៃការធ្វើទេសន្តប្រវេសន៍ដោយប្រថុយប្រថានដែលអាចកើតមានគ្រោះថ្នាក់ជាយថាហេតុ ក្នុងនោះក្រសួងពាក់ព័ន្ធរួមជាមួយអាជ្ញាធរសមត្ថកិច្ចគ្រប់លំដាប់ថ្នាក់ និងប្រព័ន្ធផ្សព្វផ្សាយព័ត៌មាន បានដើរតួនាទីយ៉ាងសំខាន់ក្នុងការជំរុញការផ្សព្វផ្សាយនេះ។
សម្ដេចបានសង្កត់ធ្ងន់ថាជនរងគ្រោះនៃអំពើជួញដូរមនុស្សភាគច្រើនគឺជាពលករទេសន្តប្រវេសន៍ ដែលរៀងរាល់ឆ្នាំមានជនរងគ្រោះរាប់សែនលាននាក់ត្រូវបានបំផ្លាញដោយក្រុមឧក្រឹដ្ឋជននៃអំពើជួញដូរមនុស្ស ដោយជនល្មើសបានរងគ្រប់ល្បិចស្មោគគ្រោក បង្កើតបណ្ដាញធ្វើសកម្មភាពកេងប្រវ័ញជនរងគ្រោះគ្រប់ដំណាក់កាល ទាំងដោយផ្ទាល់ និងដោយប្រយោលតាមរយៈបណ្ដាញទំនាក់ទំនងអនឡាញ ឬតាមបច្ចេកវិទ្យាទំនើបដែលកំពុងប្រើប្រាស់ពេញនិយមទាំងទីក្រុង និងជនបទ។
សម្ដេចបានបន្តថាទំនោនៃការប្រើប្រាស់បច្ចេកវិទ្យាអ៊ីនធើណិត និងទូរស័ព្ទនើបនេះបានធ្វើឲ្យឧក្រឹដ្ឋជនប្រើប្រាស់បច្ចេកវិទ្យានេះ ដើម្បីទាក់ទាញជនរងគ្រោះឲ្យចូលក្នុងអន្ទាក់របស់ខ្លួន និងគេចវេសពីសមត្ថកិច្ច ដែលបច្ចុប្បន្ននេះ ប្រព័ន្ធអនឡាញ និងបណ្ដាញផ្សព្វផ្សាយសង្គមបានបង្កើតជាបញ្ហាថ្មី គឺការជួញដូរមនុស្ស និងការរំលោភបំពាណផ្លូវភេទ ជាពិសេសលើអនីតិជនតែម្ដង។
ក្នុងនាមរាជរដ្ឋាភិបាល សម្ដេចបានបន្តប្រកាសពីការប្ដេជ្ញាចិត្តប្រយុទ្ធប្រឆាំងអំពើជួញដូរមនុស្ស ដើម្បីការពារសុវត្ថិភាពមនុស្សគ្រប់រូប និងសន្តិសង្គម ក៏ដូចជាលើកកម្ពស់ការគោរពសិទ្ធិ សេចក្ដីថ្លៃថ្នូ និងផលប្រយោជន៍របស់មនុស្សគ្រប់ភេទ គ្រប់វ័យ ដែលអាចត្រូវបានបំផ្លាញដោយអំពើជួញដូរមនុស្ស ដោយការកេងប្រវ័ញ និងការរំលោភបំពានគ្រប់រូបភាពដោយបានលទ្ធផលល្អប្រសើរជាអតិបរមា។
សម្ដេចបានណែនាំឲ្យថ្នាក់ដឹកនាំ មន្ត្រី និងភាគីពាក់ព័ន្ធនៃគណៈកម្មាធិការប្រយុទ្ធប្រឆាំងអំពើជួញដូរមនុស្ស ត្រូវបន្តធ្វើឲ្យកាន់សកម្ម អនុវត្តវិធានការច្បាប់ឲ្យបានកាន់តែម៉ឺងម៉ាត់ និងជំរុញការនុវត្តផែនការយុទ្ធសាស្ត្រជាតិប្រឆាំងការជួញដូរមនុស្ស សម្រាប់ឆ្នាំ២០១៩-២០២៣ ឲ្យបានសម្រេចតាមគោលដៅដែឡបានគ្រោងទុក ហើយថាការងារនេះត្រូវការការចូលរួម និងកិច្ចសហការពីដៃគូក្នុងប្រទេស និងតំបន់។
ទន្ទឹមនឹងនេះសម្ដេចក៏បានអំពាវនាវឲ្យមន្ត្រីអនុវត្តច្បាប់ និងដៃគូអន្តរជាតិពាក់ព័ន្ធនឹងការបញ្ជូន និងទទួលពលករ ត្រូវយកចិត្តទុកដាក់ត្រួតពីនិត្យឯកសារបញ្ជាក់ភាពស្របច្បាប់ ដើម្បីបញ្ចៀសការប្រើប្រាស់ឯកសារក្លែងក្លាយ ឬក្លែងបន្លំឈ្មោះ ធ្វើឲ្យពួកគេបាត់អត្តសញ្ញាណ និងពិបាកទទួលបានការការពារតាមច្បាប់ ហើយជាមួយគ្នានេះក៏ត្រូវគិតគូដល់ការរៀបចំឯកសារបញ្ជាក់អត្តសញ្ញាណសម្រាប់កុមារដែលបានកើតនៅប្រទេសដែលឪពុកម្ដាយកំពុងធ្វើការ ដើម្បីងាយស្រួលសម្រាប់ការប្រើប្រាស់នៅពេលវិលមកប្រទេសកំណើត។
សម្ដេចក៏បានទាញចំណាប់អារម្មណ៍អំពីការរណីជាក់ស្ដែងមួយចំនួននៃអំពើជួញដូរមនុស្ស ដូចជាការរៀបអាពាហ៍ពិពាហ៍ផ្ទុយពីឆន្ទៈ ការជួញដូរទារក ការស្វែងរកការងារដោយគេចវេសពីគោលការច្បាប់ជាដើម និងបានអំពាវនាវឲ្យក្រុមហ៊ុនរោងចក្រសហគ្រាស ដែលមានកម្មករកម្មការរនីបំពេញការងារ ពង្រឹងការតាមដានគ្រប់គ្រង និងសហការជាមួយសមត្ថកច្ចពាក់ព័ន្ធ ដើម្បីមានវិធានការបង្កា និងបង្ក្រាបឲ្យបានទាន់ពេលវេលាលើជនខិលខូចដែលបង្កការលំបាក ធ្វើអាជីវកម្ម កេងប្រវ័ញលើកម្មការ និងពលករនៅក្រៅប្រទេសយ៉ាងអមនុស្សធម៌ រហូតក្លាយជាទាសភាពសម័យទំនើបគួរឲ្យស្អប់ខ្ពើម។
សម្ដេចក៏បានអំពាវនាវដល់ភាគីប្រទេសជាមិត្តទាំងអស់ចូលរួមសហការជ្រោមជ្រែងសកម្មភាពប្រយុទ្ធប្រឆាំងអំពើជួញដូរមនុស្សនេះឲ្យកាន់តែខ្លាំងក្លាថែមទៀត និងសូមអំពាវនាវលើកទឹកចិត្តដល់គ្រប់ក្រសួងស្ថាប័នមន្ទីរអង្គភាព ទាំងថ្នាក់ជាតិ និងក្រោមជាតិ សូមពង្រឹងការអនុវត្តសកម្មភាពតាមយុទ្ធសាស្ត្រដែឡមានចែងក្នុងផែនការជាតិឲ្យបានកាន់តែសកម្មថែមទៀត។
មុននឹងបញ្ចប់ សម្ដេចក្រឡាហោម ស ខេង បានណែនាំគណៈកម្មការប្រយុទ្ធប្រឆាំងអំពើជួញដូរមនុស្សរាជធានី-ខេត្ត ត្រូវបន្តរៀបចំយុទ្ធនាការនៃទិវាប្រយុទ្ធប្រឆាំងការជួញដូរមនុស្ស១២ធ្នូនេះ នៅតាមមូលដ្ឋានរបស់ខ្លួនឲ្យបានផុលផុស ដើម្បីជាមធ្យោបាយផ្សព្វផ្សាយការយល់ដឹងមន្ត្រី អាជ្ញាធរ សមត្ថកិច្ច វិស័យឯកជន សង្គមស៊ីវិល សាសនា និងជាពិសេសប្រជាពលរដ្ឋ ឲ្យរួមសហការគ្នាបង្ការ បង្ក្រាប ផ្ដន្ទាទោស សង្គ្រោះ ការពារ ដើម្បីកម្ពុជាគ្មានអំពើជួញដូរមនុស្ស៕
ចំនួនអ្នកទស្សនា
- ថ្ងៃនេះ17241
- ម្សិលមិញ15681
- សប្តាហ៍នេះ76081
- ខែនេះ97961
- ឆ្នាំនេះ97961
- សរុប20540417