ឯកឧត្តម អាមយ៉ាត អាលី ស្ស៊ា៖ បន្តជួយជំរុញលើកកម្ពស់ទំនាក់ទំនង កិច្ចសហប្រតិបត្តិការខាងនយោបាយ សេដ្ឋកិច្ច និងពាណិជ្ជកម្ម រវាងប្រទេសទាំងពីរឱ្យកាន់តែខ្លាំងខ្លាថែមទៀត
13-December-2019 | ដោយ ពលមនសិការ
ភ្នំពេញ៖ ឯកឧត្តម អាមយ៉ាត អាលី ស្ស៊ា (Amjad Ali sher) ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋអ៊ីស្លាមប៉ាគីស្ថាន ប្រចាំព្រះរាជាណាចក្រកម្ពុជា បានលើកឡើងទោះបីឯកឧត្តមបញ្ចប់បេសកកម្មការទូតនៅព្រះរាជាណាចក្រកម្ពុជាក៏ដោយ ក៏ឯកឧត្តមនៅតែខិតខំបន្តជួយជំរុញលើកកម្ពស់ទំនាក់ទំនង កិច្ចសហប្រតិបត្តិការខាងនយោបាយ សេដ្ឋកិច្ច និងពាណិជ្ជកម្ម រវាងប្រទេសទាំងពីរឱ្យកាន់តែខ្លាំងខ្លាថែមទៀត។ ក្នុងនោះ សាធារណរដ្ឋអ៊ីស្លាមប៉ាគីស្ថាន គឺជាមិត្តរបស់ព្រះរាជាណាចក្រកម្ពុជា ហើយឯកឧត្តមសង្ឃឹថា ទំនាក់ទំនង មិត្តភាព សាមគ្គីភាព និងកិច្ចសហប្រតិបត្តិការរវាងប្រទេសទាំងពីរ នឹងត្រូវបានពង្រឹងពង្រីក និងពូនជ្រុំបន្ថែមទៀត។
ការលើកឡើងរបស់ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋអ៊ីស្លាមប៉ាគីស្ថាន ប្រចាំព្រះរាជាណាចក្រកម្ពុជា បានធ្វើឡើនៅក្នុងជំនួបរវាងសម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា និងឯកឧត្តម អាមយ៉ាត អាលី ស្ស៊ា (Amjad Ali sher) ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋអ៊ីស្លាមប៉ាគីស្ថាន ប្រចាំព្រះរាជាណាចក្រកម្ពុជា នាព្រឹកថ្ងៃទី១៣ ខែធ្នូ ឆ្នាំ២០១៩ នៅវិមានព្រឹទ្ធសភា។
នៅក្នុងឱកាសនោះ ឯកឧត្តម អាមយ៉ាត អាលី ស្ស៊ា បានថ្លែងអំណរគុណយ៉ាងជ្រាលជ្រៅចំពោះសម្តេចវិបុលសេនាភក្តី សាយ ឈុំ ប្រធានព្រឹទ្ធសភា ដែលបានចំណាយពេលវេលាដ៏មានតម្លៃអនុញ្ញាតឱ្យឯកឧត្តម បានចូលជួបសម្តែងការគួរសម និងជម្រាបលានាពេលនេះ។
ឯកឧត្តមបានជម្រាបជូនសម្តេចប្រធានព្រឹទ្ធសភាថា បេសកកម្មការទូតរបស់ឯកឧត្តម នៅព្រះរាជាណាចក្រកកម្ពុជាក្នុងរយៈពេល៦ឆ្នាំកន្លះនេះ បានទទួលនូវបទពិសោធន៍ល្អៗជាច្រើន និងទទួលបានជោគជ័យ អាស្រ័យដោយមានការគាំទ្រពីព្រឹទ្ធសភា រដ្ឋសភា រាជរដ្ឋាភិបាល និងគ្រប់ក្រសួង ស្ថាប័ន នៃព្រះរាជាណាចក្រកម្ពុជា។
ឯកឧត្តមឯកអគ្គរដ្ឋទូត បានលើកឡើងអំពី ដំណើរទស្សនកិច្ចរបស់ឯកឧត្តមប្រធានព្រឹទ្ធសភានៃសាធារណរដ្ឋអ៊ីស្លាមប៉ាគីស្ថាន មកកាន់ព្រះរាជាណាចក្រកម្ពុជាចំនួន ៣លើក ជាពិសេសបានអញ្ជើញមកចូលរួមក្នុងកិច្ចប្រជុំកំពូលអាស៊ីប៉ាស៊ីហ្វិក ឆ្នាំ២០១៩-នៅកម្ពុជា ហើយក្នុងដំណើរទស្សនកិច្ច និងចូលរួមកិច្ចប្រជុំនេះ ឯកឧត្តមប្រធានព្រឹទ្ធសភានៃសាធារណរដ្ឋអ៊ីស្លាមប៉ាគីស្ថាន ក៏បានជួបជាមួយសវនាការជាមួយនឹងសម្តេចប្រធានព្រឹទ្ធសភា សម្តេចប្រធានរដ្ឋសភា និងសម្តេចនាយករដ្ឋមន្ត្រីផងដែរ។ ជាមួយគ្នានេះ ក៏មានការផ្លាស់ប្តូរដំណើរទស្សនកិច្ចរវាងព្រឹទ្ធសភាកម្ពុជា និងព្រឹទ្ធសភានៃសាធារណរដ្ឋអ៊ីស្លាមប៉ាគីស្ថានជាច្រើនលើកផងដែរ។ ហើយអគ្គលេខាធិការដ្ឋានព្រឹទ្ធសភាកម្ពុជា និងអគ្គលេខាធិការដ្ឋានព្រឹទ្ធសភាប៉ាគីស្ថាន បានចុះហត្ថលេខាលើអនុស្សារណៈយោគយល់គ្នាស្តីពី ការពង្រឹងកិច្ចសហប្រតិបត្តិការសភា។ អនុស្សារណៈយោគយល់គ្នានេះ បានរួមចំណែកបន្ថែមដល់ការរឹតចំណងមិត្តភាព និងកិច្ចសហប្រតិបត្តិការដ៏ល្អប្រពៃរវាងព្រឹទ្ធសភានៃប្រទេសទាំងពីរ។ អ្វីដែលលេចធ្លោនោះ គឺឯកឧត្តមប្រធានព្រឹទ្ធសភាប៉ាគីស្ថាន បានផ្ញើលិខិតអញ្ជើញសម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា ទៅបំពេញទស្សនកិច្ចនៅសាធារណរដ្ឋអ៊ីស្លាមប៉ាគីស្ថាននាពេលវេលាសមស្របណាមួយ។
ក្នុងនាមព្រឹទ្ធសភា រដ្ឋសភា រាជរដ្ឋាភិបាលកម្ពុជា និងខ្លួនសម្តេចផ្ទាល់ សម្តេចវិបុលសេនាភក្តី សាយ ឈុំ បានវាយតម្លៃខ្ពស់ចំពោះបេសកកម្មការទូតរបស់ឯកឧត្តម អាមយ៉ាត អាលី ស្ស៊ា នៅព្រះរាជាណាចក្រកម្ពុជា ដែលសម្រេចបាននូវលទ្ធផលគួរជាទីមោទន។ សម្តេចប្រធានព្រឹទ្ធសភា បានកត់សម្គាល់ឃើញថា ឯកឧត្តម និងស្ថានទូតប៉ាគីស្ថានប្រចាំព្រះរាជាណាចក្រកម្ពុជា មានទំនាក់ទំនង និងកិច្ចសហប្រតិបត្តិការល្អជាមួយនឹងថ្នាក់ដឹកនាំ មន្ត្រីគ្រប់លំដាប់ថ្នាក់ និងជាមួយនឹងក្រសួង ស្ថាប័ន អាជ្ញាធរ ខេត្ត ក្រុង ជាពិសេសជាមួយនឹងប្រជាជនកម្ពុជា។ ឯកឧត្តមឯកអគ្គរដ្ឋទូតបានរួមចំណែកយ៉ាងសកម្មក្នុងការពង្រឹងពង្រីកចំណងមិត្តភាព និងកិច្ចសហប្រតិបត្តិការរវាងប្រជាជន និងប្រទេសទាំងពីរ ជាពិសេសការលើកស្ទួយ និងជំរុញកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិនិយោគ និងទេសចណ៍ ដែលនាំមកនូវផលប្រយោជន៍ដ៏ធំធេងឱ្យគ្នាទៅវិញទៅមក។
សម្តេចប្រធានព្រឹទ្ធសភា បានថ្លែងអំណរគុណដល់រដ្ឋាភិបាលប៉ាគីស្ថាន ដែលបានបញ្ជូនអ្នកសង្កេតការណ៍មកចូលរួមសង្កេតការណ៍ការបោះឆ្នោតជ្រើសតាំងតំណាងរាស្ត្រនីតិកាលទី៦ នៃរដ្ឋសភា កាលពីឆ្នាំ២០១៨។ ជាមួយគ្នានេះ ឯកឧត្តមនាយករដ្ឋមន្ត្រីប៉ាគីស្ថាន ក៏បានផ្ញើរលិខិតអបអរសាទរជូនសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ចំពោះជ័យជម្នះនៃការបោះឆ្នោតជ្រើសរើសតំណាងរាស្ត្រ នីតិកាលទី៦ នៃរដ្ឋសភា។
ក្នុងនាមព្រឹទ្ធសភា សម្តេចប្រធានព្រឹទ្ធសភា បានថ្លែងអំណរគុណដ៏ជ្រាលជ្រៅចំពោះឯកឧត្តមឯកអគ្គរដ្ឋទូតដែលបានធ្វើកិច្ចសហប្រតិបត្តិការដ៏ល្អជាមួយនឹងព្រឹទ្ធសភាកម្ពុជា ជាពិសេសជំរុញឱ្យមានកិច្ចសហប្រតិបត្តិការកាន់តែជិតស្និទ្ធរវាងព្រឹទ្ធសភាកម្ពុជា និងព្រឹទ្ធសភាប៉ាគីស្ថាន។
ជាការឆ្លើយតបចំពោះការអញ្ជើញសម្តេចទៅបំពេញទស្សនកិច្ចនៅសាធារណរដ្ឋអ៊ីស្លាមប៉ាគីស្ថាន សម្តេចប្រធានព្រឹទ្ធសភា នឹងរកពេលវេលាសមស្របណាមួយ ដើម្បីទៅបំពេញទស្សនកិច្ចនៅសាធារណរដ្ឋអ៊ីស្លាមប៉ាគីស្ថាន។
ក្នុងនាមព្រឹទ្ធសភា និងក្នុងនាមសម្តេចផ្ទាល់ សម្តេចប្រធានព្រឹទ្ធសភាបានត្រៀមខ្លួនជាស្រេច ដើម្បីធ្វើកិច្ចសហប្រតិបត្តិការជាមួយនឹងឯកអគ្គរដ្ឋទូតថ្មី និងស្ថានទូតនៃសាធារណរដ្ឋអ៊ីស្លាមប៉ាគីស្ថានប្រចាំព្រះរាជាណាចក្រកម្ពុជា ដើម្បីរួមចំណែកក្នុងពង្រឹងពង្រីកទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការរវាងប្រជាជន និងប្រទេសទាំងពីរឱ្យកាន់តែរឹងមាំ និងខ្លាំងក្លាថែមទៀត។
សម្តេចប្រធានព្រឹទ្ធសភា បានប្រសិទ្ធពរជូនឯកឧត្តមឯកអគ្គរដ្ឋទូត សូមឱ្យទទួលបាននូវសុខភាពល្អ និងជោគជ័យក្នុងភារកិច្ចថ្មី៕
ចំនួនអ្នកទស្សនា
- ថ្ងៃនេះ18231
- ម្សិលមិញ15681
- សប្តាហ៍នេះ77071
- ខែនេះ98951
- ឆ្នាំនេះ98951
- សរុប20541407