អភិបាលខណ្ឌទួលគោក ដឹកនាំកម្លាំងបង្ក្រាបទីតាំង បើកលេងល្បែងស៊ីសងខុសច្បាប់
19-December-2019 | ដោយ ពលមនសិការ
ភ្នំពេញ៖ កម្លាំងនគរបាលផ្នែកព្រហ្មទណ្ឌ និងកម្លាំងនគរបាលប៉ុស្តិ៍រដ្ឋបាលបឹងសាឡាង នៃអធិការដ្ឋាននគរបាលខណ្ឌទួលគោ សហការជាមួយគណៈបញ្ជាការឯកភាពខណ្ឌទួលគោក ឃាត់ខ្លួនជនសង្ស័យ០៤នាក់ ជាក់ស្ដែងពីបទបើកលេងល្បែងស៊ីសងខុសច្បាប់ (ភ្នាល់បាល់តាមអនឡាញ)។
ប្រតិបត្តិការខាងលើធ្វើឡើងកាលពីថ្ងៃទី១៨ ខែធ្នូ ឆ្នាំ២០១៩ វេលាម៉ោងប្រហែល១៨នឹង៣០នាទី នៅចំណុចមុខផ្ទះលេខ៣៦៨ ផ្លូវ លេខ២៤៥ក្រុមទី៣៣ ភូមិ១២ សង្កាត់បឹងសាឡាង ខណ្ឌទួលគោក រាជធានីភ្នំពេញ។
គណៈបញ្ជាការឯកភពខណ្ឌទួលគោក ដឹកនាំផ្ទាល់ដោយលោក ឯក ឃុនដឿន អភិបាលខណ្ឌទួលគោក និងក្រោមកិច្ចសម្របសម្រួលពីលោក រៀល សុភិន ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ដោយមានលោក ផល សុខរចនា ជាក្រឡាបញ្ជីអមផង។
មន្ត្រីនគរបាលខណ្ឌទួលគោក បានឲ្យដឹងថាជនសង្ស័យទី១-ឈ្មោះ ង៉ឹង សារុណ ភេទប្រុស អាយុ៣០ឆ្នាំ ជនជាតិខ្មែរ មុខរបរបុគ្គលិកណេតA366 ស្នាក់នៅផ្ទះជួលផ្លូវលំ បូរីរុងរឿង សង្កាត់ចោមចៅទី១ ខណ្ឌពោធិ៍សែនជ័យ រាជធានី ភ្នំពេញ (ជាភ្នាក់ងារស៊ីសង)។ ទី២-ឈ្មោះ លី ឡាយ ភេទប្រុស អាយុ២៥ឆ្នាំ ជនជាតិខ្មែរ មុខរបរបុគ្គលិកណេត A366 ស្នាក់នៅផ្ទះជួល ផ្លូវលំ ភូមិចំរើនផល សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ (ជាភ្នាក់ងារស៊ីស៊ីសង)។ ទី៣-ឈ្មោះ ងួន ថាញ់ ភេទប្រុស អាយុ២៨ឆ្នាំ ជនជាតិខ្មែរ មុខរបរបុគ្គលិកណេតA366 ស្នាក់នៅផ្ទះលេខ១១៧ ផ្លូវជាតិលេខ៦ ភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ (ជាភ្នាក់ងារស៊ីសង)។ និងទី៤-ឈ្មោះ ងួន ចាន់ថា ភេទប្រុស អាយុ២៣ឆ្នាំ ជនជាតិខ្មែរ មុខរបរ បុគ្គលិកណេត A366 ស្នាក់នៅផ្ទះលេខ១១៧ ផ្លូវជាតិលេខ៦ ភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ (ជាភ្នាក់ងារស៊ីសង)។
វត្ថុតាងចាប់យកមានៈម៉ូនីទ័រចំនួន២០គ្រឿង, CPUចំនួន១៥គ្រឿង, ឃីប៊តចំនួន១៥, ម៉ៅចំនួន១៤, ម៉ាស៊ីនព្រីនបុងបាល់ចំនួន៣គ្រឿង, ម៉ាស៊ីនព្រីនឯកសារចំនួន២គ្រឿង, ក្បាលកាម៉េរ៉ាសុវត្ថិភាព មួយគ្រឿង, ប្រាក់រៀល ចំនួន៦,៩៦៨,៥០០៛ (ប្រាំមួយលានប្រាំបួនសែនប្រាំមួយម៉ឺនប្រាំបីពាន់ប្រាំរយរៀលគត់), ប្រាក់ដុល្លារចំនួន២៦៧៥$ (ពីរពាន់ប្រាំមួយរយចិតសិបប្រាំដុល្លារអាមេរិច), វិញ្ញាបនបត្រអនុញ្ញាតអាជីវកម្ម របស់ឈ្មោះ នាក់ គន្ធា មួយសន្លឹក, ម៉ូតូចំនួន០១គ្រឿងម៉ាក Yamaha Mio ពណ៌ទឹកប៊ិចចាស់ លាយទឹកប្រាក់អត់ស្លាកលេខ និងឯកសារបុងចាក់បាល់ស៊ីសងមួយចំនួន។
ក្រោយពីត្រួតពិនិត្យរួចក្រុមប្រតិបត្តិការសម្រេចឃាត់ជនសង្ស័យខាងលើ បញ្ជូនមកកាន់អធិការដ្ឋាននគរបាលខណ្ឌទួលគោក ចាត់ការតាមផ្លូវច្បាប់។ ទីតាំងប្រព្រឹត្តបទល្មើសសមត្ថកិច្ច បានបិទសៀលឃ្លុំបេរផ្ទះជាបណ្ដោះអាសន្ន។
បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្ដោះអាសន្ន នៅអធិការដ្ឋាននគរបាលខណ្ឌទួលគោក ដើម្បី សាកសួរ និងចាត់ការតាមនីតិវិធីច្បាប់ ៕
ចំនួនអ្នកទស្សនា
- ថ្ងៃនេះ15171
- ម្សិលមិញ15681
- សប្តាហ៍នេះ74011
- ខែនេះ95891
- ឆ្នាំនេះ95891
- សរុប20538347