សម្តេចតេជោ ហ៊ុន សែន នឹងចេញទៅខេត្តកែប ដើម្បីចូលរួមដឹកនាំការរុករកសង្គ្រោះកម្មករដែលកំពុងជាប់នៅក្រោមអាគារដែលដួលរលំ
03-January-2020 | ដោយ ពលមនសិការ
ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានឲ្យដឹងមុននេះបន្តិចថា សម្តេចនឹងចេញទៅខេត្តកែបនៅពេលបន្តិចទៀតនេះដើម្បីចូលរួមដឹកនាំការរុករកសង្គ្រោះកម្មករដែលកំពុងជាប់នៅក្រោមអាគារដែលដួលរលំ។
ការលើកឡើងរបស់សម្តេចនាយករដ្ឋមន្ត្រី គឺធ្វើឡើងបន្ទាប់ពីមានហេតុការណ៍បាក់ស្រុតអគារកម្ពស់៧ជាន់ បណ្តាលឲ្យកម្មករប្រហែល៣០នាក់ ជាប់នៅក្រោមគំនរបាក់បែក។
ប្រភពពីសមត្ថកិច្ចបានឲ្យដឹងថាបច្ចុប្បន្នសមត្ថកិច្ចបានជួយសង្គ្រោះមនុស្សបានជាង១០នាក់ហើយ ក្នុងនោះមិនបណ្តាលឲ្យមាននរណាម្នាក់ស្លាប់នោះទេ។ ដោយបច្ចុប្បន្នសមត្ថកិច្ចកំពុងដុតដៃដុតជើងដើម្បីជួយសង្គ្រោះនិងស្វែងរកកម្មករដែលកំពុងបាត់ខ្លួន។
សេចក្តីរាយការណ៍ដែលបានដឹងថាមកដល់ពេលនេះអាជ្ញាធរខេត្តកែបរួមជាមួយនឹងកងកម្លាំងប្រដាប់អាវុធគ្រប់ប្រភេទកំពុងរិះរកគ្រប់មធ្យោបាយដើម្បីពន្លឿនការជួយសង្គ្រោះ បើអេស្កាវាទ័រត្រូវបានបញ្ជូនទៅដល់ទីតាំងកើតហេតុ។
ប្រភពដដែលបញ្ជាក់ថា អគារកម្ពស់៧ជាន់នោះ បានសុំច្បាប់សាងសង់កម្ពស់៥ជាន់ បច្ចុប្បន្នសាងសង់រហូតដល់៧ជាន់ បណ្តាលឲ្យបាក់សង្កត់កម្មករជាច្រើននាក់។
សូមជម្រាបថា មានការភ្ញាក់ផ្អើលយ៉ាងខ្លាំង ដោយមានករណីបាក់ស្រុតអគារ កម្ពស់ជាន់ស្រុតចុះមកក្រោម សង្កត់មនុស្សជាប់នៅខាងក្នុង ប្រហែល៣០នាក់ នៅខាងក្នុង មានទាំងស្ត្រីមានផ្ទៃពោះទៀត។ហេតុការណ៍នេះកើតឡើងកាលពីវេលាម៉ោង ៤និង៤០នាទីល្ងាច ថ្ងៃទី៣ ខែមករា ឆ្នាំ២០២០ នៅជិតវត្តសមាធិ ក្រុងកែប ខេត្តកែប ៕
ចំនួនអ្នកទស្សនា
- ថ្ងៃនេះ14021
- ម្សិលមិញ15681
- សប្តាហ៍នេះ72861
- ខែនេះ94741
- ឆ្នាំនេះ94741
- សរុប20537197