អគ្គិភ័យលែបត្របាក់ផ្ទះប្រជាពលរដ្ឋ២ខ្នង គ្មានសល់ដោយពុំដឹងមូលហេតុនៅស្រុកមុខកំពូល
15-January-2020 | ដោយ ពលមនសិការ
កណ្ដាល៖ ផ្ទះប្រជាពលរដ្ឋចំនួន២ខ្នង ត្រូវអគ្គិភ័យលែបត្របាក់គ្មានសល់ ដោយពុំដឹងបណ្ដាលមកពីមូលហេតុអ្វីនោះទេ។ ហេតុការណ៍នេះ បានធ្វើឲ្យមានការផ្អើលឆោឡោឡើងនៅវេលាម៉ោង២៣និង១០នាទី ថ្ងៃទី១៤ ខែមករា ឆ្នាំ២០២០ ស្ថិតក្នុងភូមិពាម ឃុំរកាកោង១ ស្រុកមុខកំពូលខេត្តកណ្ដាល។
មន្ដ្រីនគរបាលស្រុកមុខកំពូលបានឲ្យដឹងថា ផ្ទះរបស់ប្រជាពលរដ្ឋដែលត្រូវអគ្គិភ័យលែបត្របាក់គ្មានសល់មានចំនួន២ខ្នង ទី១ជារបស់ឈ្មោះ ប្រាក់ សាន ភេទប្រុស អាយុ៦៨ឆ្នាំ ផ្ទះធ្វើអំពីឈើប្រក់ក្បឿង ជញ្ជាំងក្ដា ទទឹង៦ម៉ែត្រ បណ្ដោយ៨ម៉ែត្រ និងទី២ជារបស់ឈ្មោះ រឿង ខន ភេទស្រី អាយុ៨០ឆ្នាំ ផ្ទះធ្វើអំពីឈើប្រក់ស័ង្កសី ជញ្ជាំងស្លឹកទទឹង៥ម៉ែត្រ បណ្ដោយ៦ម៉ែត្រ។ ដោយឡែកទ្រព្យសម្បត្ដិដែលនៅក្នុងរងការបាត់បង់មាន៖ ទូរ៣គ្រឿង ,ម៉ាស៊ីនបោកខោអាវ១គ្រឿង និងប្រាក់ដុល្លារចំនួន៥,០០០ដុល្លារសហរដ្ឋអាមេរិក (ទ្រព្យសម្បត្តិទាំងអស់នេះ គឺជារបស់ឈ្មោះ ប្រាក់ សាន)។
ប្រភពដដែលបន្ដថា ក្រោយពីសមត្ថកិច្ចទទួលបានព័ត៌មានថាមានអគ្គិភ័យឆេះផ្ទះប្រជាពលរដ្ឋ ភ្លាមកម្លាំងនគរបាលស្រុកមុខកំពូលបានចេញរថយន្ដសង្គ្រោះ និងពន្លត់អគ្គិភ័យចេញអន្ដរាគមន៍ពន្លត់ តែដោយស្ថានភាពផ្លូវមានលក្ខណៈតូចចង្អៀត រថយន្ដមិនអាចទៅដល់ចំណុចកើតហេតុបានទេ។
ចំពោះករណីនេះ សមត្ថកិច្ចជំនាញ ពុំទាន់ដឹងថា បណ្ដាលមកពីមូលហេតុអ្វីនោះទេព្រោះម្ចាស់ផ្ទះមិននៅ ដោយគាត់ទៅដេកនៅឯផ្សារមុខវត្តជ្រឹង ៕
ចំនួនអ្នកទស្សនា
- ថ្ងៃនេះ12101
- ម្សិលមិញ15681
- សប្តាហ៍នេះ70941
- ខែនេះ92821
- ឆ្នាំនេះ92821
- សរុប20535277