ចេញពីស្រុកកំណើតនៅខេត្ដកំពង់ឆ្នាំមកខេត្ដកណ្ដាល ដើម្បីស៊ីឈ្មួលធ្វើជាកម្មករសំណង់ ដោយទំនាស់ពាក្យបន្តិចបន្តួច យកដងពូថៅទៅវាយក្បាលយុវជនម្នាក់ទៀត បណ្ដាលឲ្យរងរបួសយ៉ាងដំណំ
18-January-2020 | ដោយ ពលមនសិការ
កណ្ដាល៖ នគរបាលស្រុកពញាឮ ចាប់ខ្លួនយុវជនសង្ស័យម្នាក់ករណីហិង្សាដោយចេតនា បន្ទាប់ពីយុវជនសង្ស័យរូបនេះ បានយកដងពូថៅទៅវាយក្បាលយុវជនម្នាក់ទៀត បណ្ដាលឲ្យរងរបួសយ៉ាងដំណំ ក្រោយពីមានទំនាស់ពាក្យសម្ដីគ្នាបន្ដិចបន្តួច។ ករណីនេះ បានកើតឡើងកាលពីវេលាម៉ោង៩និង១០នាទី ថ្ងៃទី១៧ ខែមករា ឆ្នាំ២០២០ ស្ថិតក្នុងភូមិទេពប្រណម្យ ឃុំវិហារលួង ស្រុកពញាឮ ។
មន្ដ្រីនគរបាលស្រុកពញាឮបានឲ្យដឹងថា យុវជនសង្ស័យឈ្មោះ ហេង សុទ្ធ ភេទប្រុស អាយុ២២ឆ្នាំ ជនជាតិខ្មែរ មុខរបរកម្មករសំណង់។ ចំណែកយុវជនរងគ្រោះឈ្មោះ ញឹប សំហៅសោម ភេទប្រុស អាយុ២១ឆ្នាំ ជនជាតិខ្មែរ មុខរបរកម្មករសំណង់។ ជនសង្ស័យនិងជនរងគ្រោះទាំង២នាក់នេះ មានទីលំនៅភូមិ ត្រពាំងបួន ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង។ បច្ចុប្បន្នស្នាក់នៅភូមិឃុំកើតហេតុ ។
ប្រភពដដែលបន្ដថា ជនសង្ស័យនិងជនរងគ្រោះ បាននាំគ្នាចាកចេញពីស្រុកកំណើតនៅខេត្ដកំពង់ឆ្នាំមកខេត្ដកណ្ដាល ដើម្បីស៊ីឈ្មួលធ្វើជាកម្មករសំណង់។ លុះមកដល់ថ្ងៃកើតហេតុ យុវជនរងគ្រោះបានប្រាប់ឲ្យយុវជនសង្ស័យធ្វើការខាងលាយកំបោរ តែយុវជនសង្ស័យពុំធ្វើទេ គឺធ្វើខាងជញ្ជូនឥដ្ឋវិញ ខណៈនោះយុវជនរងគ្រោះនិងយុវជនសង្ស័យក៏មានទំនាស់ពាក្យសម្ដីគ្នាបន្ដិតបន្តួច រហូតមកដល់វេលាម៉ោង៩ថ្ងៃខែឆ្នាំកើតហេតុ យុវជនរងគ្រោះបានអង្គុយផឹកទឹក ភ្លាមនោះក៏ស្រាប់តែជនសង្ស័យបានយកដងពូថៅធ្វើអំពីឈើ បានមកវាយជនរងគ្រោះចំក្បាល បណ្ដាលឲ្យសម្លប់នៅលើដី រងរបួសយ៉ាងដំណំ។ បន្ទាប់ពីវាយរួច យុវជនសង្ស័យបានរត់គេចខ្លួននៅទៅផ្ទះបងប្អូនបាត់ទៅ រីឯជនរងគ្រោះត្រូវបានក្រុមការងារនៅក្នុងការដ្ឋានជាមួយគ្នាដឹកយកទៅសង្គ្រោះនៅមន្ទីរពេទ្យ។
ប្រភពដដែលបានបន្ដទៀតថា បន្ទាប់ពីកម្លាំងនគរបាលប៉ុស្ដិ៍រដ្ឋបាលវិហារលួងទទួលបានព័ត៌មានករណីខាងលើនេះ ភ្លាមនោះក៏ស្រាវជ្រាវចាប់ខ្លួនយុវជនសង្ស័យយកប៉ុស្ដិ៍នគរបាលរដ្ឋបាលវិហាលួង ដើម្បីសាកសួរ និងកសាងសំណុំបញ្ជូនទៅកាន់អធិការដ្ឋាននគរបាលស្រុក ដើម្បីចាត់ការតាមនីតិវិធីច្បាប់ ៕
ចំនួនអ្នកទស្សនា
- ថ្ងៃនេះ11641
- ម្សិលមិញ15681
- សប្តាហ៍នេះ70481
- ខែនេះ92361
- ឆ្នាំនេះ92361
- សរុប20534817