មូលនិធិគន្ធបុប្ផាកម្ពុជាបានរៀបចំកិច្ចប្រជុំក្រុមប្រឹក្សាបរធនបាលលើកទី២
07-February-2020 | ដោយ ពលមនសិការ
ភ្នំពេញ៖ នៅព្រឹកថ្ងៃព្រហស្បតិ៍ ១៣កើត ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៦ ខែកុម្ភៈ ឆ្នាំ២០២០ នៅទីស្តីការក្រសួងសេដ្ឋកិច្ច និងហិរញ្ញវត្ថុ មូលនិធិគន្ធបុប្ផាកម្ពុជាបានរៀបចំកិច្ចប្រជុំក្រុមប្រឹក្សាបរធនបាលលើកទី២ ក្រោមអធិបតីភាពដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមប្រឹក្សាបរធនបាលនៃមូលនិធិគន្ធបុប្ផាកម្ពុជា។
កិច្ចប្រជុំនេះបានពិនិត្យ និងពិភាក្សាលើរបៀវារៈសំខាន់ៗ ដូចខាងក្រោម៖
១. វឌ្ឍនភាពការងារក្នុងឆ្នាំ២០១៩ ក្រោយពីបានស្តាប់របាយការណ៍ប្រចាំឆ្នាំ២០១៩ របស់មន្ទីរពេទ្យគន្ធបុប្ផា រួចមក, ក្រុមប្រឹក្សាបរធនបាលមូលនិធិគន្ធបុប្ផាកម្ពុជាបានកោតសរសើរ និងវាយតម្លៃខ្ពស់ចំពោះវឌ្ឍនភាព និងកិច្ចខិតខំប្រឹងប្រែងដ៏មុះមុតរបស់ថ្នាក់ដឹកនាំ និងបុគ្គលិកទាំងអស់របស់មន្ទីរពេទ្យ ដែលបានផ្តល់ការពិនិត្យ ព្យាបាល និងសង្គ្រោះកុមារកម្ពុជារាប់សែននាក់។ ជាមួយគ្នានេះដែរ ក្រុមប្រឹក្សាបរធនបាលមូលនិធិគន្ធបុប្ផាកម្ពុជា បានជំរុញ និងលើកទឹកចិត្តថ្នាក់ដឹកនាំ និងបុគ្គលិកទាំងអស់របស់មន្ទីរពេទ្យ ឱ្យបន្តពង្រឹងកិច្ចខិតខំប្រឹងប្រែងឱ្យបានកាន់តែប្រសើរឡើង ទាំងគុណភាព និងគុណតម្លៃ។
បន្ទាប់ពីនេះ លេខាធិការដ្ឋានមូលនិធិគន្ធបុប្ផាកម្ពុជា បានគោរពរាយការណ៍ជូនក្រុមប្រឹក្សាបរធនបាល អំពីវឌ្ឍនភាពការងាររបស់មូលនិធិគន្ធបុប្ផាកម្ពុជា ក្នុងឆ្នាំ២០១៩ ដូចខាងក្រោម៖
ក. វិភាគទានដែលទទួលបាន
• មូលនិធិគន្ធបុប្ផាកម្ពុជាទទួលបានវិភាគទានសរុបចំនួនប្រមាណ ៤៧ ៦៥០ ៤៤១ ដុល្លារ ក្នុងនោះប្រាក់រៀលមានចំនួន ១៥០ ៧៤៤ ៩១៧ ២០៧ រៀល និងប្រាក់ដុល្លារមានចំនួន ៩ ៩៣៦ ៣១២ ដុល្លារ។
• សប្បុរសជនដែលបានបរិច្ចាគជូនមូលនិធិគន្ធបុប្ផាកម្ពុជាមានចំនួនសរុប ៥៤ ៣៨០ នាក់។
ខ. ថវិកាបង្វែរជូនមន្ទីរពេទ្យ
• មូលនិធិគន្ធបុប្ផាកម្ពុជា បានបង្វែរថវិកាជូនមន្ទីរពេទ្យគន្ធបុប្ផា ជាបន្តបន្ទាប់សរុបចំនួនប្រមាណ ១១ លានដុល្លារ ក្នុងនោះប្រាក់រៀលចំនួន ៨ ប៊ីលានរៀល និងប្រាក់ដុល្លារចំនួន ៨ ៨៩២ ៤០៤ ដុល្លារ។
គ. សកម្មភាពផ្សព្វផ្សាយ និងកៀរគរវិភាគទាន
• មូលនិធិគន្ធបុប្ផាកម្ពុជា បានធ្វើការអំពាវនាវឱ្យមានការបំផុសចលនានៅគ្រប់ស្ថាប័នរដ្ឋ និងឯកជន និងជាសាធារណៈ តាមមធ្យោបាយមួយចំនួនដូចជា ការផលិតវីដេអូ ដែលលបានចាក់បញ្ជាំងនៅតាមទីសាធារណៈ, កិច្ចសហការជាមួយបុគ្គលដែលមានកេរ្តិ៍ឈ្មោះនៅក្នុងបណ្តាញសង្គម, កិច្ចសហការជាមួយស្ថាប័នដែលជាដៃគូផ្សេងៗ, ការប្រគំតន្ត្រីស្នាមញញឹម, ការប្រកួតកីឡាបាល់ទាត់, ការរៀបចំស្តង់ក្នុងកម្មវិធីសង្ក្រានសមុទ្រ ព្រមទាំងការធ្វើបទបង្ហាញនៅតាមគ្រឹះស្ថានឧត្តមសិក្សានានា ជាដើម។
២. ផែនការសកម្មភាពសម្រាប់ឆ្នាំ២០២០
ក្រុមប្រឹក្សាបរធនបាល បានអនុម័តលើផែនការសកម្មភាពសម្រាប់ការអនុវត្តក្នុងឆ្នាំ២០២០ ដែលនឹងផ្តោតការយកចិត្តទុកដាក់លើចំណុចដូចខាងក្រោម៖
ក. ការបង្កើនចំនួនសមាជិក នៅតាមបណ្តាគ្រឹះស្ថានសាធារណៈ និងឯកជន និងការរៀបចំកម្មវិធីកៀរគរមូលនិធិសប្បុរសធម៌នានា ឱ្យមានលក្ខណៈទៀងទាត់ និងជាប្រចាំ
ខ. ការបង្កើនការទំនាក់ទំនងសាធារណៈ និងការផ្សព្វផ្សាយអំពីមូលនិធិគន្ធបុប្ផាកម្ពុជា តាមរយៈបណ្តាញសង្គម និងតាមប្រព័ន្ធឌីជីថលនានា និង
គ. ការពង្រឹង និងបង្កើនប្រសិទ្ធភាពនៃការគ្រប់គ្រងប្រព័ន្ធទិន្នន័យសមាជិករបស់មូលនិធិ ព្រមទាំងការគ្រប់គ្រងមូលនិធិប្រកបដោយប្រសិទ្ធភាព និងតម្លាភាព។
៣. ផ្សេងៗ
ក្រុមប្រឹក្សាបរធនបាល ក៏បានពិនិត្យ និងពិភាក្សាផងដែរ លើញ្ហាមួយចំនួន ដូចខាងក្រោម៖
• ការកើនឡើងនៃចំនួនកុមារ ដែលបានមកទទួលសេវាពិនិត្យ និងព្យាបាល ដែលនេះទាមទារឱ្យមន្ទីរពេទ្យត្រូវពង្រឹងបន្ថែមនូវសមត្ថភាព និងរចនាសម្ព័ន្ធគ្រប់គ្រងឱ្យបានកាន់តែប្រសើរឡើង ដើម្បីឆ្លើយតបទៅនឹងកំណើននេះ និង
• ការគិតគូរអំពីការវិនិយោគមូលនិធិ ដោយប្រកាន់ភ្ជាប់គោលការណ៍ពិពិធកម្ម សន្ទីយ៍ភាព និងសុវត្ថិភាព។
ជាចុងបញ្ចប់ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី បានណែនាំឱ្យលេខាធិការដ្ឋាន ខិតខំបំពេញការងារបន្ថែមទៀត ក្នុងការផ្សព្វផ្សាយដល់សាធារណជនឱ្យបានយល់ដឹងអំពីវត្តមាន និងសារសំខាន់នៃការបង្កើតមូលនិធិ-គន្ធបុប្ផាកម្ពុជានេះឡើង ដើម្បីកៀរគរធនធានក្នុងស្រុក ដោយឈរលើស្មារតី “ខ្មែរជួយខ្មែរ” សម្រាប់បម្រើដល់គោលដៅចម្បងតែមួយគត់គឺ “រក្សាឱ្យបាននូវចីរភាពនៃមន្ទីរពេទ្យគន្ធបុប្ផាទាំង៥ ទីតាំង ប្រកបដោយគុណភាព និងកិត្យានុភាពដែលជាមរតកដ៏ថ្លៃថ្លារបស់លោកវេជ្ជបណ្ឌិត Beat Richner” ៕
ចំនួនអ្នកទស្សនា
- ថ្ងៃនេះ4691
- ម្សិលមិញ15681
- សប្តាហ៍នេះ63531
- ខែនេះ85411
- ឆ្នាំនេះ85411
- សរុប20527867