សៀមរាប៖ ថ្ងៃអាទិត្យ ៨រោច ខែមាឃ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៦ ខែកុម្ភៈ ឆ្នាំ២០២០ វេលាម៉ោង ១៥នឹង៣០នាទី មានករណីភ្លើងឆេះព្រៃ មួយបានកើតឡើងនៅចំណុចចង្កេះភ្នំ ភ្នំដី ស្ថិតនៅភូមិបន្ទាយស្រី ឃុំខ្នារសណ្តាយ ស្រុកបន្ទាយស្រី ខេត្តសៀមរាប។

លោកវរសេនីយ៍ឯក ឡុង សំណាង អធិការនៃអធិការដ្ឋាននគរបាលស្រុកបន្ទាយស្រី បានឲ្យដឹងថាបន្ទាប់ពីទទួលបានព័ត៌មានថាមានករណីភ្លើងឆេះព្រៃកើតឡើង កម្លាំងសមត្ថកិច្ចបានចេញអន្តរាគមន៍ភ្លាមៗ ដោយមានការសហការជាមួយ រដ្ឋបាលស្រុក ក្រុមប្រឹក្សាស្រុក អាជ្ញាធរអប្សរា ប្រជាការពារភូមិ និងប្រជាពលរដ្ឋ សរុបរួមចំនួន៣៥នាក់ ធ្វើការពន្លត់ដោយជោគជ័យ។

ករណីភ្លើងឆេះព្រៃនេះបានបង្កការខូចខាត ឆេះព្រៃគិតជាផ្ទៃដីសរុបចំនួន១៨ហិចតា ដោយពុំបានបង្កអោយមានការខូចខាតប៉ះពាល់ដល់ទ្រព្យសម្បត្តិប្រជាពលរដ្ឋនោះឡើង។ កម្លាំងសមត្ថកិច្ច បានគ្រប់គ្រងសភាពការនិងពន្លត់បានជោគជ័យ១០០% នៅវេលាម៉ោង១៧នឹង១០នាទី ថ្ងៃខែឆ្នាំដដែល ៕