ប្រជុំផ្សព្វផ្សាយអំពីរបៀបប្រើប្រាស់កម្មវិធីFPCS និងប្រគល់លេខគណនីប្រព័ន្ធគ្រប់គ្រងវត្ដមានជនបរទេសក្នុងខេត្ដកណ្ដាល
18-February-2020 | ដោយ ពលមនសិការ
កណ្ដាល៖ ស្នងការដ្ឋាននគរបាលខេត្ដកណ្ដាល នាព្រឹកថ្ងៃទី១៨ ខែកុម្ភៈ ឆ្នាំ២០២០ នៅសាលប្រជុំសាលាខេត្ដកណ្ដាល បើកកិច្ចប្រជុំផ្សព្វផ្សាយអំពីរបៀបប្រើប្រាស់កម្មវិធីFPCS និងប្រគល់លេខគណនីប្រព័ន្ធគ្រប់គ្រងវត្ដមានជនបរទេសក្នុងខេត្ដកណ្ដាល ក្រោមអធិបតីភាពឯកឧត្ដម ឧត្ដមសេនីយ៍ឯក អ៊ុក ហៃសីឡា អគ្គនាយករងអន្ដោប្រវេសន៍ និងលោកឧត្ដមសេនីយ៍ត្រី ឈឿន សុចិត្ដ ស្នងការនគរបាលខេត្ដកណ្ដាល។ ក្នុងកិច្ចប្រជុំនេះដែរ មានការអញ្ជើញចូលរួមពីលោកស្នងការរងទទួលផែនអន្ដោប្រវេសន៍ ,លោកស្នងការរងទទួលកិច្ចការប៉ុស្ដិ៍នគរបាលរដ្ឋបាល ,នាយ-នាយរងការិយាល័យ នាយ-នាយរងផ្នែក និងមន្ដ្រីចំណុះផែនការងារអន្ដោប្រវេសន៍ ,នាយការិយាល័យកិច្ចការប៉ុស្ដិ៍នគរបាលរដ្ឋបាល ,អធិការ អធិការរង និងនាយ-នាយរងផ្នែកអន្ដោប្រវេសន៍១១ក្រុង/ស្រុក ,លោកអធិការរងទទួលកិច្ចការប៉ុស្ដិ៍នគរបាលរដ្ឋបាល១១ក្រុង/ស្រុក និងនាយ-នាយរងប៉ុស្ដិ៍នគរបាលរដ្ឋបាលទាំង១២៧ប៉ុស្ដិ៍ផងដែរ ។
បន្ទាប់ពីអានផែនការលេខៈ០២៦ផក ចុះថ្ងៃទី១៤ ខែធ្នូ ឆ្នាំ២០១០ របស់ស្នងការដ្ឋាននគរបាលខេត្ដកណ្ដាល ស្ដីពីការគ្រប់គ្រងវត្ដមានជនបរទេសក្នុងភូមិសាស្ដ្រខេត្ដកណ្ដាលដោយលោកអនុសេនីយ៍ឯក ឈឿន ធូរ នាយផ្នែកគ្រប់គ្រងជនបរទេសនៃផែនការងារអន្ដោប្រវេសន៍ចំណុះស្នងការដ្ឋាននគរបាលខេត្ដកណ្ដាលរួច លោកឧត្ដមសេនីយ៍ត្រី ឈឿន សុចិត្ដស្នងការនគរបាលខេត្ដកណ្ដាលបានមានប្រសាសន៍ថា ក្រោមការដឹកនាំរបស់រាជរដ្ឋាភិបាល នៃព្រះរាជាណាចក្រកម្ពុជា ប្រទេសជាតិមានសន្ដិភាព ស្ថេរភាពនយោបាយ សន្ដិសុខ សណ្ដាប់ធ្នាប់សាធារណៈ និងសុវត្ថិភាពសង្គមល្អប្រសើរ មានការអភិវឌ្ឍលើគ្រប់វិស័យ ជាពិសេសនយោបាយបើកចំហជើងមេឃរបស់រាជរដ្ឋាភិបាលបាននាំមកនូវកំណើនជនបរទេសជាអ្នកវិនិយោគធុរជន ទេសចរណ៍ជាច្រើនគួរឲ្យកត់សម្គាល់។ សំដៅរួមចំណែកក្នុងសកម្មភាពអនុវត្ដកម្មវិធីនយោបាយ និងយុទ្ធសាស្ដ្រចតុកោណដំណាក់កាលទី៤របស់រាជរដ្ឋាភិបាល និងគោលការណ៍ដឹកនាំរបស់ក្រសួងមហាផ្ទៃ ក៏ដូចជាអគ្គនាយកដ្ឋានអន្ដោប្រវេសន៍ និងក្រោមការដឹកនាំផ្ទាល់របស់ឯកឧត្ដមអភិបាល នៃគណៈអភិបាលខេត្ដកណ្ដាល ស្នងការដ្ឋាននគរបាលខេត្ដកណ្ដាលដាក់ចេញនៅផែនការអនុវត្ដជាក់ស្ដែងដូចជា៖ សំដៅលើកកំពស់ប្រសិទ្ធិភាពនៃការអនុវត្ដច្បាប់ ស្ដីពីច្បាប់អន្ដោប្រវេសន៍ និងច្បាប់ការងារ ,រួមចំណែករក្សាសន្ដិសុខ សណ្ដាប់ធ្នាប់សាធារណៈ និងសុវត្ថិភាពសង្គម ដែលជាបុព្វបទដ៏សំខាន់បម្រើឲ្យការអភិវឌ្ឍន៍ជាតិលើគ្រប់វិស័យ និងការកាត់បន្ថយភាពក្រីក្រ,រៀបចំវិធានការកម្លាំង និងមធ្យោបាយដើម្បីគាំទ្រអធិការដ្ឋាននគរបាលក្រុង/ស្រុក និងនគរបាលប៉ុស្ដិ៍រដ្ឋបាល ក្នុងការអនុវត្ដន៍សេចក្ដីណែនាំរបស់ក្រសួងមហាផ្ទៃ សេចក្ដីណែនាំរបស់អគ្គនាយកដ្ឋានអន្ដោប្រវេសន៍ឲ្យមានប្រសិទ្ធភាព ,ក្ដាប់ឲ្យបានច្បាស់លាស់អំពីចំនួនជនបរទេស និងទីកន្លែងស្នាក់នៅរបស់ជនបរទេសគ្រប់រូប ដែលបានស្នាក់នៅក្នុងខេត្ដកណ្ដាល ,ក្ដាប់ឲ្យបាននូវព័ត៌មានអំពីការរងគ្រោះរបស់ជនបរទេសដោយឧបទ្ទវហេតុនានា ឬការបង្កឧប្បត្ដិហេតុ ដោយជនបរទេសដើម្បីមានវិធានការអន្ដរាគមន៍ទាន់ពេលវេលា ,ជម្រុញឲ្យជនបរទេសអន្ដោប្រវេសន៍ដែលតាំងទីលំនៅក្នុងខេត្ដកណ្ដាលត្រូវបានចុះឈ្មោះក្នុងមូលដ្ឋានដែលខ្លួនតាំងទីលំនៅស្របតាមច្បាប់ស្ដីពីអន្ដោប្រវេសន៍ ,បង្កា និងទប់ស្កាត់វត្ដមានជនបរទេសល្មើសច្បាប់ ដោយយកភូមិសាស្ដ្រខេត្ដកណ្ដាល ដើម្បីជ្រកកោនឫគេចខ្លួនពីសំណាញ់ច្បាប់ព្រមទាំងរកឲ្យឃើញ និងសុំគោលការណ៍សហការបង្ក្រាបទាន់ពេលវេលាចំពោះជនបរទេសណាដែលប្រព្រឹត្ដិល្មើសច្បាប់ ចំពោះម្ចាស់ ឫអ្នកកាន់កាប់លំនៅដ្ឋានគ្រប់ប្រភេទ រួមទាំងជនបរទេសដែលស្នាក់នៅក្នុងខេត្ដកណ្ដាលត្រូវមានការយល់ដឹងអំពីច្បាប់ ជាពិសេសច្បាប់អន្ដោប្រវេសន៍ និងមានស្មារតីក្នុងការចូលរួមអនុវត្ដច្បាប់។
លោកឧត្ដមសេនីយ៍ស្នងការបានលើកឡើងទៀតថា ដើម្បីឲ្យមន្ដ្រីនគរបាលយើងអនុវត្ដការងារគ្រប់គ្រងជនបរទេសឲ្យកាន់តែមានប្រសិទ្ធភាព លោកបានដាក់នៅវិធានការ៣ចំណុចសំខាន់ៗដើម្បីយកអនុវត្ដគឺ ១.វិធានការផ្សព្វផ្សាយអប់រំ ២.វិធានការជំនាញ និងទី៣.វិធានការច្បាប់។
ជាចុងបញ្ចប់ លោកឧត្ដមសេនីយ៍ស្នងការ បានជំរុញឲ្យគ្រប់បណ្ដាអធិការដ្ឋាននគរបាលក្រុងស្រុកជាពិសេសប៉ុស្ដិ៍នគរបាលរដ្ឋបាលក្រោមឱវាទ នៃស្នងការដ្ឋាននគរបាលខេត្ដកណ្ដាល ត្រូវអនុវត្ដផែនការអន្ដោប្រវេសន៍ឲ្យមានប្រសិទ្ធិភាពខ្ពស់ចាប់ពីថ្ងៃចុះហត្ថលេខានេះតទៅ។
បន្ទាប់ពីលោកឧត្ដមសេនីយ៍ត្រី ឈឿន សុចិត្ដ ស្នងការនគរបាលខេត្ដកណ្ដាលបានមានប្រសាសន៍ចប់ ឯកឧត្ដម ឧត្ដមសេនីយ៍ឯក អ៊ុក ហៃសីឡា អគ្គនាយករងនៃអគ្គនាយដ្ឋានអន្ដោប្រវេសន៍ បានមានប្រសាសន៍ផ្ដាំផ្ញើរ និងសង្ឃឹមថា បន្ទាប់ពីធ្វើការប្រគល់នូវប្រព័ន្ធប្រើប្រាស់គណនីគ្រប់គ្រងវត្ដមានជនបរទេសFPCS និងមានការណែនាំរបៀបប្រើប្រាស់ពីគ្រូបង្គោល នៃអគ្គនាយដ្ឋានអន្ដោប្រវេសន៍រួច សង្ឃឹមថា មន្ដ្រីនគរបាលយើងនឹងយកចំណេះដឹងទាំងអស់នេះ យកទៅអនុវត្ដន៍គឺកាន់តែមានប្រសិទ្ធិភាពខ្ពស់ ៕
ចំនួនអ្នកទស្សនា
- ថ្ងៃនេះ1741
- ម្សិលមិញ15681
- សប្តាហ៍នេះ60581
- ខែនេះ82461
- ឆ្នាំនេះ82461
- សរុប20524917