គណៈកម្មការទី២ព្រឹទ្ធសភា ចុះឈ្វេងយល់អំពី ការអភិវឌ្ឍប្រជាធិបតេយ្យ នៅថ្នាក់ក្រោមជាតិក្នុងបុព្វបទថ្មី ពិសេសការងារចាត់តាំងការអនុវត្តថវិកា ការអភិវឌ្ឍមូលដ្ឋាន និងការផ្តល់សេវាសាធារណៈ នៅខេត្តពោធិ៍សាត់
02-March-2020 | ដោយ ពលមនសិការ
ពោធិ៍សាត់៖ គណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃព្រឹទ្ធសភា (គណៈកម្មការទី២ ព្រឹទ្ធសភា) ដឹកនាំដោយឯកឧត្តម ជា ជេដ្ឋ ប្រធានគណៈកម្មការ បានអញ្ជើញជួបពិភាក្សាការងារជាមួយនឹងឯកឧត្តម ម៉ក់ រ៉ា ប្រធានក្រុមប្រឹក្សាខេត្ត ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ ដោយមានការចូលរួមពីសមាជិកក្រុមប្រឹក្សាខេត្ត និងថ្នាក់ដឹកនាំមន្ទីរពាក់ព័ន្ធនឹងវិស័យរបស់គណៈកម្មការទី២ព្រឹទ្ធសភា នៅសាលប្រជុំរបស់សាលាខេត្តពោធិ៍សាត់ នាព្រឹកថ្ងៃទី០២ ខែមីនា ឆ្នាំ២០២០។
ឯកឧត្តម ជា ជេដ្ឋ ប្រធានគណៈកម្មការទី២ព្រឹទ្ធសភា បានជម្រាបជូនពីគោលបំណងរបស់គណៈកម្មការ ដែលចុះមកកាន់ខេត្តពោធិ៍សាត់នាពេលនេះ គឺដើម្បីឈ្វេងយល់កាន់តែស៊ីជម្រៅបន្ថែមទៀត លើបញ្ហាមួយចំនួនរួមមាន៖ការអនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការ គឺក្នុងបុព្វបទថ្មីនៃការផ្ទេរធនធានមនុស្ស និងថវិកាឱ្យដល់មូលដ្ឋាន និងវឌ្ឍនភាពនៃការអភិឌ្ឍតាមបែបប្រជាធិបតេយ្យ នៅថ្នាក់ក្រោមជាតិ តាមខ្លឹមសារនៃអនុក្រឹត្យលេខ១៨២ អនក្រ.បក១៨៣ អនក្រ.បក និង១៨៤ អនក្រ.បក ចុះថ្ងៃទី០២ ខែធ្នូ ឆ្នាំ២០១៩ របស់រាជរដ្ឋាភិបាលកម្ពុជា។ ប្រសិទ្ធភាពក្នុងការគ្រប់គ្រងរដ្ឋបាល ការផ្តល់សេវាសាធារណៈ និងការអភិវឌ្ឍមូលដ្ឋានក្រុង ស្រុក ខណ្ឌ ការអនុវត្តថវិកាថ្នាក់ក្រោមជាតិ (ទទួល-ទូទាត់) ការធ្វើគម្រោងអភិវឌ្ឍមូលដ្ឋាន ការប្រើប្រាស់មូលនិធិសង្កាត់ (រជ្ជទេយ្យបុរេប្រទាន) និងបញ្ហាប្រឈម សមត្ថភាពក្នុងការកសាង និងអនុវត្តគម្រោងអភិវឌ្ឍថ្នាក់ក្រុង ស្រុក ខណ្ឌ និងឃុំ សង្កាត់របស់ខេត្ត ព្រមទាំងបូកសរុបលទ្ធផលការងារអភិវឌ្ឍន៍មូលដ្ឋាន ការអនុវត្តគោលនយោបាយ ភូមិ ឃុំមានសុវត្ថិភាព និងការផ្តល់សេវាសាធារណៈ ការចូលរួមអភិវឌ្ឍន៍មូលដ្នានរបស់អង្គការមិនមែនរដ្ឋាភិបាល(NGOs) ព្រមទាំងចុះមកប្រមូលព័ត៌មានអំពីប្រសិទ្ធភាពនៃការអនុវត្តន៍ការងារ បញ្ហាប្រឈមនានា នៅខេត្តពោធិ៍សាត់ ពាក់ព័ន្ធនឹងវិស័យជាសមត្ថកិច្ចរបស់គណៈកម្មការទី២ព្រឹទ្ធសភា។
ក្នុងឱកាសនោះ ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ បានមានប្រសាសន៍សម្តែងនូវគារវៈស្វាគមន៍យ៉ាងកក់ក្តៅ ចំពោះវត្តមានគណៈប្រតិភូគណៈកម្មការទី២ព្រឹទ្ធសភា ដែលបានឆ្លៀតពេលវេលាដ៏មមាញឹក អញ្ជើញមកបំពេញបេសកកម្មនៅខេត្តពោធិ៍សាត់នាពេលនេះ។
ឯកឧត្តមអភិបាលនៃគណៈអភិបាលខេត្ត បានបន្តមានប្រសាសន៍ ជម្រាប់ជូនលក្ខណៈភូមិសាស្ត្រ ដោយខេត្តពោធិ៍សាត់ នៅភាគពាយ័ព្យនៃព្រះរាជាណាចក្រកម្ពុជា ដោយមានចម្ងាយ១៨៦គ.ម ពីរាជធានីភ្នំពេញ មានផ្លូវគមនាគមន៍សំខាន់ៗ៣ គឺ៖ ផ្លូវជាតិលេខ៥ ផ្លូវដែក(រថភ្លើង) និងផ្លូវទឹក (បឹងទន្លេសាប) នឹងមានព្រំប្រទល់ខាងកើតជាប់នឹងខេត្តកំពង់ឆ្នាំង ខាងលិចជាប់នឹងខេត្តបាត់ដំបង និងប្រទេសថៃ ដែលមានខ្សែបន្ទាត់ព្រំដែនប្រវែងប្រមាណ ៨០គ.ម ខាងជើងទល់នឹងបឹងទន្លេសាប និងខាងត្បូងជាប់នឹងខេត្តកំពង់ស្ពឺ និងខេត្តកោះកុង ក្នុងនោះដែរ ត្រូវបែងចែកចេញជា ១រដ្ឋបាលក្រុង ៦រដ្ឋបាលស្រុក ៧សង្កាត់ ៤២ឃុំ និង៥១១ភូមិ ដោយមានប្រជាជនសរុបចំនួន៤៩៥.១៨៦នាក់ ស្រី២៥០.៧៦៩នាក់ ស្មើនឹង១១៧.២៥៨គ្រួសារ ប្រកបមុខរបរជាកសិករ៧៥,៨% សេវាករ២៣,៥% និងសិប្បករ០,៧%។
ទន្ទឹមនឹងនោះដែរ មន្ទីរពាក់ព័ន្ធ ក៏បានរាយការណ៍ជូនគណៈកម្មការទី២ព្រឹទ្ធសភា អំពីលទ្ធផលការងារសំខាន់ៗ ដែលសម្រេចបាននាពេលកន្លងមក ព្រមទាំងបញ្ហាប្រឈមមួយចំនួន ដែលបានជួបប្រទះ ជូនសមាជិក សមាជិកា គណៈកម្មការ បានជ្រាប។
ឯកឧត្តម ជា ជេដ្ឋ ប្រធានគណៈកម្មការទី២ព្រឹទ្ធសភា បានវាយតម្លៃខ្ពស់ចំពោះថ្នាក់ដឹកនាំខេត្តពោធិ៍សាត់ និងមន្ទីរពាក់ព័ន្ធ ដែលបានខិតខំប្រឹងប្រែងធ្វើការបម្រើប្រជាពលរដ្ឋបានយ៉ាងល្អ។ ទន្ទឹមនឹងនោះដែរ ឯកឧត្តម ក៏បានលើកទឹកចិត្តដល់អាជ្ញាធរខេត្ត និងមន្ទីរពាក់ព័ន្ធ សូមបន្តយកចិត្តទុកដាក់អនុវត្តការងារបន្តទៀត។ ចំណែកបញ្ហាប្រឈមដែលខេត្ត និងមន្ទីរបានលើកឡើង ឯកឧត្តមប្រធានគណៈកម្មការ បានបញ្ជាក់ថា ឯកឧត្តមនឹងពាំនាំយកបញ្ហាប្រឈមទាំងនេះ ជម្រាបជូនគណៈកម្មាធិការអចិន្ត្រៃយ៍ព្រឹទ្ធសភា ដើម្បីធ្វើអន្តរាគមន៍ទៅរាជរដ្ឋាភិបាល ឬក្រសួងពាក់ព័ន្ធ និងវិស័យជាសមត្ថកិច្ចរបស់គណៈកម្មការទី២ព្រឹទ្ធសភា ជួយដោះស្រាយការលំបាក និងបញ្ហាប្រឈមមួយចំនួន ដើម្បីឲ្យមន្ទីរពាក់ព័ន្ធមានលទ្ធភាពពេញលេញក្នុងការបំពេញភារកិច្ចរបស់ខ្លួនឲ្យបានទាន់ពេលវេលា ក្នុងការបំពេញភារកិច្ចបម្រើប្រជាពលរដ្ឋ និងផលប្រយោជន៍របស់ប្រទេសជាតិ៕
ចំនួនអ្នកទស្សនា
- ថ្ងៃនេះ14411
- ម្សិលមិញ15191
- សប្តាហ៍នេះ57561
- ខែនេះ79441
- ឆ្នាំនេះ79441
- សរុប20521897