ឧត្តមសេនីយ៍ឯក ហ៊ុន ម៉ាណែត៖ សូមផ្តាំផ្ញើដល់នាយទាហាន នាយទាហានរង និងពលទាហានទាំងអស់ សូមរក្សាភាពស្មោះត្រង់ដាច់ខាតចំពោះ ជាតិ សាសនា ព្រះមហាក្សត្រ
04-March-2020 | ដោយ ពលមនសិការ
ព្រះវិហារ៖ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេរមភូមិន្ទ មេបញ្ជាការកងទ័ពជើងគោក បានអញ្ជើញជាអធិបតីក្នុងពិធីប្រជុំបូកសរុបលទ្ធផលការងារយោធា សន្តិសុខ ឆ្នាំ២០១៩ និងផ្សព្វផ្សាយផែនការសកម្មភាពការងារយោធា សន្តិសុខ ឆ្នាំ២០២០ របស់កងពលធំអន្តរាគមន៍លេខ៣ កាលពីថ្ងៃអង្គារ ទី៣ ខែមីនា ឆ្នាំ២០២០។
មានប្រសាសន៍នៅក្នុងអង្គពិធី ឯកឧត្តម ឧត្តមសេនីយ៍ឯក ហ៊ុន ម៉ាណែត សូមកោតសរសើរ និងវាយតម្លៃខ្ពស់កិច្ចខិតខំប្រឹងប្រែងលះបង់របស់នាយទាហាន នាយទាហានរង និងពលទាហាន របស់កងពលធំអន្តរាគមន៍លេខ៣ និងបណ្តាស្ថាប័ន-កងឯកភាពចំណុះ នៅក្នុងការបំពេញភារកិច្ចបម្រើជាតិមាតុភូមិ, ការពារបូរណទឹកដី និងចូលរួមនៅក្នុងការថែរក្សាសុខសន្តិភាព។
ឯកឧត្តម ឧត្តមសេនីយ៍ឯក អគ្គមេបញ្ជាការរង នៃកងយោធពលខេរមភូមិន្ទ មេបញ្ជាការកងទ័ពជើងគោក មានប្រសាសន៍បន្តថា ទាំងអស់នេះផ្តើមឡើងពីការតាំងចិត្ត, ការប្តេជ្ញាចិត្តរួបរួមសាមគ្គីគ្នា និងស្មារតីស្នេហាជាតិរបស់យោធិនម្នាក់ៗ និងសូមគាំទ្រ និងជំរុញឱ្យបន្តកិច្ចខិតខំប្រឹងប្រែងឱ្យបានសកម្មខ្លាំងក្លាថែមទៀតសម្រាប់ឆ្នាំ២០២០ និងបណ្តាឆ្នាំខាងមុខ ហើយត្រូវដកពិសោធន៍, ពិនិត្យ និងវាយតម្លៃអំពីលទ្ធផលការងារដែលសម្រេចបានមុនៗ ដើម្បីធានាបាននូវនិរន្តរភាពនៃប្រសិទ្ធភាពការងារ, ប្រព័ន្ធការងារឹងមាំ, និងការកសាងពង្រឹងអង្គភាពរឹងមាំលើគ្រប់វិស័យ។
ឯកឧត្តម ឧត្តមសេនីយ៍ឯក ហ៊ុន ម៉ាណែត បានបញ្ជាក់ថាការធានាការពារឱ្យបាននូវរាល់សមិទ្ធផលសង្គម-សេដ្ឋកិច្ច ដែលកម្ពុជាខិតខំសម្រេចបានក្នុងរយៈពេលជាង៤០ ឆ្នាំចុងក្រោយនេះ ជាពិសេសការការពារឱ្យបានដាច់ខាតនូវឯករាជ្យ អធិបតេយ្យ និងបូរណភាពទឹកដី ព្រមទាំងការពង្រឹងតួនាទីសកម្មរបស់កម្ពុជានៅលើឆាកអន្តរជាតិ តម្រូវឱ្យកងយោធពលខេមរភូមិន្ទ ត្រូវពឹងផ្អែកជាចម្បងលើការអភិវឌ្ឍសមត្ថភាព និងបណ្តុះជាប់ជានិច្ចនូវមនសិការស្នេហាជាតិជាចាំបាច់ ដូចប្រសាសន៍របស់ សម្តេចតេជោនាយករដ្ឋមន្ត្រី នៅក្នុងវិវេចនាយុទ្ធសាស្ត្រការពារជាតិឆ្នាំ២០១៣ ដែលជំរុញឱ្យកងយោធពលខេមរភូមិន្ទ ចាំបាច់ត្រូវកែទម្រង់ឱ្យទៅជាកម្លាំងការពារជាតិដ៏រឹងមាំ មានវិន័យម៉ឺងម៉ាត់ និងមានសមត្ថភាពគ្រប់គ្រាន់ ដើម្បីឆ្លើយតបប្រកបដោយប្រសិទ្ធភាព ព្រមទាំងចូលរួមចំណែកក្នុងការអភិវឌ្ឍជាតិ និងលើកតម្កើងកិត្យានុភាពរបស់កម្ពុជានៅលើឆាកអន្តរជាតិ។
ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេរមភូមិន្ទ មេបញ្ជាការកងទ័ពជើងគោក សូមផ្តាំផ្ញើដល់មេបញ្ជាការ មេបញ្ជាការរង គ្រប់លំដាប់ថ្នាក់ នាយទាហាន នាយទាហានរង និងពលទាហានទាំងអស់របស់កងពលធំអន្តរាគមន៍លេខ៣ និងបណ្តាស្ថាប័ន-កងឯកភាពចំណុះ សូមរក្សាភាពស្មោះត្រង់ដាច់ខាតចំពោះ ជាតិ សាសនា ព្រះមហាក្សត្រ ព្រមទាំងគោរពឱ្យបានម៉ឺងម៉ាត់នូវរដ្ឋធម្មនុញ្ញនៃព្រះរាជាណាចក្រកម្ពុជា និងច្បាប់ស្តីពីលក្ខន្តិកៈទូទៅចំពោះយោធិននៃកងយោធពលខេមរភូមិន្ទ ក៏ដូចជាច្បាប់ និងលិខិតបទដ្ឋានគតិយុត្តពាក់ព័ន្ធផ្សេងៗ និងត្រូវបន្តយកចិត្តទុកដាក់ឲ្យបានខ្លាំងក្លាក្នុងការលើកស្ទួយជីវភាពរស់នៅ និងសុខមាលភាពរបស់កងទ័ព និងត្រៀមកម្លាំង មធ្យោបាយ និងសម្ភារៈ ជួយសង្គ្រោះប្រជាពលរដ្ឋដែលរងគ្រោះដោយគ្រោះមហន្តរាយដែលបង្កឡើងដោយកត្តាមនុស្ស ឬធម្មជាតិ នៅក្នុងភូមិសាស្ត្រទទួលខុសត្រូវឱ្យបានរហ័សបំផុត៕
ចំនួនអ្នកទស្សនា
- ថ្ងៃនេះ15681
- ម្សិលមិញ15191
- សប្តាហ៍នេះ58831
- ខែនេះ80711
- ឆ្នាំនេះ80711
- សរុប20523167