សម្តេចវិបុលសេនាភក្តី សាយ ឈុំជួបសំណេះសំណាលជាមួយគណៈប្រតិភូស្ត្រី ក្នុងឱកាសទិវាអន្តរជាតិនារី ៨មីនា
05-March-2020 | ដោយ ពលមនសិការ
ភ្នំពេញ៖ ក្នុងឱកាសអបអរសាទរខួបទី១០៩ នៃទិវាអន្តរជាតិនារី ៨មីនា ឆ្នាំ២០២០ នាព្រឹកថ្ងៃព្រហស្បតិ៍ ទី០៥ ខែមីនា ឆ្នាំ២០២០ នៅវិមានព្រឹទ្ធសភា សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានជួបសំណេះសំណាលជាមួយនឹងគណៈប្រតិភូស្ត្រី ជាថ្នាក់ដឹកនាំក្រសួងកិច្ចការនារី និងស្ថាប័នពាក់ព័ន្ធ មកពីថ្នាក់ជាតិ និងថ្នាក់ក្រោមជាតិ ដឹកនាំដោយលោកជំទាវ អ៊ឹង កន្ថាផាវី រដ្ឋមន្ត្រីក្រសួងកិច្ចការនារី។
នាឱកាសដ៏ប្រសើរថ្លៃថ្លានោះសម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា មានប្រសាសន៍ថា ថ្ងៃនេះសម្តេចមានសេចក្តីសោមន្សរីករាយក្រៃលែងដោយបានគណៈប្រតិភូស្ត្រីជាថ្នាក់ដឹកនាំ មន្ត្រីរាជការនៅថ្នាក់ជាតិ និងថ្នាក់ក្រោមជាតិ ដឹកនាំដោយលោកជំទាវរដ្ឋមន្ត្រីក្រសួងកិច្ចការនារី អញ្ជើញមកជួបសម្តែងការគួរសម និងធ្វើរបាយការណ៍អំពីលទ្ធផលសម្រេចបាន ក៏ដូចជាវឌ្ឍនភាពនៃការលើកកម្ពស់ស្ថានភាព សិទ្ធិ ឋានៈ តួនាទីរបស់ស្ត្រីកម្ពុជាក្នុងរយៈពេល២៥ឆ្នាំក្រោយសន្និសីទស្ត្រីពិភពលោកឆ្នាំ១៩៩៥ នៅទីក្រុងប៉េកាំងនាពេលនេះ។
សម្តេចវិបុលសេនាភក្តី សាយ ឈុំ មានប្រសាសន៍បន្តថា សម្តេចសូមអបអរ និងគាំទ្រចំពោះប្រធានបទឆ្នាំនេះដែលចែង“មានសន្តិភាព មានការលើកកម្ពស់សមភាពយេនឌ័រ” ដោយផ្សាភ្ជាប់ផងដែរទៅនឹងក្របខណ្ឌថ្មីជាសកល “គោលដៅអភិវឌ្ឍប្រកបដោយចីរភាព” ដែលតម្រូវមិនទុកនរណាម្នាក់ឱ្យនៅឯកោ។ គោលបំណងនៃប្រធានបទឆ្នាំនេះ ក្រៅពីការរំលឹកពីការតស៊ូ របស់នារីនៅទូទាំងសកលលោក ក្នុងការទាមទារសិទ្ធិ សេរីភាព ប្រជាធិបតេយ្យ និងការអនុវត្តសិទ្ធិស្មើភាពរវាងបុរសនិងស្ត្រីក៏មានការពិនិត្យឡើងវិញលើសមិទ្ធផលនានាសម្រេចបានរយៈពេល២៥ឆ្នាំ ក្រោយសន្និសីទពិភពលោកស្តីពីស្ត្រីលើកទី៤ ឆ្នាំ១៩៩៥ នៅទីក្រុងប៉េកាំង ដែលមានផែនការសកម្មភាពផ្តោតទៅលើបញ្ហាកង្វល់ជាអាទិភាពចំនួន១២ ដែលមានមូលដ្ឋានលើការលើកកម្ពស់សិទ្ធិស្ត្រីក្នុងវិស័យសេដ្ឋកិច្ច សង្គម នយោបាយ ការអប់រំ សុខភាព កិច្ចការពារផ្លូវច្បាប់ បរិស្ថាន និងការចូលរួមក្នុងថ្នាក់ធ្វើសេចក្តីសម្រេច។
សម្តេច ប្រធានព្រឹទ្ធសភា មានប្រសាសន៍បន្ថែមថា សមិទ្ធផលដ៏ច្រើនដែលកម្ពុជាទទួលបាន ដោយសារប្រទេស យើងមានការបង្រួបបង្រួមជាតិ ក្រោយពីកិច្ចព្រមព្រៀងទីក្រុងប៉ារីសឆ្នាំ១៩៩១ និងសន្តិភាពពេញលេញក្រោមនយោបាយ ឈ្នះ-ឈ្នះ ក្នុងឆ្នាំ១៩៩៨ ផ្តួចផ្តើមចេញពីប្រាជ្ញាឈ្លាសវៃ និងប្រកបដោយគតិបណ្ឌិតរបស់ តួអង្គពីរគឺ៖ ព្រះករុណា ព្រះបរមរតនកោដ្ឋ និង សម្តេចអគ្គមហាសេនាបតី ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបាននាំមកនូវកិច្ចអភិវឌ្ឍន៍ប្រកបដោយភាពរីកចម្រើន និងសុខសុវត្ថិភាព ធ្វើឱ្យប្រជារាស្ត្ររស់នៅជួបជុំគ្រួសារមានឱកាសរៀនសូត្របង្កើនសមត្ថភាព មានជំនាញវិជ្ជាជីវៈ បច្ចេកវិជ្ជាជឿនលឿន អាចចូលរួមក្នុងទីផ្សារការងារទទួលបានប្រាក់កម្រៃខ្ពស់ជាដើម។ មិនតែប៉ុណ្ណោះក៏ជាការបំផុសកៀរគរប្រជាពលរដ្ឋកម្ពុជាឱ្យរួមគ្នាសម្រេចឱ្យបានកិច្ចអភិវឌ្ឍន៍ប្រកបដោយចីរភាព និងបរិយាប័ន្ន ដោយមិនទុកនរណាម្នាក់ឱ្យនៅឯកោ។ ការអភិវឌ្ឍន៍ធនធានមនុស្ស ជាកត្តាចម្បងក្នុងកិច្ចអភិវឌ្ឍន៍ប្រទេសជាតិ ក្នុងនោះសមភាពយេនឌ័រ និងការខិតខំបង្កើនភាពអង់អាចដល់ស្ត្រី និងក្មេងស្រី ដែលមានចំនួនជាង៥០%នៃប្រជាពលរដ្ឋសរុប ជាការងារដែលត្រូវគិតគូរ ដើម្បីឈានឆ្ពោះទៅសម្រេចនូវចក្ខុវិស័យក្នុងការប្រែក្លាយប្រទេសកម្ពុជាទៅជាប្រទេសមានចំណូលមធ្យមកម្រិតខ្ពស់ក្នុងឆ្នាំ២០៣០ និងជាប្រទេសមានចំណូលខ្ពស់ក្នុងឆ្នាំ២០៥០។ ការដែលស្ត្រីទទួលបានការលើកកម្ពស់សិទ្ធិ តម្លៃ ឱកាសចូលរួមនិងផលប្រយោជន៍ដោយស្មើភាពនៅក្នុងគ្រួសារនិងសង្គម ធ្វើឱ្យប្រជាពលរដ្ឋគ្រប់រូប ទទួលបានសេចក្តីសុខ សុភមង្គល ចំរុងចម្រើន សម្បូរសប្បាយក្នុងជីវិត។
សម្តេចវិបុលសេនាភក្តី សាយ ឈុំ មានប្រសាសន៍សង្គត់ធ្ងន់ថា កម្ពុជាមានមោទនភាព ចំពោះសមិទ្ធផលជាវិជ្ជមាន ដ៏ច្រើនគួរ ឱ្យកត់សម្គាល់ក្នុងសង្គម និងសេដ្ឋកិច្ចជាតិដែលកើតចេញពីឆន្ទៈដ៏មោះមុត និងកិច្ចខិតខំប្រឹងប្រែងយ៉ាងខ្លាំងរបស់គណបក្សប្រជាពលរដ្ឋកម្ពុជា ព្រឹទ្ធសភាជាតិ និងរាជរដ្ឋាភិបាល ក្រោមការដឹកនាំប្រកបដោយដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងជាប្រធានគណបក្សប្រជាពលរដ្ឋកម្ពុជា ព្រមទាំងការរួមចំណែកពីគ្រប់ប្រជាពលរដ្ឋទូទាំងព្រះរាជាណាចក្រកម្ពុជាដែលមានទំនុកចិត្ត និងបានបោះឆ្នោតជូនគណបក្សប្រជាពលរដ្ឋកម្ពុជា មានចំនួនប្រមាណ៧៧%នៃសំឡេងសន្លឹកឆ្នោតបានការទាំងមូល ក្នុងឆ្នាំ២០១៨។
សម្តេចវិបុលសេនាភក្តី សាយ ឈុំ ប្រធានព្រឹទ្ធសភា បានបញ្ជាក់ថាព្រឹទ្ធសភា ដែលជាស្ថាប័ននីតិបញ្ញត្តិ មានមុខងារពិនិត្យនិងផ្តល់យោបល់លើអត្ថបទច្បាប់ ដែលអនុម័តដោយរដ្ឋសភា ដើម្បីការពារសិទ្ធិ និងផលប្រយោជន៍របស់ប្រជាពលរដ្ឋគ្រប់រូប។ ច្បាប់ទាំងអស់នេះត្រូវបានយល់ដឹង និងគោរពពីប្រជាពលរដ្ឋ តាមរយៈការផ្សព្វផ្សាយយ៉ាងទូលំទូលាយ ដោយស្ថាប័ននីតិបញ្ញត្តិ និងនីតិប្រតិបត្តិផងដែរ។ ដោយឡែកព្រឹទ្ធសភាមានយន្តការក្នុងការពិនិត្យ និងតាមដានអត្ថបទច្បាប់ ដើម្បីធ្វើសំដៅ ធានាការឆ្លើយតបទៅនឹងយេនឌ័រ ដើម្បីបម្រើផលប្រយោជន៍ប្រកបដោយសមធម៌ ចំពោះប្រជាពលរដ្ឋកម្ពុជាទាំងបុរស និងស្ត្រី តាមរយៈគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃព្រឹទ្ធសភា ដឹកនាំដោយលោកជំទាវ មាន សំអាន នាពេលបច្ចុប្បន្ន។
ព្រឹទ្ធសភា សូមគាំទ្រយុទ្ធសាស្ត្រលើកកម្ពស់សមភាពយេនឌ័រ និងផ្តល់ភាពអង់អាចដល់ស្ត្រី និងក្មេងស្រី ព្រមជាមួយរាជរដ្ឋាភិបាលដែលកំពុងប្តេជ្ញាចិត្តដ៏មុតមាំក្នុងការអនុវត្តការងារនេះ ហើយសង្ឃឹមថាទៅអនាគត ព្រះរាជាណាចក្រកម្ពុជានឹងសម្រេចបានគោលដៅអភិវឌ្ឍន៍ប្រកបដោយចីរភាពឆ្នាំ២០៣០ ជាពិសេសចំណុចគោលដៅទី៥ ដែលចែងពី "ការសម្រេចឱ្យបានសមភាពយេនឌ័រ និងបង្កើនភាពអង់អាចដល់ស្ត្រី និងក្មេងស្រីគ្រប់រូប”។ ដើម្បីបម្រើផលប្រយោជន៍ប្រជាពលរដ្ឋកម្ពុជាគ្រប់រូបទាំងស្ត្រីនិងបុរសប្រកបដោយសមភាព យើងខ្ញុំបានចុះទៅសាកសួរសុខទុក្ខប្រជារាស្ត្រនៅតាមមូលដ្ឋាន ដើម្បីស្វែងយល់ពីស្ថានភាពរស់នៅស្តាប់មតិយោបល់និងសំណូមពររបស់ពួកគាត់។
តាងនាមខ្ញុំជាប្រធានព្រឹទ្ធសភា និងតាងនាមឱ្យសមាជិក សមាជិកា ដែលជាតំណាងឆន្ទៈដោយប្រយោលនៃប្រជាពលរដ្ឋកម្ពុជា យើងខ្ញុំនឹងបន្តគាំទ្រចំពោះ ការតាក់តែងច្បាប់ ការពិនិត្យ ការអនុម័ត និងតាមដានការអនុវត្តច្បាប់ផ្សេងៗ ដើម្បីធានាថាច្បាប់ទាំងនោះ មានការឆ្លើយតបទៅនឹងផលប្រយោជន៍ របស់ប្រជាពលរដ្ឋគ្រប់រូបទាំងស្ត្រី ទាំងបុរស ដើម្បីឈានទៅសម្រេចឱ្យបានកិច្ចអភិវឌ្ឍន៍ជាតិមួយដែលប្រកបដោយចីរភាព និងបរិយាប័ន្ន ៕
ចំនួនអ្នកទស្សនា
- ថ្ងៃនេះ14461
- ម្សិលមិញ15191
- សប្តាហ៍នេះ57611
- ខែនេះ79491
- ឆ្នាំនេះ79491
- សរុប20521947