ស្នងការខេត្ដកណ្ដាល ត្រៀមកម្លាំង២៤ម៉ោងលើ២៤ម៉ោងដើម្បីអន្ដរាគមន៍ការប្រយុទ្ធប្រឆាំងនឹងជំងឺកូវីដ១៩
23-March-2020 | ដោយ ពលមនសិការ
កណ្ដាល៖ លោកឧត្ដមសេនីយ៍ត្រី ឈឿន សុចិត្ដ ស្នងការនគរបាលខេត្ដកណ្ដាល និងជាអនុប្រធានគណៈកម្មការប្រយុទ្ធប្រឆាំងនឹងជំងឺកូវីដ១៩(COVID-19) បានមានប្រសាសន៍ថា លោកត្រៀមកម្លាំងអន្ដរាគមន៍ពិសេសរួចជាស្រេច២៤ម៉ោងលើ២៤ម៉ោង ដើម្បីគ្រប់ស្ថានការ ឫក៏តម្រូវការចាំបាច់អ្វីមួយរបស់លោកអភិបាលខេត្ដ ក៏ដូចជាគណៈបញ្ជាការឯករដ្ឋបាលក្រុង/ស្រុក ពាក់ព័ន្ធនឹងជំងឺកូរ៉ូណា COVID-19 លោកនឹងបញ្ជូនកម្លាំងជួយអន្ដរាគមន៍ភ្លាមៗ ។ ការលើកឡើងយ៉ាងដូច្នេះ ធ្វើឡើងក្នុងពិធីប្រជុំការប្រយុទ្ធប្រឆាំងនឹងជំងឺកូវីត(COVID-19) នាព្រឹកថ្ងៃទី២៣ ខែមីនា ឆ្នាំ២០២០ នៅសាលប្រជុំសាលាខេត្ដកណ្ដាល ក្រោមអធិបតីភាពឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្ដកណ្ដាល និងជាប្រធានគណៈកម្មការប្រយុទ្ធនឹងជំងឺកូវីដ១៩(COVID-19) និងមានការអញ្ជើញចូលរួមពីឯកឯកឧត្ដមអភិបាលរងខេត្ដ ,ស្នងការនគរបាលខេត្ដកណ្ដាល ,មេបញ្ជាការសឹករងខេត្ដ ,មេបញ្ជាការកងរាជអាវុធហត្ថខេត្ដ និងលោកអភិបាលក្រុងស្រុកទាំង១១ផងដែរ។
លោកឧត្ដមសេនីយ៍ត្រី ឈឿន សុចិត្ដ ស្នងការខេត្ដកណ្ដាលបានឲ្យដឹងទៀតថា ជំងឺកូវីត១៩(COVID-19) គឺជាបញ្ហាមួយដែលរីករាលដាលខ្លាំងនៅក្នុងសកលលោក ក៏ដូចជានៅក្នុងខេត្ដកណ្ដាលយើង ហើយក៏មានការព្រួយបារម្ភជាខ្លាំងរបស់រាជរដ្ឋាភិបាល ក៏ដូចជាថ្នាក់ដឹកនាំខេត្ដយើង ទោះបីជម្ងឺនេះនៅក្នុងខេត្ដកណ្ដាលយើងមានតួលេខតិចក៏ដោយ យើងត្រូវតែរួមគ្នាទប់ស្កាត់ ពិនិត្យតាមដានរាល់ប្រជាពលរដ្ឋ ក៏ដូចជាគ្រប់មជ្ឈដ្ឋានទាំងអស់ដែលត្រឡប់មកពីធ្វើការពីក្រៅប្រទេសវិញ ហើយថ្មីៗនេះ កម្មករខ្មែរយើងបានត្រឡប់មកពីប្រទេសថៃចូលក្នុងប្រទេសយើងវិញយ៉ាងគំហ៊ុគ ជាពិសេសក្នុងមូលដ្ឋានរបស់យើង ហើយក្នុងនាមលោកជាអនុប្រធានគណៈកម្មការប្រឆាំងនឹងជម្ងឺកូវីត១៩(COVID-19) ដែលមានឯកឧត្ដម គង់ សោភ័ណ្ឌ អភិបាលខេត្ដជាប្រធាន លោកបានចាត់តាំងត្រៀម និងរៀបចំកម្លាំងអន្ដរាគមន៍ពិសេសទាំង៣អន្ដរាគមន៍២៤ម៉ោងលើ២៤ម៉ោង ដើម្បីគ្រប់គ្រងស្ថានការគ្រប់បែបយ៉ាង ឬតម្រូវការចាំបាច់អ្វីមួយរបស់លោកអភិបាលខេត្ដ ក៏ដូចជាគណៈបញ្ជាការឯករដ្ឋបាលក្រុង/ស្រុក ពាក់ព័ន្ធនឹងជម្ងឺកូវីត១៩( COVID-19) លោកនឹងបញ្ជូនកម្លាំងជួយអន្ដរាគមន៍ភ្លាមៗ ប៉ុន្ដែបើពាក់ព័ន្ធក្នុងបច្ចេកទេសនៃការព្យាបាល ក្រុមការងាររបស់លោកគឺគ្មានជំនាញទេ។
លោកឧត្ដមសេនីយ៍ស្នងការបានបន្ថែមទៀតថា លោកបានចាត់តាំងឲ្យកម្លាំងរបស់លោកផ្នែកសន្ដិសុខ ក៏ដូចជាតាមបណ្ដាក្រុងស្រុកក្ដាប់ព័ត៌មានទាំងអស់បាន ទាំងព័ត៌មានបំប៉ោងមិនមែនជាការពិតដែលបង្ហោះតាមបណ្ដាញសង្គម ក៏ដូចជាប្រជាពលរដ្ឋ ឬក៏កម្មករដែលចូលមកមិនសហការ ឬមិនស្ថិតនៅដាច់ដោយឡែកពីគ្នា គឺត្រូវយកព័ត៌មានទាំងនេះ មករាយការណ៍ជូនលោក ដើម្បីយកព័ត៌មានទាំងនោះរាយការណ៍ជូនលោកអភិបាលខេត្ដ ហើយលោកក៏ឲ្យអធិការក្រុងស្រុកត្រូវធ្វើជាសេនាធិការផ្ទាល់ទៅអភិបាលស្រុកក្រុងតែម្ដង ដើម្បីងាយស្រួលការបង្កាទប់ស្កាត់បានទាន់ពេលវេលា ៕
ចំនួនអ្នកទស្សនា
- ថ្ងៃនេះ10871
- ម្សិលមិញ15191
- សប្តាហ៍នេះ54021
- ខែនេះ75901
- ឆ្នាំនេះ75901
- សរុប20518357