ភ្នំពេញ៖ ជនសង្ស័យម្នាក់ដែលធ្លាប់ធ្វើសកម្មភាពយ៉ាងសកម្មលួច ស្លាកលេខរថយន្តស៊េរីទំនើបៗបានសម្រេចចំនួន៤លើក នៅក្នុងភូមិសាស្រ្តរាជធានីភ្នំពេញត្រូវបាននគរបាលខណ្ឌដូនពេញបង្រ្កាបចាប់ខ្លួននិងដកហូតស្លាកលេខរថយន្ត១២សន្លឹកនិងឧបករណ៍ប្រព្រឹត្តបទល្មើសមួយចំនួនទៀតដើម្បីយកទៅចាត់ការតាមផ្លូវច្បាប់។

ជនសង្សយឈ្មោះ សៅ វណ្ណា ភេទប្រុស ​អាយុ៣៨ឆ្នាំ ជនជាតិខ្មែរ គ្មានមុខរបរពិតប្រាកដ រស់នៅផ្ទះជួល ភូមិ៣ សង្កាត់ផ្សារចាស់ ខណ្ឌដូនពេញត្រូវបានចាប់ខ្លួននៅវេលាម៉ោង១២និង៣០យប់ឈានចូលថ្ងៃទី២៤ ខែមីនា ឆ្នាំ២០២០ ស្ថិតនៅចំណុចផ្លូវលេខ១៧កែងនិងផ្លូវ១៩ ភូមិ៣ សង្កាត់ផ្សារចាស់ ខណ្ឌដូនពេញ។

កម្លាំងសមត្ថកិច្ចចុះល្បាតហើយប្រទះឃើញជនសង្ស័យកំពុងដើរស្ពាយកាបូបមានការសង្ស័យសមត្ថកិច្ចឆែកឆេរត្រួតពិនិត្យឃើញស្លាកលេខរថយន្តចំនួន១២សន្លឹក សោរនិងតួណឺវីស៥ដើមសម្រាប់ដោះស្លាកលេខ និងឧបករណ៍សម្រាប់កាច់សោរកុងតាក់ម៉ូតូចំនួន១ដើម។

អធិការនគរបាលខណ្ឌដូនពេញ លោកវរសេនីយ៍ឯក ទៀង ច័ន្ទសា ប្រាប់ឱ្យដឹងថាជនសង្ស័យបានធ្លាប់ធ្វើសកម្មភាពលួចដោះស្លាកលេខរថយន្តចំនួន២លើកនៅក្នុងភូមិសាស្រ្តខណ្ឌ៧មករា និងធ្វើសកម្មភាពលួចដោះស្លាកលេខរថយន្តចំនួន២លើកនៅក្នុងភូមិសាស្រ្តខណ្ឌទួលគោកសរុបលួចបានស្លាកលេខរថយន្ត៨សន្លឹក។

 ជនសង្ស័យកំពុងត្រូវបានកសាងសំណុំរឿងបញ្ជូនទៅតុលាការអនុវត្តតាមនីតិវិធី។ ដោយឡែកកម្លាំងនគរបាលបន្តស្រាវជ្រាវស្វែងរកចាប់បក្ខជនសង្ស័យពួកមួយចំនួនទៀតដើម្បីយកមកចាត់ការតាមផ្លូវច្បាប់ផងដែរ ៕