ព្រះសីហនុ៖ ជនសង្ស័យម្នាក់ ពាក់ព័ន្ធករណីឃាតកម្ម(ប្លន់សម្លាប់) ត្រូវបានកម្លាំងនគរបាលខេត្តព្រះសីហនូ ស្រាវជ្រាវឃាត់ខ្លួន នៅថ្ងៃទី៣០ ខែមេសា ឆ្នាំ២០២០ នៅភូមិ​ជើង​គោ ឃុំ​ជើងគោ ស្រុកព្រៃនប់ ខេត្ត​ព្រះសីហនុ។

លោកឧត្តមសេនីយ៍ទោ ជួន ណារិន្ន ស្នងការនគរបាលខេត្តព្រះសីហនុ បានឲ្យដឹងថា កាលពីថ្ងៃទី២៩ ខែមេសា ឆ្នាំ២០២០ វេលាម៉ោង១៣នឹង០០នាទី ស្ថិតនៅព្រៃជើងភ្នំថ្មដា ភូមិសំរុងក្រោម ឃុំសំរុង ស្រុកព្រៃនប់ ខេត្តព្រះសីហនុ មានករណីប្រ​ទះឃើញ សពមួយកើត​ឡើង។ ក្រោយ​ពីទទួលព័ត៌មានកម្លាំងអធិការដ្ឋាននគរបាលស្រុកព្រៃនប់ សហការជាមួយកម្លាំងជំនាញ នៃស្នងការដ្ឋាននគរបាលខេត្តព្រះសីហនុ កម្លាំងអាវុធហត្ថស្រុក ប៉ុស្តិ៍​នគរបាល​ពាក់ព័ន្ធ បានចុះទៅ ពិនិត្យ​សពនិងកន្លែងកើតហេតុ ឃើញថា ស្ថានភាពសព ដេកផ្ងា ស្នាម​របួសក្បាលផ្នែកខាងក្រោយ និងផ្នែកខាងមុខ ស្លៀកខោកីពណ៌ស អត់មានពាក់អាវទេ។

តាមការបំភ្លឺរបស់ម្តាយសពឈ្មោះ ចាន់ ដា អាយុ៤៣ឆ្នាំ មុខរបរកម្មកររោងចក្រ មានទីលំនៅភូមិត្រពាំងមូល ឃុំជើងគោ ស្រុកព្រៃនប់ ខេត្តព្រះសី​ហ​នុ បានឲ្យដឹងថា កូនរបស់គាត់ឈ្មោះ ផាត ភារៈ ភេទ​ប្រុស អាយុ១៩ឆ្នាំ នៅវេលាម៉ោង២១ ថ្ងៃទី២៧ ខែមេសា ឆ្នាំ២០២០ បានសុំគាត់ចេញពីផ្ទះជិះម៉ូតូម៉ាកហុងឌ្រីម ផលិតឆ្នាំ២០១៩ ពាក់ស្លាកលេខ ព្រះសីហនុ 1H-9772 ពណ៌ខ្មៅ ទៅទិសខាងត្បូងមួយភ្លែត មុនពេលសុំគាត់ចាកចេញពីផ្ទះនោះ គឺមានគេតេទូរស័ព្ទហៅកូនគាត់ កូនរបស់គាត់ប្រើទូរស័ព្ទលេខ 070 702 815។

សម្ភារបាត់បង់៖ ម៉ូតូម៉ាកហុងដាឌ្រីម ពណ៌ខ្មៅ ផលិតឆ្នាំ២០១៩ ពាក់ស្លាកលេខ1H-9772 ចំនួន  ០១គ្រឿង។​

តាមការសន្និដ្ឋានជំហានដំបូងករណីខាងលើ គឺជាករណីឃាតកម្ម(ប្លន់សម្លាប់) ។ ហើយសពខាងលើកម្លាំងជំនាញបន្ទាប់ពីធ្វើកោសល្យវិច្ច័យរួចបានប្រ​គល់ទៅក្រុមគ្រួសារយកទៅធ្វើបុណ្យតាមប្រពៃណី។ 

លោកស្នងការបានបន្តថា ករណីនេះកម្លាំងអធិការ​ដ្ឋាននគរបាលស្រុកព្រៃនប់​បានស្រាវជ្រាវយ៉ាងយក​ចិត្តទុកដាក់ រហូតមកថ្ងៃទី​៣០ ខែមេសា ឆ្នាំ២០២០ វេលាម៉ោង​១៤នឹង១៥នាទី ទើបយើងកំណត់មុខសញ្ញាបានឈានទៅដល់ការឃាត់ខ្លួនជន​សង្ស័យឈ្មោះ ចាន់ លីឈាង ភេទប្រុស អាយុ​១៨​ឆ្នាំ មុខរបរកម្មករជ្រៀកឈើ មានទីលំនៅភូមិ​ជើង​គោ ឃុំ​ជើងគោ ស្រុកព្រៃនប់ ខេត្ត​ព្រះសីហនុ។

ដកហូតម៉ូតូ០១គ្រឿងម៉ាក ហុងដាឌ្រីម ស៊េរី០១៩​ ពណ៌ខ្មៅ ពាក់ផ្លាកលេខ ព្រះសីហនុ​១H​-៩៩៧២ ជារបស់ជនរង​គ្រោះ។

តាមការឆ្លើយសារ​ភាពរបស់ជនសង្ស័យ បានរៀបរាប់​ថា ខ្លួន​ពិតជាបានធ្វើសកម្មភាព វាយសម្លាប់ប្លន់យកម៉ូតូរបស់ជនរងគ្រោះប្រាកដមែនដោយទូរស័ព្ទហៅជនរងគ្រោះអោយមកជក់ថ្នាំញៀនជាមួយ ពេលជក់រួចបំរុងត្រឡប់ទៅផ្ទះវិញខ្លួនបានយកដុំថ្មវាយទៅលើជនរង​គ្រោះចំនួន០៣ដុំថ្ម បណ្តាលអោយជនរងគ្រោះដួលទៅថ្ម ហើយខ្លួនក៏ជិះម៉ូតូជនរង​គ្រោះសំដៅទៅក្រុងព្រះសី​ហនុ ដើម្បីលក់ប៉ុន្តែគ្មានអ្នកហ៊ានទិញ ព្រោះគ្មានប័ណ្ណសំគាល់(កាតគ្រី) ទើបជិះម៉ូតូត្រឡប់មកផ្ទះវិញ។​លុះដល់វេលាម៉ោងខាងលើទើបត្រូវនគរបាលឃាត់ខ្លួនតែម្តង។

​បច្ចុប្បន្នជនសង្ស័យកំពុងឃុំខ្លួនបណ្តោះអាសន្ននៅអធិការដ្ឋាននគរបាលស្រុក ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី ៕