ប្រមុខរាជរដ្ឋាភិបាលកម្ពុជាចេញសារាចរហាមមិនឱ្យប្រជាពលរដ្ឋខ្មែរលក់ឬជួលដីស្រែដីចំការ ឬលំនៅឋានទៅឱ្យប្រជាពលរដ្ឋនៃប្រទេសជិតខាង
19-November-2015 | ដោយ ពល រាជសី
ភ្នំពេញ៖ ប្រមុខរាជរដ្ឋាភិបាលកម្ពុជាបានចេញសារាចរមួយ ធ្វើការហាមប្រជាពលរដ្ឋខ្មែរមិនឱ្យលក់ឬជួលដីស្រែ ឬ ដីចំការ ឬដីលំនៅឋាន របស់ខ្លួននៅតាមតំបន់ព្រំដែន ឱ្យទៅប្រជាពលរដ្ឋនៃប្រទេសជិតខាងនោះទេ។
ក្នុងសារាចរដែលចុះហត្ថលេខាថ្ងៃទី១៧ ខែវិច្ឆិកា ឆ្នាំ២០១៥ ដោយសម្ដេចអគ្គមហាសេនាបតីតេជោ ហ៊ុន សែន បានគូសបញ្ជាក់ថា នាពេលកន្លងមកនេះ មានប្រជាពលរដ្ឋខ្មែរមួយចំនួន បានជួលដីស្រែចំការ ឬដីលំនៅឋាន របស់ខ្លួននៅតាមតំបន់ព្រំដែន ឱ្យទៅប្រជាពលរដ្ឋនៃប្រទេសជិតខាងដូចជា វៀតណាម ឡាវ និងថៃ ដើម្បីបង្កបង្កើនផល ឬប្រកបអាជីវកម្មផ្សេងៗ។ល។
ការជួលដីរបស់ប្រជាពលរដ្ឋខ្មែរទាំងនេះ មានករណីខ្លះពុំមានរៀបចំឯកសារគតិយុត្តិ ឬកិច្ចសន្យាជួលឱ្យបានត្រឹមត្រូវតាមផ្លូវច្បាប់ឡើយ ដែលជាហេតុធ្វើឱ្យម្ចាស់ដីជាជនជាតិខ្មែរបាត់បង់នូវផលប្រយោជន៍ នៅពេលមានវិវាទកើតមានឡើង។
ម្យ៉ាងវិញទៀតនៅតំបន់ព្រំដែនដែលពុំទាន់បានកំណត់ខណ្ឌសីមា និងបោះបង្គោលព្រំដែនផ្លូវការរួចរាល់ជាស្ថាពរ ការជួលដីនៅតាមខ្សែបន្ទាត់ព្រំដែនរបស់ប្រជាពលរដ្ឋខ្មែរទៅឱ្យប្រជាពលរដ្ឋនៃ ប្រទេសជិតខាង បានបង្កឱ្យមានភាពស្មុគស្មាញដល់កិច្ចការរបស់គណៈកម្មាធិការចម្រុះកិច្ចការព្រំដែនក្នុងការអនុវត្តការងាររបស់ខ្លួន។
ដើម្បីរក្សាការពារនូវសិទ្ធិកាន់កាប់ដីធ្លី និងផលប្រយោជន៍ស្របច្បាប់របស់ប្រជាពលរដ្ឋខ្មែរ ក៏ដូចជាការជួយជំរុញនិងលើកកម្ពស់ជីវភាពរស់នៅរបស់ប្រជាពលរដ្ឋនៅតាមតំបន់ព្រំដែន ព្រមទាំងជួយសម្រួលដល់ការងារកំណត់ខណ្ឌសីមា និងបង្គោលព្រំដែនជាមួយប្រទេសជិតខាង សំដៅរក្សាការពារឱ្យបាននូវបូរណភាពទឹកដី និងអធិតេយ្យភាពជាតិ រាជរដ្ឋាភិបាលបានដាក់ចេញនូវវិធានការមួយចំនួន ដែលក្នុងនោះរួមាន៖ ហាមប្រជាពលរដ្ឋខ្មែរមិនឱ្យលក់ ឬជួលដីស្រែដីចំការ ឬដីលំនៅឋាននៅតាមតំបន់ព្រំដែន ឱ្យទៅប្រជាពលរដ្ឋនៃប្រទេសជិតខាង ទោះបីក្នុងរូបភាពណាក៏ដោយ។ ក្នុងករណីដែលមានការជួលដីរួចហើយ តែពុំមានឯកសារគតិយុត្តិ ឬកិច្ចសន្យាត្រឹមត្រូវ អភិបាលខេត្តត្រូវចាត់ចែងណែនាំឱ្យប្រជាពលរដ្ឋខ្មែបញ្ឈប់លែងឱ្យមានការជួលដីនោះ ឱ្យទៅប្រជាពលរដ្ឋនៃប្រទេសជិតខាងតទៅទៀត ដោយដាក់ឱសានវាទក្នុងរយៈពេលកំណត់មួយជាក់លាក់ ស្របតាមស្ថានភាពជាក់ស្ដែង។
ក្នុងករណីដែលមានការជួលដីរួចហើយ តែមានឯកសារគតិយុត្តិ ឬកិច្ចសន្យាត្រឹមត្រូវ ការជួលដីនោះអាចបន្តរហូតដល់អស់សុពលភាព។ បន្ទាប់ពីបញ្ចប់សុពលភាព ហាមមិនឱ្យជួលដីនោះបន្តទៅឱ្យប្រជាពលរដ្ឋនៃប្រទេសជិតខាងទៀតឡើយ។ អភិបាលខេត្តត្រូវចាត់ឱ្យមានការពិនិត្យឯកសារ ឬកិច្ចសន្យាដែលប្រជាពលរដ្ឋខ្មែរបានជួលដីនៅតាមតំបន់ព្រំដែន ឱ្យទៅប្រជាពលរដ្ឋនៃប្រទេសជិតខាងនាពេលកន្លងមក ដើម្បីណែនាំឱ្យប្រជាពលរដ្ឋខ្មែរ អនុវត្តន៍តាមស្មារតីចំណុចទី២ និងចំណុចទី៣ខាងលើ។ ក្រសួង ស្ថាប័ន និងរដ្ឋបាលថ្នាក់ក្រោមជាតិពាក់ព័ន្ធត្រូវដាក់ចេញនូវវិធានការ និងយុទ្ធសាស្ត្រសមស្រប ដើម្បីជួយជំរុញការងារបង្កបង្កើនផល និងការដាំដុះដំណាំផ្សេងៗរបស់ប្រជាពលរដ្ឋនៅតាមតំបន់ព្រំដែន ដែលជាការរួមចំណែកដល់ការលើកកម្ពស់ជីវភាពរស់នៅរបស់ប្រជាពលរដ្ឋ និងជួយទប់ស្កាត់មិនឱ្យប្រជាពលរដ្ឋខ្មែរជួលដីឱ្យទៅប្រជាពលរដ្ឋនៃប្រទេសជិតខាង។
ទទួលបានសារាចរនេះ គ្រប់ក្រសួង ស្ថាប័នពាក់ព័ន្ធ រដ្ឋបាលខេត្ត ក្រុង ស្រុក ឃុំ សង្កាត់ដែលជាប់ព្រំដែន មន្ទីរ និងអង្គភាពជំនាញជុំវិញខេត្តដែលជាប់ព្រំដែន ត្រូវចាត់ចែងអនុវត្តន៍ឱ្យមានប្រសិទ្ធភាព និងដោយស្មារតីទទួលខុសត្រូវខ្ពស់៕
ចំនួនអ្នកទស្សនា
- ថ្ងៃនេះ14321
- ម្សិលមិញ15681
- សប្តាហ៍នេះ73161
- ខែនេះ95041
- ឆ្នាំនេះ95041
- សរុប20537497