ខុនដូ North Park ចុះកិច្ចព្រមព្រៀងជាមួយ CVEA ស្តីពី ការពង្រឹងដំណើរការផ្នែកលក់ សម្រាប់ភ្នាក់ងារដែលមានអាជ្ញាប័ណ្ណនៅកម្ពុជា
07-December-2015 | ដោយ មួយឡា
ភ្នំពេញ៖ នៅព្រឹកថ្ងៃទី ០៥ ខែវិច្ឆិកា ឆ្នាំ ២០១៥ ក្រុមហ៊ុន North Bridge Communities ដែលជាក្រុមហ៊ុនអភិវឌ្ឍន៍គម្រោង North Park Condominium បានចុះកិច្ចព្រមព្រៀងជាមួយ សមាគមអ្នកវាយតម្លៃ និងភា្នក់ងារអចលនវត្ថុកម្ពុជា ឬហៅកាត់ថា CVEA ស្តីពីការពង្រឹងដំណើរការផ្នែកលក់សម្រាប់ភ្នាក់ងារ ដែលមានអាជ្ញាប័ណ្ណនៅកម្ពុជា។ ម្យ៉ាងវិញទៀត គឺដោយសារការមើលឃើញ ផ្នែកសេវាកម្មអចលនទ្រព្យមានការរីកចម្រើន ភ្នាក់ងារអចលនទ្រព្យនឹងក្លាយជា កម្លាំងជម្រុញនៅពីក្រោយការលក់គម្រោងថ្មីៗ នៅកម្ពុជា។
North Park ជាខុនដូ ដែលមានការរចនាលក្ខណៈទំនើបទាន់សម័យ សំបូរបែបសម្រាប់អ្នកភ្នំពេញ ដែលចូលចិត្តរស់នៅបែបស៊ីវិល័យ និងទីប្រជុំជន ពោលគឺ North Park បានជ្រើសរើសទីតាំង ដែលមានបរិស្ថានស្រស់ស្រាយ ជាមួយនឹងការការពារសុវត្ថិភាពពេញ ២៤ម៉ោង ដោយលោកអ្នកអាចរស់នៅប្រកបដោយសុវត្ថិភាព និងភាពជឿជាក់។
បន្ថែមពីនេះ North Park ដែលជាគម្រោងអភិវឌ្ឍន៍លំនៅដ្ឋានមួយនេះ មានបន្ទប់គេងចំនួនចាប់ពី ២ ទៅ ៣បន្ទប់ ដែលមានទំហំចាប់ពី ៨៥ ទៅ ២៤៥ម៉ែត្រការ៉េ។ ក្នុងបរិវេណខុនដូនោះដែរ រួមផ្សំទាំង ផ្សារទំនើប ក្លឹបកំសាន្ត កន្លែងវាយកូនហ្គោល ភោជនីយដ្ឋាន អគារសិក្សា និងគម្រោងជាច្រើនទៀត ដែលកំពុងនឹងលេចឡើងជាបណ្ដើរៗ នាពេលខាងមុខនេះ។ ជាងនេះទៀត North Park បានជ្រើសរើសតំបន់ទីប្រជុំជន ដែលសំបូរដោយសកម្មភាពពាណិជ្ជកម្មជាតិ និងអន្តរជាតិ ជាមួយនឹងប្រព័ន្ធធារាសាស្ត្រ និងហេដ្ឋារចនាសម្ព័ន្ធគ្រប់គ្រាន់ ក្នុងការបង្កនូវបរិយាកាស ភាពងាយក្នុងការធ្វើដំណើរ ក៏ដូចជាការរស់នៅផងដែរ។
បើតាមប្រសាសន៍របស់លោក គីម ហុក ភ្នាក់ងារផ្នែកលក់របស់ ខុនដូ North Park បានប្រាប់ឲ្យដឹងថា រហូតទល់នឹងពេលបច្ចុប្បន្នគម្រោងអគារខុនដូ North Park លក់ឲ្យទៅអតិថិជនអស់ប្រហែលជា ៧០ភាគរយហើយ។
គួរជម្រាបថា សមាគមអ្នកសាងសង់កម្ពុជា នាពេលបច្ចុប្បន្នមានសមាជិកប្រមាណជា ១១០ក្រុមហ៊ុនក្នុងនោះមានក្រុមហ៊ុនប្រកបអាជីវកម្មសិក្សាគម្រោង ប្លង់ ក្រុមហ៊ុនសាងសង់ ក្រុមហ៊ុនសម្ភារៈ បរិក្ខារ ឧបករណ៍ គ្រឿងចក្រសំណង់គ្រប់ប្រភេទ ក្រុមហ៊ុនអចលនទ្រព្យ រោងចក្រផលិតបេតុង ក្រុមហ៊ុនដំឡើងប្រព័ន្ធអគ្គិសនី ទឹក ម៉ាស៊ីនត្រជាក់ កាមេរ៉ាសុវត្ថិភាព ក្រុមហ៊ុនដឹកជញ្ជូនសម្ភារៈសំណង់ និងក្រុមហ៊ុនផ្សេងៗទៀត ដែលក្រុមហ៊ុនទាំងនោះមកពីតំបន់អឺរ៉ុប និងអាស៊ី។
គូសបញ្ជាក់ថា គម្រោងសាងសង់ខុនដូ North Park ជាគម្រោងអភិវឌ្ឍន៍ថ្មីមួយ របស់ក្រុមហ៊ុន Northbridge ដែលជាក្រុមហ៊ុនអចលនទ្រព្យលំនៅដ្ឋានមួយ របស់ក្រុមហ៊ុនរ៉ូយ៉ាល់គ្រុប នៅប្រទេសកម្ពុជា។ ក្រៅពីនេះក្រុមហ៊ុន Northbridge ក៏បានអភិវឌ្ឍន៍រួចហើយនូវ អគារសិក្សាដែលមានឈ្មោះថា Northbridge International ដែលជាសាលាអន្តរជាតិលំដាប់ថ្នាក់លេខ ១ នៅកម្ពុជា ដែលកម្រិតអប់រំខ្ពស់ និងមានគុណភាព។ ទន្ទឹមនឹងនេះ Northbridge International មានរៀបចំផ្ទៃដីប្រមាណ ១៣ហិកតា សម្រាប់ជាកន្លែងសម្រាប់កម្សាន្តកុមារ កន្លែងវាយកូនហ្គោល និងបូករួមទាំងកន្លែងហែលទឹកផងដែរ៕
ប្រភព៖ businesscambodia
ចំនួនអ្នកទស្សនា
- ថ្ងៃនេះ3781
- ម្សិលមិញ20231
- សប្តាហ៍នេះ82861
- ខែនេះ104741
- ឆ្នាំនេះ104741
- សរុប20547197