ហាងនំប៉័ង Tous Les Jours ផ្តល់កាដូជានំខេក និងនំប៉័ងដល់កុមារកំព្រាជាង២០០នាក់
28-December-2015 | ដោយ មួយឡា
ក្នុងឱកាសបុណ្យគ្រីស្ទម៉ាស កាលពីពេលថ្មីៗនេះ ហាងនំប៉័ងTous Les Jours បានផ្តល់ជាអំណោយនំខេក និងនំប៉័ងដល់កុមារកំព្រា និងកុមារអនាថាតាមចិញ្ចើមថ្នល់ជាង២០០នាក់នៅ អង្គការផ្ទះបាយកុមារ ជាអង្គការដែលទទួលផ្តល់ជាអាហារ កន្លែងសម្រាក ការអប់រំ ដល់កុមារទាំងនោះស្ថិតនៅខណ្ឌចំការមន រាជធានីភ្នំពេញ។
នេះជាកម្មវិធីសប្បុរសធម៌របស់ហាងនំប៉័ង Tous Les Jours ដែលហៅថាការចូលរួមបង្កើតគម្រោងសប្បុរសធម៌សម្រាប់ថ្ងៃបុណ្យគ្រីស្ទម៉ាស ។ គម្រោងកម្មវិធីសប្បុរសធម៌របស់ហាងនំប៉័ង Tous Les Jours សម្រាប់ថ្ងៃបុណ្យគ្រីស្ទម៉ាស ធ្វើឡើងក្នុងគោលបំណងឲ្យអ្នកដែលមានបណ្តាញហ្វេសបុករបស់ផេក Tous Les Jours អាចមានឱកាសចូលរួមកម្មវិធីសប្បុរសធម៌ ដោយការចូលរួមផ្តល់យោបល់ថាតើ Tous Les Jours គួរតែផ្តល់កាដូដល់ស្ថាប័ន ឬអង្គការណាដែលមានកុមារខ្វះភាពកក់ក្តៅ និងកុមារអនាថាឬកំព្រាដែល មិនមានការលទ្ធភាពទទួលការផ្គត់ផ្គង់គ្រប់គ្រាន់ដូចកុមារទូទៅសម្រាប់ ទិវាបុណ្យគ្រីស្ទម៉ាស។
គម្រោងនេះបានប្រកាសធ្វើឡើងតាំងពីថ្ងៃទីមួយខែធ្នូ រហូតដល់ថ្ងៃទី២១ធ្នូ ក្នុងទំព័រហ្វេកបុករបស់ Tous Les Jours (Tous Les Jours-Cambodia/facebook) ដោយឲ្យអ្នកដែលគាំទ្រទំព័រហ្វេកបុករបស់ Tous Les Jours ចូលរួមផ្តល់មតិយោបល់ ប្រសិនជាហាងនំប៉័ង Tous Les Jours ផ្តល់អំណោយជាកាដូសម្រាប់ថ្ងៃបុណ្យគ្រីស្ទម៉ាស ថាតើអំណោយនោះគួរតែផុ្តល់ទៅឲ្យអ្នកណាសម្រាប់ឱកាសថ្ងៃគ្រីស្ទ ម៉ាសនេះ។
កុមារជាច្រើនរយនាក់ គឺជាកុមារក្រីក្រយ៉ាងពិតប្រាកដ ដែលខ្លះរស់នៅតំបន់អនាធិបតេយ្យ ខ្លះរើសសំរាមតាមផ្សារ តាមកន្លែងសាធារណៈផ្សេងៗ ខ្លះជាកុមារអនាថា ខ្លះជាកុមារកំព្រា កុមារខាត់ស្បែកជើងតាមចិញ្ចើមថ្នល់ ឬហាងគុយទាវ ខ្លះជាកុមារដែលរស់នៅតំបន់សំរាមស្ទឹងមានជ័យ និងខ្លះទៀតកុមារដែលជូតកញ្ចក់ឡានតាមសាធារណៈ និងតាមវត្តអារាមក្តីមិនដែលទទួលបានភាពកក់ក្តៅ និងការគាំទ្រដូចកុមារដទៃទូទៅនោះទេ។
លោក ង៉ូវ ឈីវ ប្រធានអង្គការផ្ទះបាយកុមារបានមានប្រសាសន៍ថា៖ «អង្គការផ្ទះបាយកុមារ ជាអង្គការមួយដែលស្វែងរកជំនួយសប្បុរសធម៌ដោយខ្លួនឯង សម្រាប់ផ្តត់ផ្គង់ជាអាហារ កន្លែងសម្រាក និងការអប់រំដល់ក្មេងៗទាំងនោះ។ ក្មេងអនាថា និងកំព្រាប្រមាណ២០០ទៅ២៥០នាក់ តែងតែមកទទួលការបរិភោគនៅអង្គការផ្ទះបាយកុមារជារៀងរាល់ថ្ងៃ។ ទន្ទឹមនឹងបានទទួលចំណីអាហារ កុមារទាំងអស់ត្រូវងូតទឹកសម្អាតខ្លួនប្រាណ ស្នាក់អាស្រ័យពេលថ្ងៃ លាងដៃមុនញ៉ាំអាហារ កាត់ក្រចកដៃក្រចកជើង កាត់សក់ អានសៀវភៅ មើលទូរទស្សន៍ មិនតែប៉ុណ្ណោះពួកគេក៏មានឱកាសទទួលការអប់រំទូទៅ និងសិល្បៈផងដែរ។ លោកបន្តទាំងអួលដើមកទៀតថា ក្មេងដែលភាគច្រើននៅទីនេះគឺភាគច្រើនជាអ្នករកលុយចិញ្ចឹមឪពុកម្តាយ រឺបងប្អូនហើយក្មេងៗទាំងនេះគ្មានពេលវេលាគ្រប់គ្រាន់ដើម្បីរៀនសូត្រ ។
ការស្វះស្វែង ការខិតខំប្រឹងប្រែងរបស់អង្គការតែឯង មិនបានជួយដល់កុមារកំព្រា និងអនាថាទាំងនោះ ឲ្យបានភាពកក់ក្តៅ និងការគាំទ្រទាំងស្រុងនោះទេ។ កុមារទាំងនេះ ត្រូវការយ៉ាងចាំបាច់ នូវការជួយគាំទ្រទាំងស្មារតី សម្ភារ និងថវិកា ពីសប្បុរជនជាតិ និងអន្តរជាតិបន្ថែមទៀត។
ដោយឡែកហាងនំប៉័ងTous Les Jours តែងតែស្វាគមន៍ និងចូលរួមរាល់គ្រប់កម្មវីធីសប្បុរសធម៌ជាពិសេស កម្មវិធីដែលជួយផ្គត់ផ្គង់ដល់កុមារក្រីក្រ និងកុមារអនាថា ត្បិតថាមិនបានជួយបានទាំងអស់ក៏ពិតមែន តែនេះជាការចូលរួមមួយចំណែកតូចក្នុងការផ្តត់ផ្គង់កុមារដែល ក្រីក្រពិតប្រាកដ និងកុមារអនាថាជាដើម៕
ប្រភព៖ thmeythmey
ចំនួនអ្នកទស្សនា
- ថ្ងៃនេះ601
- ម្សិលមិញ4831
- សប្តាហ៍នេះ601
- ខែនេះ5441
- ឆ្នាំនេះ790071
- សរុប21232527