ជិះកង់មកពិនិត្យសុខភាព ខ្វះលុយ៥ពាន់រៀល គ្រូពេទ្យប្រាប់ថាលុយអត់គ្រប់ពិនិត្យអត់កើត
05-January-2016 | ដោយ មួយឡា
កំពង់ឆ្នាំង៖ បុរសម្នាក់ដែលមានទឹកមុខស្លេកស្លាំង បានជិះកង់ពីភូមិចំការឃ្លៃ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ដែលមានចំងាយផ្លូវរាប់គីឡូ សំដៅមកមន្ទីរពេទ្យបង្អែកខេត្តកំពង់ងឆ្នាំង ដើម្បីពិនិត្យសុខភាព កាលពីព្រឹកថ្ងៃទី៤ ខែមករា ឆ្នាំ២០១៦ ។
នៅនឹងដៃកង់របស់បុរសនេះមានថង់មួយដាក់ប័ណ្ណសមធម៌ សម្រាប់សម្គាល់អត្តសញ្ញាណគ្រួសារក្រីក្រ ប្រភេទលេខ១ ។
បុរសរូបនេះបានប្រាប់អោយដឹងថា គាត់ឈ្មោះ លឹម វណ្ណដារ៉ា រស់នៅភូមិចំការឃ្លៃ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង កន្លងមកគាត់គឺជាងកងទ័ពបម្រើការងារនៅ ង៧០ ។ គាត់មកមន្ទីរពេទ្យបង្អែកខេត្តនេះជាលើកទី២ហើយ កាលពីលើកមុនគាត់បានកាន់ប័ណ្ណសមធម៌នេះដើម្បីពិនិត្យសុខភាពនៅមន្ទីរពេទ្យបង្អែកខេត្តដែរ ហើយកាលនោះក្រុមគ្រូពេទ្យបានអោយបង់ថវិកាចំនួន១ម៉ឺនរៀលដើម្បីបានពិនិត្យសុខភាព ។ ប៉ុន្តែនៅព្រឹកថ្ងៃ៤ ខែមករានេះគាត់មកពេទ្យម្តងទៀត ដើម្បីពិនិត្យសុខភាព ព្រោះរូបគាត់ចេះតែ អស់កម្លាំង ហេវហត់ និង ឈាមច្រមុះ ដើម្បីបានថ្នាំព្យាបាល ។
បុរសរូបនេះបានប្រាប់ទាំងអារម្មណ៍ហាក់បីដូចជាមិនសូវស្រួលខ្លួនទៀតថា ថ្ងៃនេះគាត់ខំជិះកង់មកពីឆ្ងាយមកពេទ្យសង្ឃឹមថា គាត់បានពិនិត្យសុខភាព និង បានព្យាលបាល ដូចលើកមុនទៀត តែអ្វីដែលរំពឹងទុកនោះវាបានធ្វើអោយគាត់រឹតតែមានអារម្មណ៍ក្តុកក្តួល យ៉ាងពន់ពេក នៅពេលចូលទៅដល់មន្ទីរពេទ្យបង្អែកខេត្តកំពង់ឆ្នាំង ទៅដល់កន្លែងជួបពិគ្រោះដំបូងជាមួយគ្រូពេទ្យ គាត់បានប្រាប់គ្រូពេទ្យថា គាត់ចេះតែអត់កំលាំង ហេវហត់ និង មានអាការៈឈាមច្រមុះ បន្ទាប់គាត់បានបង្ហាញប័ណ្ណសមធម៌ ប្រភេទលេខ១ ពេលនោះគ្រូពេទ្យបានប្រាប់គាត់ថា ប័ណ្ណតម្រូវអោយអ្នកជំងឺ បង់សេវាចំនួន១ម៉ឺនរៀល ប៉ុន្តែពេលនោះគាត់ប្រាប់មានតែ៥ពាន់រៀលទេ ជួយពិនិត្យអោយគាត់ផង ព្រោះគាត់អត់មានលុយទេ ពេលនោះពេទ្យប្រាប់គាត់ថា អត់បានទេទាល់តែគ្រប់ចំនួន១ម៉ឺនរៀល ។
ដោយអស់សង្ឃឹមគាត់បានអូសកង់ត្រឡប់មកវិញ មកមន្ទីរព័ត៌មានខេត្តកំពង់ឆ្នាំងដើម្បីសុំអោយជួយគាត់ និង និយាយប្រាប់អោយគេបានលឺផង ។
គាត់បាននិយាយថា ជិវិតអ្នកក្រគឺបែបនេះឯង នៅពេលមានជំងឺខ្វះតែ៥ពាន់រៀលក៏ស្លាប់បានដែរ គាត់ធ្លាប់បម្រើការងារជាកងទ័ពជួបរាល់ឧបសគ្គនៅក្នុងសមរភូមិ តែមិនដែលរុញរា និង តក់ស្លុតនោះទេ ទើបតែពេលនេះគាត់មានអារម្មថាភ័យនិងតក់ស្លុតយ៉ាងខ្លាំង នៅពេលដែលគ្រូពេទ្យប្រាប់ថា លុយរបស់គាត់មិនគ្រប់សម្រាប់បង់សេវាពិនិត្យសុខភាពនោះ ហើយខ្វះតែ៥ពាន់រៀលប៉ុណ្ណោះ ។ គាត់សូមអោយអ្នកសប្បុរសមេត្តាជួយគាត់ផងពេលនេះគ្មានសង្ឃឹមអ្វីទៀតទេ ព្រោះជំងឺចេះតែយាយីរូបគាត់ ហើយលុយក៏គ្មានសម្រាប់ព្យាបាលទៀត៕
ប្រភព៖ rosemag
ចំនួនអ្នកទស្សនា
- ថ្ងៃនេះ10001
- ម្សិលមិញ14181
- សប្តាហ៍នេះ10001
- ខែនេះ125151
- ឆ្នាំនេះ125151
- សរុប20567607