គូស្វាមីភរិយាជួបគ្នាសម័យប៉ុលពត៨០០គូ ប្រារព្ធខួបអាពាហ៍ពិពាហ៍លើកដំបូង នៅជាយដែនស្រុកម៉ាឡៃ
06-January-2016 | ដោយ មួយឡា
បន្ទាយមានជ័យ៖ គូស្វាមីភរិយាដែលបានយកគ្នាជា ប្តីប្រពន្ធ តាមការចាត់តាំងរបស់អង្គការនាសម័យប៉ុលពតនោះ បានជួបជុំគ្នាប្រារព្ធខួបអាពាហ៍ពិពាហ៍ របស់ខ្លួនជាលើកដំបូងនាថ្ងៃទី0៥ ខែមករា ឆ្នាំ២០១៦ នៅជាយដែនកម្ពុជា-ថៃ ក្នុងបរិវេណវិទ្យាល័យម៉ាឡៃ ស្រុកម៉ាឡៃ ខេត្តបន្ទាយមានជ័យ ដើម្បីបង្ហាញពីក្តីស្រឡាញ់ និងសន្តិភាពទៅកាន់ពិភពលោក។
ពិធីនេះត្រូវបានរៀបចំឡើង ដោយអង្គការសហពន្ធ័សន្តិភាពសកលកម្ពុជា (Universal Peace Federation Cambodia) ដោយមានការអញ្ជើញចូលរួមពីឯកឧត្តម សួន បវរ អភិបាលរងខេត្តបន្ទាយមានជ័យ លោក ហ៊ុត ហេន នាយកសាខា UPF-BTB នាយឧត្តមសេនីយ៍ សុខ ភាព ទីប្រឹក្សាក្រសួងការពារជាតិ លោក អែម សុខា អភិបាលស្រុកម៉ាឡៃ និងមានការចូលរួមពីគូស្វាមីភរិយាចំនួន៨០០គូ ព្រមទាំងសាច់ញាតិបងប្អូនជាច្រើននាក់ផងដែរ។
ឯកឧត្តម សួន បវរ បានឲ្យដឹងថាយើងប្រារព្ធធ្វើពិធីនេះឡើងក្នុងគោលបំណង ដើម្បីរំលឹកអនុស្សាវរីយ៍ ពីអតីតកាលនិងអប់រំក្រុមគ្រួសារដែលជាសមាជិកសង្គម ឲ្យមានការគោរពស្រឡាញ់គ្នាស្មោះត្រង់រវាងគ្នា ចាប់ដៃគ្នា កសាងសុភមង្គលគ្រួសារក្រោមច្បាប់ស្តីពីឯកពន្ធភាពក្នុងន័យ «សន្តិភាពផ្តើមចេញពីគ្រួសារ»។
ឯកឧត្តមបានបន្តថា គូស្វាមីភរិយាចំនួន៨០០គូ ជាអតីតទាហាននិងប្រជាជននៅតំបន់អតីតខ្មែរក្រហមម៉ាឡៃ ស្រុកម៉ាឡៃខេត្តបន្ទាយមានជ័យ បានចូលរួមពីធីរំលឹកអនុស្សាវរីយ៍ ដែលខ្លះបានចាប់ដៃគ្នាក្នុងគ្រាកំសត់ជាប្តីប្រពន្ធនឹងគ្នា ខ្លះបានសំពះផ្ទឹមរៀបការនោះ បានមូលមាត់គ្នាចូលរួមពីធីរំលឹកអនុស្សាវរីយ៍ទ្រង់ទ្រាយធំនិងលើកដំបូងផងដែរ។
ឯកឧត្តមបានលើកឡើងថា រយៈពេល៣៧ឆ្នាំកន្លងទៅ ផ្ដើមចេញពីជ័យជំនះ៧មករាប្រជាជនកម្ពុជាបានសម្រេច នូវការផ្លាស់ប្ដូរសង្គមយ៉ាងធំធេងដែលគ្មានអ្នកណាអាចនឹកស្មានដល់ ជាពិសសទឹកដីកម្ពុជាយើង ក្លាយជាប្រទេសជាតិមួយមានសុខសន្តិភាព សេរីភាពឯកភាព ស្ថិរភាព និងការអភិវឌ្ឍលើគ្រប់វិស័យធ្វើឲ្យជីវភាពប្រជាជន ត្រូវបានលើកកម្ពស់ឥតឈប់ឈរ៕ ដោយ មែន កំសត់
ចំនួនអ្នកទស្សនា
- ថ្ងៃនេះ9341
- ម្សិលមិញ14181
- សប្តាហ៍នេះ9341
- ខែនេះ124491
- ឆ្នាំនេះ124491
- សរុប20566947