CPP រៀបចំសន្និបាតគណៈកម្មាធិការកណ្តាលលើកទី៣៩ ផ្តោតលើបីចំណុច
09-January-2016 | ដោយ មួយឡា
ភ្នំពេញ៖ សន្និបាតគណៈកម្មាធិការកណ្តាល លើកទី៣៩ របស់គណកប្សប្រជាជនកម្ពុជា(CPP) នឹងត្រូវប្រារព្វធ្វើឡើងនៅមជ្ឈមណ្ឌល ពិព័រណ៍ និងសន្និបាតកោះពេជ្ររយៈពេល២ថ្ងៃចាប់ពីថ្ងៃទី០៩-១០ ខែមករា ឆ្នាំ២០១៦នេះ ដោយក្នុងនោះ ផ្តោតលើបីចំណុចគឺទំនាស់ដីធ្លី ពង្រឹងស្មារតីសមាជិកបក្សនិងបញ្ចូលសមាជិកវ័យក្មេងថ្មីៗដើម្បីត្រៀមខ្លួនសំរាប់ការបោះឆ្នោត ឃុំសង្កាត់ ឆ្នាំ២០១៧។
លោកសុខ ឥសាន្ត អ្នកនាំពាក្យគណបក្សប្រជាជនកម្ពុជា បានមានប្រសាសន៍ កាលពីព្រឹកថ្ងៃទី០៨ ខែមករា ឲ្យដឹងថា សន្និបាតគណៈកម្មាធិការកណ្តាល លើកទី៣៩ អាណត្តិទី៥ របស់គណបក្សប្រជាជនកម្ពុជា គឺទី១.អានរបាយការណ៍សភាពការណ៍នយោបាយ និងដាក់ទិសដៅសម្រាប់រយៈពេលខាងមុខ។ទី២.ពិភាក្សាគ្នាលើរបាយការណ៍ នយោបាយ និងទី៣.ស្តាប់ការណែនាំរបស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា។
តែឆ្លើយតបនឹងសំណួររបស់ វិទ្យុមួយ អ្នកនាំពាក្យដដែលបាននិយាយថា សន្និបាតគណៈកម្មាធិការកណ្តាល លើកទី៣៩ ផ្តោតលើចំណុច៣ គឺទំនាស់ដីធ្លីពង្រឹងស្មារតីសមាជិកបក្សនិងបញ្ចូលសមាជិកវ័យក្មេង ថ្មី សំដៅត្រៀមខ្លួនសំរាប់ការចូលរួមបោះឆ្នោតឃុំសង្កាត់ ឆ្នាំក្រោយ។
លោកបានមានប្រសាសន៍ដូច្នេះថា "យើងរៀបចំធ្វើជាលក្ខណៈបើកទូលាយ។ ដូច្នេះគណបក្សសម្រេចអញ្ជើញថ្នាក់អភិបាលស្រុកខណ្ឌ និងថ្នាក់មូលដ្ឋានមួយចំនួនមកស្តាប់ខ្លឹមសារសន្និបាតផ្ទាល់តែម្តង ដើម្បីកុំឲ្យពិបាកក្នុងការផ្សព្វផ្សាយនៅក្រោយសន្និបាត។ ម្យ៉ាងទៀតពួកគាត់ ក៏អាចលើកឡើងនូវបញ្ហានានាដែលទាក់ទងនឹងការបម្រើប្រជាជនផងដែរ"។
សន្និបាតនឹងមានអ្នកចូលរួមប្រមាណ១០០០នាក់។ អ្នកចូលរួមត្រូវលើសពីចំនួនសមាជិកគណៈកម្មាធិការកណ្តាលដែលមាន៥៤៥ នាក់ ដោយសារថ្នាក់ដឹកនាំអាជ្ញាធរខណ្ឌ-ស្រុក និងថ្នាក់មូលដ្ឋានមួយចំនួន ក៏ត្រូវអញ្ជើញឲ្យមកស្តាប់ខ្លឹមសារនៃសន្និបាតនេះដោយផ្ទាល់ដែរ៕
ប្រភព៖ rasmeinews
ចំនួនអ្នកទស្សនា
- ថ្ងៃនេះ3621
- ម្សិលមិញ12101
- សប្តាហ៍នេះ15731
- ខែនេះ130881
- ឆ្នាំនេះ130881
- សរុប20573337