ឯកឧត្តម ខៀវ កាញារីទ្ធ ចុះសាកសួរសុខទុក្ខ ផ្ដល់សំភារៈថវិកាដល់អតីតគ្រូបង្រៀន នៅវិទ្យាល័យជីហែ
25-January-2016 | ដោយ មួយឡា
កំពង់ចាម៖ នាថ្ងែទី២៣ ខែមករា ឆ្នាំ២០១៦ បន្ទាប់ពីការចូលរួមសំណេះសំណាលជាមួយមន្ត្រីរាជការ នៅសាលាស្រុកកោះសូទិន ខេត្តកំពង់ចាម ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាននិង ប្រធានក្រុមការងារចុះជួយស្រុកកោះសូទិនបានឆ្លៀតឱកាសចូលរួមសួរសុខទុក្ខចំពោះលោកគ្រូ សាង សាន ដែលបង្រៀននៅវិទ្យាល័យជីហែ ឃុំពាមប្រធ្នោះ ស្រុកកោះសូទិន ខេត្តកំពង់ចាម បច្ចុប្បន្នកំពុងមានជំងឺលើសឈាម។
ពិធីសំណេះសំណាលនោះក៏មានការចូលរួមពីលោក ផេន សុផល អភិបាលស្រុកកោះសូទិន លោក ហេង ហ៊ុន ប្រធានក្រុមប្រឹក្សាស្រុក មន្ត្រីសាលាស្រុក មេឃុំពាមប្រធ្នោះ និងមន្ត្រីដែលពាក់ព័ន្ធជាច្រើនរូបទៀត។
នាឱកាសនោះដែរ ឯកឧត្តមរដ្ឋមន្ត្រីក្រសួងព័ត៌មានបានសំដែងនូវក្ដីអាណិតចំពោះលោកគ្រួ សាង សាន ហើយសូមកោតសរសើរសកម្មភាពរបស់លោកគ្រូនាពេលកន្លងមកបានបំពេញការងារក្នុងនាមជាគ្រូប្រកបដោយវិជ្ជាជីវៈខ្ពស់ លះបង់តស៊ូដើម្បីបង្រៀនសិស្សានុសិស្ស និងអប់រំសិស្សអោយក្លាយជាមនុស្សល្អក្នុងសង្គម។ គួរបញ្ជាក់ផងដែរថា ស្ថានភាពលោកគ្រូ សាង សាន នាពេលនេះមានសភាពធូរស្បើយច្រើនហើយ តែកំពុងនៅព្យាបាលបន្ត បន្ទាប់មកឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មានបានឧបត្តម្ភ ថវិកាចំនួន២០០ដុល្លា និង គ្រឿងឧបភោគបរិភោគមួយចំនួនទៀត។ ឯកឧត្តមបានសន្យាចេញថ្លៃរាល់ការចំណាយ ព្យាបាលជំងឺលោកគ្រូ សាង សាន ឲ្យជាសះស្បើយ ហើយនិងសាងសង់បង្គន់អនាម័យជូនលោកគ្រូសំរាប់ប្រើប្រាស់ទៀតផង។
តំណាងគ្រួសាររួមទាំងលោកគ្រូ សាង សាន មានក្ដីត្រេកអរនិងថ្លែងអំណរគុណចំពោះឯកឧត្តមនិងក្រុមការងារក្រសួងក៏ដូចជាលោកអភិបាលស្រុក រួមទាំងអាជ្ញាធរឃុំ ភូមិទាំងអស់ដែលបានយកចិត្តទុកដាក់និងឧបត្តម្ភដល់គ្រួសារគាត់ដែលកំពុងជួបការខ្វះខាតថវិកាក្នុងការព្យាបាលជំងឺ និងសូមជូនពរឲ្យក្រុមការងារគ្រប់ស្ថាប័នជួបប្រទះតែសេចក្ដីសុខ និងឈ្នះមារសត្រូវដើម្បីរួមគ្នាដឹកនាំមូលដ្ឋានស្រុករីកចំរើនតទៅអនាគត។
បន្តមកទៀត នៅល្ងាចថ្ងៃទី២៤ ខែមករា ឆ្នាំ២០១៦ លោក ផេន សុផល អភិបាលស្រុកកោះសូទិន រួមដំណើរ មន្ត្រីសាលាស្រុក ក្រុមប្រឹក្សាឃុំពង្រ បាននាំយកថវិការបស់ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាននិងជាប្រធានក្រុមការងារថ្នាក់កណ្ដាលចុះជួយស្រុកកោះសូទិន ចំនួន២០០ដុល្លា រួមជាមួយថវិកាអតីតសិស្សដែលធ្លាប់រៀនក្នុងទស្សវត្យទី៨០និងទី ៩០ ចំនួន៣០០ដុល្លា។ ជាមួយគ្នានេះ ថវិកា២,២៤០,០០០រៀល ជាថវិកានៃការរួបរួមប្រមូលគ្នារបស់សប្បុរសជន យកទៅចូលរួមបុណ្យសពលោកគ្រូ ជឹម វ៉ាត អតីតគ្រូបង្រៀននៅវិទ្យាល័យជីហែ ស្រុកកោះសូទិន ដែលបានទទួលមរណភាពនាពេលថ្មីៗនេះ ដោយរោគាពាធ ស្ថិតនៅក្នុងភូមិប៉ាក់ណាម ឃុំពង្រ ស្រុកកោះសូទិន ខេត្តកំពង់ចាម។
ក្នុងនាមលោកអភិបាលក៏ដូច ជាតំណាងឲ្យឯកឧត្តម ខៀវ កាញារីទ្ធ សូមចូលរួមសោកស្ដាយនូវមរណទុក្ខដ៏ក្រៀមក្រំ ជូនចំពោះគ្រួសារលោកគ្រូ ជឹម វ៉ាត ដែលលោកគ្រូបានបង្ហាត់បង្រៀនសិស្សតស៊ូគ្រប់បែបយ៉ាង គឺជាគ្រូដ៏ល្អសំរាប់សិស្សដែលធ្លាប់រៀននៅវិទ្យាល័យជីហែកន្លងមក ។
លោកអភិបាលក៏សូម ថ្លែងអំណរគុណយ៉ាងជ្រាលជ្រៅចំពោះឯកឧត្ដមនិងលោកជំទាវ លោក លោកស្រីមិត្តភក្តិទាំងអស់ដែលមានសទ្ធាជ្រះថ្លាចូលបុណ្យគំរប់៧ថ្ងៃលោកគ្រូ ជឹម វ៉ាត និងសូមជូនពរសព្វសាធុកាកើតមានដល់ លោក លោកស្រីគ្រប់សប្បុរសជនទាំងអស់ និងសមប្រកបបានតែសេចក្ដីសុខគ្រប់ប្រការកុំបីឃ្លៀងឃ្លាតឡើយ៕ ដោយមែនកំសត់
ចំនួនអ្នកទស្សនា
- ថ្ងៃនេះ4421
- ម្សិលមិញ11441
- សប្តាហ៍នេះ34251
- ខែនេះ149401
- ឆ្នាំនេះ149401
- សរុប20591857