ភ្នំពេញ​៖ សហគមន៍​កសិកម្ម​ស​ង្ហា​ផល​ខេត្តបាត់ដំបង​ទទួលបាន​ពានរង្វាន់​ស្រូវ​ល្អ​ ជាងគេ​នៅក្នុង​ប្រទេស​កម្ពុជា ប្រចាំឆ្នាំ​២០១៦ ក្នុងការ​ប្រកួតប្រជែង​រក​ម្ចាស់​ពានរង្វាន់​ស្រូវ និង​អង្ករ​ល្អ​ប្រណិត​ជាងគេ​របស់​ប្រទេស​កម្ពុជា ដែល​រៀបចំឡើង​ដោយ​សហព័ន្ធ​ស្រូវ​អង្ករ​កម្ពុជា (Cambodia Rice Federation) សហការ​ជាមួយ​សម្ព័ន្ធ សមាគម​សហគ្រាស​ធុន​តូច និង​មធ្យម​កម្ពុជា (Federation of Association for Small and Medium Enterprise of Cambodia)​។

គណៈកម្មការ​វាយតម្លៃ​ស្រូវ​អង្ករ​ កម្ពុជា​បានជ្រើសរើស​ប្រភេទ​ស្រូវ​អង្ករ​ជាង ៧០ មកពី​តាម​ក្រុមហ៊ុន និង​សហគមន៍​នៅ​ទូទាំងប្រទេស ឲ្យ​ចូលរួម​ប្រកួត​វគ្គ​ផ្តាច់​ព្រ័​ត្ត ក្នុង​ពិធី​អបរ​អរសាទរ​បុណ្យ​ស្រូវ​អង្ករ​កម្ពុជា លើក​ទី​៥ នៅ​ថ្ងៃទី​២៤ ខែមករា ឆ្នាំ​២០១៦​នេះ នៅ​សណ្ឋាគារ​សុខា​ភ្នំពេញ​។ បន្ទាប់ពី​គណៈកម្មការ​ពិនិត្យ​វាយតម្លៃ​រួច ក្រុមហ៊ុន និង​សហគមន៍​ចំនួន ៥ បានទទួល​ពានរង្វាន់​ស្រូវ​ល្អ និង​អង្ករ​ប្រណិត​កម្ពុជា​ប្រចាំឆ្នាំ​២០១៦ រួមមាន ទីមួយ​ សហគមន៍​កសិកម្ម​ស​ង្ហា​ផល​ខេត្តបាត់ដំបង បានទទួល​ពានរង្វាន់ ស្រូវ​ល្អ​ប្រចាំឆ្នាំ ទី​ពីរ​ ក្រុមហ៊ុន Signature of Asia ខេត្តព្រះវិហារ ទទួលបាន​ពានរង្វាន់​អង្ក​រស​គ្រាប់​វែង ទី​បី​ ក្រុមហ៊ុន AMRU Rice (Cambodia) Co., Ltd. ទទួល​ពានរង្វាន់​អង្ករ​ចំហុយ ទី​បួន ក្រុមហ៊ុន Hung Hiep (Cambodia) Co., Ltd. បានទទួល​ពានរង្វាន់​អង្ករ​ក្រអូប​ធម្មតា និង​ទី​ប្រាំ​, ក្រុមហ៊ុន City Rice Import Export Co., Ltd បានទទួល​ពានរង្វាន់​អង្ករ​ក្រអូប​ប្រណិត​។​

លោក និល សុភាព ប្រធាន​ក្រុមប្រឹក្សាភិបាល​សហព័ន្ធ​អង្គការ​កសិករ​កម្ពុជា ដើម្បី​អភិវឌ្ឍន៍ (​ស​.​អ​.​ក​.​អ​) និង​ជា​តំណាង​សហគមន៍​កសិកម្ម​សង្ហា​ផល​ខេត្តបាត់ដំបង មាន​អារម្មណ៍​រីករាយ​ជាខ្លាំង នៅពេល​សហគមន៍​រប​ស់លោក​ទទួលបាន​ពានរង្វាន​ស្រូវ​ល្អ​កម្ពុជា​ប្រចាំឆ្នាំ ២០១៦​។ លោក​និយាយថា ពានរង្វាន់​នេះ ជា​សមិទ្ធផល​មួយ​ដែល​សហគមន៍​របស់លោក​បាន​ខិតខំ​ប្រឹងប្រែង​សិក្សា​ ស្រាវជ្រាវ និង​ជ្រើសរើស​ពូជស្រូវ​ល្អ យកមក​ចូលរួម​ក្នុងការ​ប្រកួត​ឆ្នាំ ២០១៦ ។ លោក​ថ្លែង​យ៉ាង​ដូច្នេះ​ថា​៖«​សហគមន៍​យើង​ជាង ២០០​គ្រួសារ បាន​ពិសោធន៍​ជ្រើសរើស ពូជស្រូវ​រំដួល បាន​ចូលរួម​ប្រកួតប្រជែង ព្រោះ​ពូជស្រូវ​រំ​ដូ​ល​កម្ពុជា បាន​ជាប់​ពានរង្វាន់​ស្រូវ អង្ករ​លេខ​មួយ ថ្នាក់​ពិភពលោក​ក្នុង​ឆ្នាំ ២០១២ ២០១៣ និង​ឆ្នាំ​២០១៤»​។​

ក្នុង​វេទិកា​បុណ្យ​ស្រូវ​អង្ករ​ កម្ពុជា​លើក​ទី​៥​នេះ លោក សុខ ពុ​ទ្ធី​វុ​ធ ប្រធាន​សហព័ន្ធ​ស្រូវ​អង្ករ​កម្ពុជា បានស្នើ​ឲ្យ​រដ្ឋាភិបាល បង្កើត​គណៈកម្មការ​ចម្រុះ​មួយ ដើម្បី​ជួយ​ជ្រោមជ្រែង​ទាំង​ការចាប់ផ្តើម និង​ការអនុវត្ត​គម្រោង​ផ្សេងៗ ឲ្យ​កាន់តែ​ទទួលបាន​ជោគជ័យ​និង​មាន​ប្រសិទ្ធភាព​ខ្ពស់ ក្នុង​វិស័យ​ស្រូវ​អង្ករ​កម្ពុជា​។ លោក​ស្នើថា គណៈកម្មការ​នេះ គួរ​មាន​សមាសភាព​ពី​ក្រសួង​ពាក់ព័ន្ធ​ផ្សេងៗ ដូចជា ក្រសួង​សេដ្ឋកិច្ច និង​ហិរញ្ញវត្ថុ​, ក្រសួងពាណិជ្ជកម្ម​, ក្រសួងកសិកម្ម រុក្ខាប្រមាញ់ និង​នេសាទ​, ក្រសួង​ឧស្សាហកម្ម​និង​សិប្បកម្ម​, ក្រសួង​រ៉ែ​និង​ថាមពល​, ក្រសួង​សាធារណការ​និង​ដឹកជញ្ជូន​, ក្រសួង​ធនធានទឹក​និង​ឧតុនិយម​។

ប្រធាន​សហព័ន្ធ​ស្រូវ​អង្ករ​កម្ពុជា​ រូបនេះ​បានបញ្ជាក់​ដូច្នេះ​ថា លោក​យល់ថា នេះ​ជា​គំនិត​និង​វិធី​ដ៍​សំខាន់ ដើម្បី​ប្រមូលផ្តុំ​គ្រប់ភាគី​ពាក់​ពាក់ព័ន្ធ​ទាំងអស់​ឲ្យ​ឯកភាពគ្នា ទៅលើ​គំនិត​និង​គោលការណ៍​រួម ក្នុង​គោលបំណង​ធ្វើ​ឲ្យ​មានការ​សម្រេច​ចិត​ត្ត​និង​ទំនួល​ខុសត្រូវ​ ច្បាស់លាស់​៕

ប្រភព៖ thmeythmey