សម្ដេចក្រឡាហោម ស ខេង អញ្ជើញចូលរួមពិធីសម្ពោធឧបដ្ឋានសាលានិងសមិទ្ធផលនានាក្នុងវត្តបុទមស្វាយអន្ទរ
26-January-2016 | ដោយ មួយឡា
ព្រៃវែង៖ នាព្រឹកថ្ងៃទី២៥ ខែមករា ឆ្នាំ២០១៦ នៅទីអារាមវត្តបុទមស្វាយអន្ទរ ឃុំស្វាយអន្ទរ ស្រុកស្វាយអន្ទរ ខេត្តព្រៃវែង មានប្រារព្វពិធីសម្ពោធឧបដ្ឋានសាលានិងសមិទ្ធផលនានាក្នុងវត្តបុទមស្វាយអន្ទរ ក្រោមអធិបតីភាពដ៏ខ្ពង់ខ្ពស់ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងារថ្នាក់កណ្ដាលចុះជួយខេត្តព្រៃវែង។
ក្នុងពិធីនោះដែរក៏មានវត្តមានចូលរួមពី ឯកឧត្តម ស្បោង សារ៉ាត់ ប្រធានក្រុមប្រឹក្សាខេត្ត ឯកឧត្តម ជា សុមេធី អភិបាលនៃគណៈអភិបាលខេត្តព្រៃវែង ឯកឧត្តមលោកជំទាវជាសមាជិកក្រុមប្រឹក្សាខេត្ត អភិបាលរងខេត្ត កងកម្លាំងប្រដាប់អាវុធទាំងបី ក្រុមប្រឹក្សាស្រុក អភិបាលស្រុក មេឃុំ ក្រុមប្រឹក្សាឃុំ នាយប៉ុស្តិ៍ រដ្ឋបាលឃុំ រួមទាំងមន្ត្រីរាជការ ដែលបំរើការក្នុងស្ថាប័ស្រុកស្វាយអន្ទរ និងប្រជាពលរដ្ឋចូលរួមជាច្រើនកុះករផងដែរ។
ក្រោយពីបានស្ដាប់របាយការណ៍របស់លោកអភិបាលស្រុកស្វាយអន្ទរ ស្ដីពីដំណើរការនិងការសាងសង់សមិទ្ធផលនានានៅក្នុវវត្ត ប្រវត្តិត្រួសៗនៃការបង្កើតនិងការដាក់ឈ្មោះវត្តបុទមស្វាយអន្ទរ នាឱកាសនោះសម្ដេចក្រឡាហោម ស ខេង បានមានមតិនិងពាំនាំ នូវការសួរសុខទុក្ខរបស់ប្រមុខរដ្ឋាភិបាល ក៏ដូចជាថ្នាក់ដឹកនាំគណបក្សប្រជាជនកម្ពុជាជូនទៅកាន់បងប្អូននិងអ្នកចូលរួម។
សម្ដេចក៏បានលើកឡើងអំពីការអភិវឌ្ឍរបស់ប្រទេស ការធ្វើកំណែទម្រង់មន្ត្រីរាជការ គ្រប់ក្រសួងស្ថាប័នជាតិនិងថ្នាក់ក្រោមជាតិ ដោយយោងតាមអភិក្រមដ៏ខ្ពង់ខ្ពស់នៃគោលដៅអភិវឌ្ឃន៍ របស់រាជរដ្ឋាភិបាល ដែលជាអនុសាសន៍ស្ថាបនាដល់មន្ត្រីត្រូវតែប្រតិបត្តិតាមលើគោលការណ៍សំខាន់ៗ រួមមាន៖«ងូតទឹក ដុសក្អែល សំអាតកាយ ឆ្លុះកញ្ចក់និងព្យាបាលបើមិនជាសះ សង្គ្រោះបន្ទាន់» គោលការណ៍នេះក្រសួងមហាផ្ទៃដែលជាសេនាឲ្យប្រមុខរដ្ឋាភិបាលបានប្រតិបត្តិនិងបន្តការតាមដាននូវរាល់ចំណុចរបស់មន្ត្រី ដែលតែងតែប្រព្រឹត្តកំហុសឆ្គងផ្សេងៗ ហើយជាក់ស្ដែង នាពេលថ្មីៗនេះមានកើតករណី២សំខាន់ៗក្នុងខេត្ត គឺអភិបាលស្រុកពាមរក៏ ស្រវឹងស្រាបើកឡានបុកមនុស្សស្លាប់១ករណី និង១ករណីទៀតលោកអធិការស្រុកស្វាយអន្ទរបាញ់សំលាប់ប្រជាពលរដ្ឋ នៅកន្លែងជល់មាន់ ករណីនេះត្រូវបានតុលាការចាត់វិធានការទៅតាមច្បាប់រួចរាល់ជាស្ថាពរ ហើយខាងខេត្តក៏បានប្រមូលថវិការួបរួមគ្នាចូលបុណ្យដល់គ្រួសារនៃសពដែលរងគ្រោះតាមលទ្ធភាពដែលអាចធ្វើទៅបាន។
សម្ដេចក៏បានសំណូមពរដល់អាជ្ញាធរ គ្រប់លំដាប់ថ្នាក់មេត្តាបង្កើនការយកចិត្តទុកដាក់លើការអនុវត្តន៍គោលនយោបាយភូមិឃុំមានសុវត្ថិភាព ដើម្បីធានាបានសន្តិសុខសណ្ដាប់ធ្នាប់ក្នុងមូលដ្ឋានឲ្យបានប្រសើរ ពិសេសសម្ដេចសំណូមពរយ៉ាងទទូចដល់លោកមេឃុំ ស្មៀន មេភូមិ នគរបាលប៉ុស្តិ៍ មេត្តាបង្កើនលើការផ្ដល់សេវារដ្ឋបាលឯកសារនានាជូនប្រជាពលរដ្ឋឲ្យបានដិតដល់ ដោយអនុវត្តន៍តាមច្បាប់នៃការបង់កម្រៃសេវា ជៀសវាងការរិះគន់ ព្រោះថា សម្ដេចតេជោបានទទួលព័ត៌មានច្រើនណាស់លើភាពមិនប្រក្រតីលើការបំរើសេវានេះ គឺទារលុយលើសច្បាប់មិនឲ្យបង្កាន់ដៃ ដោយបងប្អូនគាត់ផ្ដល់តាមរយៈហ្វេសបុក ពិសេសនៅតាមសង្កាត់ មួយចំនួន ដែលជាទីប្រជុំជន ហើយបើមានភាពមិនប្រក្រតីសូមមេត្តាបញ្ឈប់ជាបន្ទាន់។
ជាចុងក្រោយសម្ដេចក្រឡាហោម ស ខេង និងឯកឧត្តម លោក លោកស្រីដែលជាសម្បុរសជនបានចូលរួមកាត់ខ្សែបូ ជានិមិ្មត្តរូប សម្ពោធដាក់ឲ្យប្រើប្រាស់ឧបដ្ឋានសាលានិងសមិទ្ធផលនានាក្នុងវត្តបុទមស្វាយអន្ទរ ប្រកបដោយភាពរីករាយយ៉ាងក្រៃលែង៕ ដោយ មែនកំសត់
ចំនួនអ្នកទស្សនា
- ថ្ងៃនេះ8261
- ម្សិលមិញ11441
- សប្តាហ៍នេះ38091
- ខែនេះ153241
- ឆ្នាំនេះ153241
- សរុប20595697