ឯកឧត្តម ហ៊ុន ម៉ាណែត ទទួលថវិកា៥ម៉ឺនដុល្លាពីក្រុមហ៊ុន SNBL Cambodia ដើម្បីសកម្មភាពសង្គម
01-February-2016 | ដោយ ម៉ែន កំសត់
ភ្នំពេញ៖ ក្នុងគោលបំណងបញ្ជាក់ពីការយល់ដឹង និងការចូលរួមបង្កើន កិច្ចសហប្រតិបត្តិការ លើការងារមនុស្សធម៌ ក្រុមហ៊ុន SNBL Cambodia នៅថ្ងៃទី៣១ ខែមករា ឆ្នាំ២០១៦នេះ បានផ្តល់នូវថវិកា ៥ម៉ឺនដុល្លា ដល់ស្ថាប័នមនុស្សធម៌ទាំងបី ដោយក្នុងនោះរួមមានថវិកាចំនួន ១៥០០០ដុល្លា ផ្តល់ជូនសមាគមគ្រូពេទ្យស្ម័គ្រចិត្តយុវជនសម្តេចតេជោ សម្រាប់ចូលរួមចំណែកគាំពារ ដល់សកម្មភាពថែទាំសុខភាព និងព្យាបាលជំងឺ នៅតាមមូលដ្ឋាន ដោយឥតគិតថ្លៃ និងថវិកា ចំនួន១៥០០០ដុល្លា ផ្តល់ជូនសមាគមសិស្ស-និស្សិតអាហារូបករណ៍ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត សម្រាប់ចូលរួមលើកកម្ពស់ ការអប់រំយុវជន និងការបណ្តុះបណ្តាលធនធានមនុស្ស ។ ដោយឡែកថវិកាចំនួន ២ម៉ឺនដុល្លាទៀត ផ្តល់ជូនសហភាពសហព័ន្ធយុវជនកម្ពុជា ខេត្តត្បូងឃ្មុំ សម្រាប់ឧបត្ថម្ភសកម្មភាពនានា របស់យុវជននៅតាមមូលដ្ឋាន សំដៅបម្រើផលប្រយោជន៍សង្គម។
ជានិច្ចកាល លោក Steven Meyer អគ្គនាយកក្រុមហ៊ុន SNBL Cambodia តែងបានចូលរួមឧបត្ថម្ភ ដល់ការងារមនុស្សធម៌នានា ព្រមទាំងការរួមចំណែក តាមរយ:កាកបាទក្រហមកម្ពុជា ហើយលោកក៏បានសម្តែងនូវ មោទនភាពផងដែរ ដែលបានចូលរួមផ្តល់នូវថវិកាឧបត្ថម្ភនេះ ថែមទៀតជាមួយសមាគមទាំងបី។
ក្នុងឱកាសប្រគល់ទទួល ថវិកាបរិច្ចាកខាងលើនេះ ឯកឧត្តមបណ្ឌិត ហ៊ុន ម៉ាណែត ក្នុងនាមជាប្រធាន
ក្រុមប្រឹក្សាភិបាល សមាគមគ្រូពេទ្យស្ម័គ្រចិត្ត យុវជនសម្តេចតេជោ ជាប្រធានសមាគមសិស្ស-និស្សិត អាហារូបករណ៍ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត និងក្នុងនាមជំនួសមុខជូន សហភាពសហព័ន្ធយុវជនកម្ពុជាខេត្តត្បូងឃ្មុំ បានថ្លែងអំណរគុណយ៉ាងជ្រាលជ្រៅ ដល់ក្រុមហ៊ុន ចំពោះទឹកចិត្តដ៏សប្បុរស និងការចូលរួមចែករំលែកដ៏ថ្លៃថ្លានេះ សំដៅបង្កលទ្ធភាពគាំទ្រ ដល់សកម្មភាពមនុស្សធម៌ នៅតាមមូលដ្ឋាន និងសហគមន៍កម្ពុជា៕
ចំនួនអ្នកទស្សនា
- ថ្ងៃនេះ1171
- ម្សិលមិញ2891
- សប្តាហ៍នេះ20021
- ខែនេះ66121
- ឆ្នាំនេះ402381
- សរុប19629827