អគ្គស្នងការនគរបាលជាតិព្រមានដកមន្ត្រីដែលបណ្តោយឲ្យមានអំពើអសកម្ម ពុករលួយ បក្សពួកនិយម
04-February-2016 | ដោយ មែន កំសត់
ភ្នំពេញ៖ ឯកឧត្តមនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានព្រមានដកតំណែងអគ្គស្នងការរង ប្រធាននាយកដ្ឋាន និងស្នងការនគរបាលនៅទូទាំងប្រទេស ប្រសិនបើមានការធ្វេសប្រហែស បណ្តាលឲ្យករណីមន្ត្រីនគរបាលពុករលួយ ពាក់ព័ន្ធនឹងការទិញលក់តំណែង បក្សពួកនិយម ការតម្លើងឋានន្តរសក្តិ និងការបញ្ជូនមន្ត្រីប៉ូលីសទៅបំពេញបេសកកម្មសិក្សាជំនាញនៅក្រៅប្រទេស ជាដើម។ នេះបើតាមការបញ្ជាក់របស់ ឯកឧត្តម ឧត្តមសេនីយ៍ឯកគៀត ច័ន្ទថារិទ្ធ អ្នកនាំពាក្យអគ្គស្នងការដ្ឋាននគរបាលជាតិ។
ឯកឧត្តម ឧត្តមសេនីយ៍ឯក គៀត ច័ន្ទថារិទ្ធ បានប្រាប់អ្នកសារព័ត៌មាន បន្ទាប់ពីកិច្ចប្រជុំបិទទា្វរមួយរវាង នាយឧត្តមសេនីយ៍ នេត សារឿន និងអគ្គស្នងការរង ប្រធាននាយកដ្ឋាន ព្រមទាំងស្នងការនគបាលរាជធានី ខេត្តទូទាំងប្រទេស នៅក្រសួងមហាផ្ទៃ នៅថ្ងៃទី២ ខែកុម្ភៈនេះ ថា ក្រោយពីអគ្គស្នងការដ្ឋាន នគរបាលជាតិទទួលព័ត៌មានអសកម្មមួយចំនួន ពាក់ព័ន្ធនឹងករណីពុករលួយបញ្ជូនមន្ត្រីនគរបាលទៅសិក្សានៅក្រៅប្រទេស ក្នុងនាយកដ្ឋានបុគ្គលិកនគរបាលជាតិ អគ្គស្នងការនគរបាលជាតិបានពិនិត្យ និងណែនាំមន្ត្រីនគរបាលដែលមានឋានៈចាប់ពីអគ្គស្នងរងនគបាល រហូតដល់ស្នងការនគរបាលរាជធានីខេត្តឲ្យត្រួតពិនិត្យបញ្ហាអសកម្មនានា ក្នុងអង្គភាពខ្លួន ឡើងវិញ។ ហើយថា ប្រសិនបើប្រធានស្ថាប័ននគរបាលជាតិ នៅតែបណ្តែតបណ្តោយឲ្យករណីអសកម្មទាំងឡាយកើតមាននៅក្នុងស្ថាប័នទៀតនោះ ពួកគេនឹងប្រឈមមុខនឹងការដកតំណែង ពិន័យរដ្ឋបាល និងអនុវត្តន៍តាមច្បាប់។
ឯកឧត្តមបានថ្លែងយ៉ាងដូច្នេះថា៖«គាត់សង្កត់ធ្ងន់ថា រាល់បាតុភាពអសកម្មទាំងអស់ មន្ត្រីគ្រប់ថ្នាក់ដែលជាអ្នកទទួលខុសត្រូវ រួមមាន ស្នងការ ប្រធាននាយកដ្ឋាន ប្រធាននាយកដ្ឋានកណ្តាល អគ្គស្នងការងទាំងអស់ត្រូវរួមគ្នាទទួលខុសត្រូវ លុបបំបាត់ភាពអសកម្ម។ ប្រសិន បើមានភាពអសកម្មទៀត ត្រូវយកមកពិនិត្យហើយគិតគូរទូទាត់គ្នាតាមច្បាប់ ត្រូវពិន័យរដ្ឋបាល បញ្ជូនទៅតុលាការ និងដេញចេញពីតំណែង»។
លើសពីនេះ ឯកឧត្តម ឧត្តមសេនីយ៍ឯកគៀត ច័ន្ទថារិទ្ធ បានថ្លែងថាឯកឧត្តមនាយឧត្តមសេនីយ៍ នេត សាវឿន បានជំរុញមន្ត្រីនគរបាល ពាក់ព័ន្ធបន្តរឹតបន្តឹងការអនុវត្តច្បាប់ស្តីពី ចរាចរណ៍ផ្លូវគោកថ្មី ដើម្បីពង្រឹងសណ្តាប់ធ្នាប់ចរាចរ ន៍សាធារណៈ និងកាត់បន្ថយករណីគ្រោះថ្នាក់ចរាចរណ៍។ ហើយថាឯកឧត្តម នេត សាវឿន ក៏បានណែនាំមន្ត្រីឲ្យបន្តតាមដាន និងពិនិត្យមតិសាធារណៈជន លើបណ្តាញសង្គមហ្វេសប៊ុក របស់ខ្លូនទៀត ដើម្បីយកមតិទាំងនោះ មកពិនិត្យ និងកែលំអផងដែរ៕
ចំនួនអ្នកទស្សនា
- ថ្ងៃនេះ14461
- ម្សិលមិញ11441
- សប្តាហ៍នេះ44291
- ខែនេះ159441
- ឆ្នាំនេះ159441
- សរុប20601897