ប្រធានមន្ទីររ៉ែ និងថាមពល សង្ស័យត្រូវថ្នាំសណ្តំថៅកែបកខ្សាច់អត់ច្បាប់ បានជាមិនបង្ក្រាប
15-February-2016 | ដោយ មែន កំសត់
ខេត្តកំពង់ស្ពឺ ៖ ការបកយកខ្សាច់ ពុំមានច្បាប់អនុញ្ញាត កំពុងមានភាពអនាធិបតេយ្យ កើតមានយ៉ាងច្រើន ក្នុងទឹកដីស្រុកសំរោងទង តែបែរជាលោកប៊ិញ ជីវតុង ប្រធានមន្ទីរ មិនត្រឹមតែមិនបង្ក្រាបទេ ថែមទាំងនិយាយប្រាប់អ្នកសារព័ត៌មានថា ទីតាំងនោះមានច្បាប់ទៅវិញ ខណៈមន្ត្រីរបស់លោកប្រាប់ថា មិនមានច្បាប់ឡើយ គឺកំពុងតែរៀបចំ ។
ទីតាំងបកខ្សាច់នេះ ស្ថិតក្នុងភូមិរលាំងចក ឃុំរលាំងគ្រើល ស្រុកសំរោងទង ខេត្តកំពង់ស្ពឺ ។ ថៅកែបកខ្សាច់អត់ច្បាប់នេះ ត្រូវបានស្គាល់មានឈ្មោះភឿង ប៊ន អតីតជាមន្ត្រីយោធាកងអង្គរក្ស បច្ចុប្បន្ន ជាមន្ត្រីយោធានៅក្រសួងការពារជាតិ ។
តាមការបង្ហើបប្រាប់ពីមន្ត្រីរ៉ែបានឱ្យដឹងថា លោកភឿង ប៊ន នេះ ធ្វើការបកខ្សាច់នៅទីតាំងខាងលើ គឺមិនមានច្បាប់អនុញ្ញាតត្រឹមត្រូវនោះទេ គឺគេយកច្បាប់កន្លែងផ្សេង មកកាយនៅកន្លែងនេះ ។ ការដែលធ្វើទៅបាន គឺគាត់មានការត្រូវរ៉ូវគ្នាជាមួយលោកប៊ិញ ជីវតុង ជាប្រធានមន្ទីររ៉ែ និងថាមពល ទើបអាចយកគ្រឿងចក្រទៅដាក់ ដើម្បីកាយបកយកខ្សាច់នៅទីនោះ បានបើមិនមានការត្រូវរ៉ូវគ្នា ជាមួយលោកប្រធានទេកុំថាឡើយមួយថ្ងៃ សូម្បីមួយនាទី ក៏ដឹកគ្រឿងចក្រចេញមិនទាន់ផង ។ មិនមានប្រភពណាមួយអះអាងជាក់លាក់ថា លោកភឿង ប៊ន បានបង់លុយក្រៅផ្លូវការទៅឱ្យលោកប៊ិញ ជីវតុង ប៉ុន្មានឡើយក្នុងមួយខែៗជាថ្នូរទៅនឹងការដែលមិនចាំបាច់ធ្វើ អាជ្ញាប័ណ្ណ ដើម្បីបង់ចំណូលចូលរដ្ឋ។
ប្រភពបន្តថា នៅក្នុងខេត្តកំពង់ស្ពឺនេះ សំបូរកន្លែងបក និងបូមខ្សាច់ច្រើនកន្លែងណាស់ ក្នុងនោះ មួយភាគធំ គឺសុទ្ធតែមិនមានអាជ្ញាប័ណ្ណត្រឹមត្រូវឡើយ។
ពាក់ព័ន្ឋនឹងការដែលបណ្តែតបណ្តោយអោយមានការបូមខ្សាច់ដោយគ្មាន អាជ្ញាប័ណ្ណនេះដែរលោកប៊ិញជីវតុងបានប្រាប់តាមទូរស័ព្ទថា ទីតាំងបកខ្សាច់ខាងលើ មានម្ចាស់ឈ្មោះហេងថានី ។ ប្រភពបង្ហើបថាអាជ្ញាប័ណ្ណឈ្មោះហេងថានីនេះ គឺមានមែនតែមិនមែនកន្លែងដែលអ្នកព័ត៌មានថតបាននេះទេ ។ ចំណែករឿងទទួលសំណូកក្រៅប្រព័ន្ធ ក៏មិនមានពាក់ព័ន្ធនឹងលោកដែរ (យើងមិនអាចអនុញ្ញាតឱ្យមានការបក ឬកាយយកខ្សាច់ដោយអនាធិបតេយ្យបានទេ បើមានយើងនឹងចាត់ការបិទបង្ក្រាបភ្លាម)។
លោកភឿងប៊នបានប្រាប់តាមទុរស័ព្ទថាកន្លែងលោកមានអាជ្ញាប័ណ្ណបើមិនមានច្បាស់ចាត្រូវចាប់ឃាត់មិនខាន។ ចំណែកលោក ប៊ិន ថេត ប្រធានការិយាល័យរ៉ែ និងថាមពលបានទទួលស្គាល់ថា ទីតាំងដែលលោកភឿង ប៊ន កំពុងធ្វើអាជីវកម្មបកខ្សាច់នោះពិតជាមិនមានច្បាប់អនុញ្ញាតពិតមែន ពេលនេះខាងជំនាញកំពុងតែជំរុញអោយភាគីអ្នកបកខ្សាច់នោះ មករៀបចំធ្វើឯកសារឱ្យបានត្រឹមត្រូវតាមច្បាប់ ។ លោកបន្តថា ច្បាប់កន្លែងផ្សេងមានមួយហិកតាតែមិនអាចយកមកធ្វើអាជីវកម្មនៅ កន្លែងថ្មីជិតនេះបានទេ។
ចំនួនអ្នកទស្សនា
- ថ្ងៃនេះ2801
- ម្សិលមិញ5161
- សប្តាហ៍នេះ28941
- ខែនេះ72201
- ឆ្នាំនេះ856831
- សរុប21299287