សម្តេចតេជោអំពាវនាវឲ្យមានការចូលរួមឲ្យបានច្រើនកុះករ ក្នុងពិធីបុណ្យមាឃបូជា
22-February-2016 | ដោយ មែន កំសត់
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី២២ ខែកុម្ភៈ ឆ្នាំ២០១៦នេះ ជាថ្ងៃដែលប្រជាជនកម្ពុជា ប្រារព្ធពិធីបុណ្យសាសនា «មាឃបូជា» នោះ បានអំពាវនាវឲ្យមានការចូលរួមឲ្យបានច្រើនកុះករ ក្នុងពិធីបុណ្យមាឃបូជានេះ ដើម្បីសុខសន្តិភាព និងការអភិវឌ្ឍន៍។
សម្តេចបានបញ្ជាក់ តាមរយៈ Facebook Page របស់សម្តេចថា ប្រទេសកម្ពុជា ជាប្រទេសគោរពព្រះពុទ្ធសាសនា អស់កាលជាយូរមកហើយ ដែលមានប្រជាពលរដ្ឋជាង៩៥% ជាអ្នកកាន់ព្រះពុទ្ធសាសនា ហើយរដ្ឋធម្មនុញ្ញក៏បានចាត់ទុក ព្រះពុទ្ធសាសនាជាសាសនារបស់រដ្ឋទៀតផង។ ចំនួនព្រះសង្ឃ និងវត្តអារាមបានកើនឡើង ពីមួយឆ្នាំទៅមួយឆ្នាំ ដែលបង្ហាញពីការរីកចម្រើន ផ្នែកពុទ្ឋសាសនានៅកម្ពុជា។
សម្តេចបានសរសេរទៀតថា ចំពោះមាឃបូជានៅថ្ងៃនេះ គឺជាពិធីបុណ្យដ៏សំខាន់មួយរបស់ព្រះពុទ្ឋសាសនា។ ពិធីបុណ្យនេះគឺដើម្បីរំឭកដល់ព្រឹត្តិការណ៍សំខាន់ៗ នៅក្នុងព្រះពុទ្ធសាសនា ដូចជា រំឮកដល់ថ្ងៃចតុរង្គសន្និបាតនៃព្រះភិក្ខុសង្ឃទាំង ១២៥០អង្គ នាថ្ងៃ ១៥ កើត ខែមាឃ។ ក្រោមការដឹកនាំរបស់ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានធ្វើអោយវិស័យពុទ្ធចក្ររីកលូតលាស់ យ៉ាងស្គុសស្គាយនៅទូទាំងប្រទេស។ បច្ចុប្បន្ននេះកម្ពុជាមានវត្តអារាមចំនួន៤,៥១៤ វត្ត ក្នុងនោះគណៈធម្មយុត្តិកនិកាយ១៧៤ វត្ត និងព្រះសង្ឃទាំងពីរគណៈមានចំនួន ៥៦,៨២០អង្គ ។
សម្តេចតេជោ ហ៊ុន សែន បញ្ជាក់ទៀតថា «ព្រះពុទ្ឋសាសនា មិនត្រឹមតែបានធ្វើឱ្យបងប្អូនប្រជាពលរដ្ឋយើង បានរួមរស់ជាមួយគ្នា ដោយសុខសាន្តខាងផ្លូវស្មារតីប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់ នៅក្នុងការពង្រឹងសណ្តាប់ធ្នាប់ សុខសន្តិភាព ស្ថិរភាពសង្គម ការអភិវឌ្ឍ និងថែរក្សាការពារអត្តសញ្ញាណជាតិទៀតផង។ ជាងនេះទៀត ការអប់រំបែបព្រះពុទ្ធសាសនា ក៏បានរួមចំណែកយ៉ាងសំខាន់ក្នុងការលើកកម្ពស់ ការយល់ដឹងអំពីតម្លៃសីលធម៌ និងឥរិយាបថរស់របស់ពលរដ្ឋ នៅក្នុងសង្គមយើងផងដែរ។ សូមជូនពរជនរួមជាតិទូទាំងប្រទេសជួបតែសេចក្តីសុខ និងសំណាងល្អគ្រប់ៗគ្នា ជាពិសេសនៅក្នុងពិធីបុណ្យមាឃបូជានៅថ្ងៃនេះកុំបីខាន»៕
ចំនួនអ្នកទស្សនា
- ថ្ងៃនេះ3831
- ម្សិលមិញ9421
- សប្តាហ៍នេះ59491
- ខែនេះ174641
- ឆ្នាំនេះ174641
- សរុប20617097