ឧត្តមសេនីយ៍ទោ ស ថេតនិងមកនកាន់តំណែងជំនួសនាយឧត្តមសេនីយ៍ជួនសុវណ្ណស្នងការរាជធានីភ្នំពេញ
25-February-2016 | ដោយ មែន កំសត់
ភ្នំពេញ៖ មន្ត្រីជាន់ខ្ពស់ក្រសួងមហាផ្ចៃបានប្រាប់ឲ្យដឹងថា លោកឧត្តមសេនីយ៍ទោ ស ថេត ស្នងការនគរបាលខេត្តបាត់ដំបង នឹងមកកាន់ តំណែងស្នងការនគរបាលរាជធានីភ្នំពេញជំនួសលោកនាយឧត្តមសេនីយ៍ ជួន សុវណ្ណ ពីព្រោះតួនាទីនិងឋាន្តរស័ក្តិរបស់ឯកឧត្តមនាយឧត្តមសេនីយ៍ ជួន សុវណ្ណ វាមិនស៊ីគ្នា ។
ចំណែកអ្នកដែលត្រូវមកជំនួសតំណែងស្នងការនគរបាលខេត្តបាត់ដំបង វិញនោះ គឺលោកឧត្តមត្រី អ៊ុច សុខុន ស្នងការរងនគរបាលរាជធានីភ្នំពេញ ទទួលបន្ទុកចរាចរណ៍ ។
សម្ដេចក្រឡាហោមស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ថា ក្នុងនាម ជារដ្ឋមន្ត្រី មហាផ្ទៃសម្ដេច អនុញ្ញាតឲ្យឯកឧត្តម ជួន សុវណ្ណ ស្នងការរាជធានីភ្នំពេញបន្តការងាររបស់ឯកឧត្តម ក្នុងការកំណត់ណាមួយ ក្រោយពីឯកឧត្តម ជួន សុវណ្ណ ត្រូវបានដំឡើងឋានន្តរសកិ្តជានាយឧត្តមសេនីយ៍ (ផ្កាយ៤) ។
រដ្ឋមន្ត្រីក្រសួងមហាផ្ទៃ បានឆ្លើយតបនឹងសំណួរអ្នកសារព័ត៌មាន បន្ទាប់ពីលោកបើកសន្និបាតបូកសរុបការងារឆ្នាំ២០១៥ និងលើកទិសដៅការងារឆ្នាំ២០១៦ នៅក្រសួងមហាផ្ទៃ នាថ្ងៃទី២៣ ខែកុម្ភៈថា ការដំឡើងឋានន្តរស័ក្តិពុំពាក់ព័ន្ធនឹងការផ្លាស់ប្តូរតួនាទីនោះទេ ហើយមិនមានផែនការផ្លាស់ប្តូរតំណែងស្នងការនគរបាលរាជធានីភ្នំពេញនោះទេ ក្រោយពីឯកឧត្តម ជួន សុវណ្ណ ទទួលបានឋានន្តរស័ក្តិជានាយឧត្តមសេនីយ៍ ។
រដ្ឋមន្ត្រីក្រសួងមហាផ្ទៃ បានថ្លែងបញ្ជាក់យ៉ាងដូច្នេះថា “ខ្ញុំគិតថា ពីព្រោះឋានៈតួនាទី ហើយនិងឋាន្តរស័ក្តិ វាអត់ស៊ីគ្នាទេ បានន័យថា យោងទៅតាមស្មារតី យើងអាចឲ្យស័ក្តិបាន មិនមែនបានសេចក្តីថា ស្នងការត្រូវតែស័ក្តិប៉ុណ្ណេះនោះទេ។ ដូច្នេះខ្ញុំគិតថា ខ្ញុំក្នុងឋានៈជារដ្ឋមន្ត្រីក្រសួងមហាផ្ទៃ ប្រហែលជាប្រគល់ឲ្យគាត់ទទួលការងារនឹងបន្តទៀត រយៈពេលណាមួយជាកំណត់” ។
គួររំលឹកផងដែរថា ឯកឧត្តមឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ ត្រូវបានផ្ទេរមកជំនួសលោកឧត្តមសេនីយ៍ ទូច ណារ៉ុថ ស្នងការនគរបាលរាជធានីភ្នំពេញ ហើយលោកឧត្តមសេនីយ៍ត្រី ទូច ណារ៉ុថ ត្រូវផ្ទេរទៅជាប្រធាននាយកដ្ឋានអង្គរក្ស និងត្រូវដំឡើងឋានន្តរស័ក្តិជាឧត្តមសេនីយ៍ទោ (ផ្កាយពីរ) កាលពីថ្ងៃទី០៣ ខែតុលា ឆ្នាំ២០១២ នៅស្នងការដ្ឋាននគរបាលរាជធានីភ្នំពេញ ចំណែកលោកឧត្តមសេនីយ៍ឯក ជួន សុវណ្ណ ត្រូវបានដំឡើងឋានន្តរស័ក្តិ ជានាយឧត្តមសេនីយ៍ (ផ្កាយ៤) ចំណោមឧត្តមសេនីយ៍ឯក ៦រូប កាលពីថ្ងៃទី១៩ ខែកុម្ភៈ ឆ្នាំ២០១៦ កន្លងមកនេះ ៕
ចំនួនអ្នកទស្សនា
- ថ្ងៃនេះ4571
- ម្សិលមិញ9421
- សប្តាហ៍នេះ60231
- ខែនេះ175381
- ឆ្នាំនេះ175381
- សរុប20617837