ប្រជារាស្ត្រជាង៥០០គ្រួសារ នៅស្រុកមោងឫស្សីបានទទួលអំណោយ ព្រះមហាក្សត្រខ្មែរ
26-February-2016 | ដោយ មែន កំសត់
បាត់ដំបង៖ ព្រះករុណាព្រះបាទសមេ្តច ព្រះបរមនាថនរោត្តម សីហមុនី ព្រះមហាក្សត្រនៃកម្ពុជា នៅថ្ងៃទី២៦ ខែកុម្ភៈ ឆ្នាំ២០១៦នេះ បានសព្វព្រះរាជហឫទ័យ ស្តេចយាងសួរ សុខទុក្ខដោយផ្ទាល់ និងប្រោសព្រះរាជទាន នូវព្រះរាជអំណោយ ដល់ប្រជារាស្ត្រជាកសិករចំនួន ៥០០គ្រួសារ មកពីភូមិស្រះឈើនាង និងភូមិពេជ្រចង្វារ ស្ថិតនៅឃុំឫស្សីក្រាំង ស្រុកមោងឫស្សី ខេត្តបាត់ដំបង។
បើតាមការចុះផ្សាយរបស់ទីភ្នាក់ងារ AKP ការដង្ហែព្រះរាជដំណើរព្រះករុណាជា អម្ចាស់ជីវិតលើត្បួង ព្រះមហាក្សត្រនៃកម្ពុជា ជាទីសក្ការដ៏ខ្ពង់ខ្ពស់បំផុត នាឱកាសនេះ មានវត្តមានសម្តេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង លោក គុយ សុផល ទេសរដ្ឋមន្ត្រី ទទួលបន្ទុកកិច្ចការទូទៅក្រសួងព្រះបរមរាជវាំង និងនាម៉ឺនសព្វមុខមន្ត្រី នៃក្រសួងព្រះបរមរាជ វាំងជាច្រើនរូបទៀត។
ប្រភពព័ត៌មានដដែលបញ្ជាក់ថា ស្ថិតក្នុងឱកាសស្តេចយាងដល់ស្ថិតនៅឃុំឫស្សីក្រាំង ស្រុកមោងឫស្សី ខេត្តបាត់ដំបង ព្រះករុណា ជាអម្ចាស់ជីវិតលើត្បួង ព្រះមហាក្សត្រ នៃកម្ពុជា ព្រះអង្គ បានសព្វព្រះរាជហឫទ័យ ស្តេចយាងចុះជួបសំណេះសំណាលដោយផ្ទាល់ព្រះភ័ក្ត្រ របស់ព្រះអង្គ នូវគ្រួសារប្រជាកសិករ ចំនួន៦គ្រួសារ ដល់ក្នុងលំនៅដ្ឋាន។ ព្រះអង្គបានសព្វព្រះរាជហឫទ័យ ប្រោសព្រះរាជទាន នូវគ្រួសារទាំង៦ ដោយក្នុងមួយគ្រួសារៗ ទទួលបានអង្ករ ៥០គីឡូក្រាម ឃីត ១កញ្ចប់ មានមុង១ ភូយ១ សារុង១ និងក្រមា១ កន្ទេល១ មី១កេស ត្រីខ១០កំប៉ុង អាវយឺត មានស្លាកព្រះរាជអំណោយ ព្រះករុណា ព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃកម្ពុជាចំនួន១ និង ថវិកា១០ម៉ឺនរៀល។
ព្រះករុណាជាអម្ចាស់ជីវិតលើត្បួង ព្រះមហាក្សត្រ នៃព្រះរាជាណាចក្រកម្ពុជា ជាទីសក្ការដ៏ខ្ពង់ខ្ពស់បំផុត ព្រះអង្គបានសព្វព្រះរាជហឫទ័យ បន្តយាងជួបសំណេះសំណាល និងប្រោស ព្រះរាជទាននូវព្រះរាជអំណោយដោយផ្ទាល់ ដល់ប្រជារាស្ត្រជាកសិករ ចំនួន ៥០០គ្រួសារបន្ថែមទៀត។
ព្រះរាជអំណោយដែលទទួលបាននាពេលនេះ គឺក្នុងមួយគ្រួសារៗ ទទួលបាន អង្ករ ៥០គីឡូក្រាម ឃីត ១កញ្ចប់ មានមុង១ ភួយ១ សារុង១ និងក្រមា១ កន្ទេល១ មី១កេស ត្រីខ១០កំប៉ុង អាវយឺត មានស្លាកព្រះរាជអំណោយ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃកម្ពុជាចំនួន១ និងថវិកា១០ម៉ឺនរៀល។ ដោយឡែកក្រុមគ្រូពេទ្យចំនួន៩នាក់ ក្នុងម្នាក់ៗទទួលបានឃីតមួយកញ្ចប់ មានមុង១ ភូយ១ សារុង១ និងក្រមា១ និង ថវិកា ចំនួន ១០ម៉ឺន រៀល៕
ចំនួនអ្នកទស្សនា
- ថ្ងៃនេះ6101
- ម្សិលមិញ9421
- សប្តាហ៍នេះ61761
- ខែនេះ176911
- ឆ្នាំនេះ176911
- សរុប20619367