សម្តេចក្រឡាហោម ស ខេង បញ្ជាឲ្យបែងចែកប្រាក់ពិន័យពីបទល្មើសចរាចរណ៍ ឲ្យបានត្រឹមត្រូវ
28-February-2016 | ដោយ មែន កំសត់
ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាទៅកាន់មន្ត្រីពាក់ព័ន្ធឲ្យបែងចែកថវិកា ទទួលបានពីការផាកពិន័យបទល្មើសចរាចរណ៍ផ្លូវគោក ទៅមន្ត្រីថ្នាក់ក្រោមឲ្យបានត្រឹមត្រូវ ហើយមន្ត្រីនគរបាលទាំងអស់ត្រូវបើកគណនីនៅធនាគារ ដើម្បីបើកប្រាក់ទាំងអស់នេះ។
នាយឧត្តមសេនីយ៍ គៀត ច័ន្ទថារិទ្ធ អគ្គស្នងការរងនគរបាលជាតិ បានថ្លែងប្រាប់ក្រុមអ្នកព័ត៌មាននៅក្រោយកិច្ចប្រជុំប្រចាំសប្តាហ៍ របស់គណៈកម្មាធិការសុវត្ថិភាពចរាចរណ៍ផ្លូវគោកនៅល្ងាចថ្ងៃទី២៦ ខែកុម្ភៈនេះថា ក្នុងកិច្ចប្រជុំនេះ សម្តេចក្រឡាហោម ស ខេង បានកំណត់ឲ្យមន្ត្រីនគរបាលទាំងអស់បើកគណនីធនាគារ ដើម្បីបើកប្រាក់លើកទឹកចិត្ត ដែលទទួលបានពីការផាកពិន័យ ហើយសម្តេចបានបញ្ជាក់ថា ការបើកប្រាក់នេះ ត្រូវតែធ្វើឲ្យត្រឹមត្រូវទៅបានការសម្រេចរបស់រាជរដ្ឋាភិបាល។
សូមបញ្ជាក់ថា យោងតាមការសម្រេចរបស់រាជរដ្ឋាភិបាលនាពេលកន្លងទៅ បានកំណត់ថា ប្រាក់ផាកពិន័យពីបទល្មើសច្បាប់ចរាចរណ៍ ៥ភាគរយ ដាក់ចូលទៅក្រសួងសេដ្ឋកិច្ច និងហិរញ្ញវត្ថុ ហើយនៅសល់ ៩៥ភាគរយ ត្រូវបែងចែកជូនដល់កងកម្លាំងនគរបាល។ ក្នុងនោះនគរបាលចរាចរណ៍ចុះប្រចាំការតាមដងផ្លូវទទួលបាន៧០ភាគរយ ជូនអង្គភាពប្រតិបត្តិការរបស់កងកម្លាំង ២៥ភាគរយ។
សូមបញ្ជាក់ផងដែរថា បច្ចុប្បន្នមន្ត្រីនគរបាល ដែលចុះអនុវត្តច្បាប់លើដងវិថីជារៀងរាល់ថ្ងៃ ក៏ត្រូវបាន សម្តេច ស ខេង ឧបត្ថម្ភម្នាក់ ៤,០០០រៀល ជារៀងរាល់ថ្ងៃផងដែរ។
គណៈកម្មាធិការសុវត្ថិភាពចរាចរណ៍ផ្លូវគោក រយៈពេលជិត ២ខែ នៃការអនុវត្តន៍ច្បាប់ចរាចរណ៍ផ្លូវគោកថ្មីនេះ ថវិកាជិត៤ពាន់លានរៀល ត្រូវបានផាកពិន័យពីអ្នកបើកបរល្មើសច្បាប់ចរាចរណ៍៕
ចំនួនអ្នកទស្សនា
- ថ្ងៃនេះ6691
- ម្សិលមិញ9421
- សប្តាហ៍នេះ62351
- ខែនេះ177501
- ឆ្នាំនេះ177501
- សរុប20619957