សមត្ថកិច្ចជលផលបើកដៃឲ្យមានការប្រព្រឹត្តនេសាទខុសច្បាប់
06-March-2016 | ដោយ មែន កំសត់
ពោធិ៍សាត់ ៖ ប្រជាពលរដ្ឋទូទៅបានធ្វើការរិះគន់ចំៗ លើមន្ត្រីជលផលខេត្តពោធិសាត់ថាមានភាពអសកម្ម បណ្តែតបណ្តោយអោយកើតមានបត ល្មើសនេសាទនៅក្នុងដែនគ្រប់គ្រងរបស់ខ្លួនជារៀងរាល់រដូវ ពិសេសនៅក្នុងរដូវត្រីពងកូននេះ ។បើទោះជាមានផ្សព្វផ្សាយសារាចរណែនាំ(លេខ០១)របស់ប្រមុខរាជរដ្ឋាភិបាល អោយធ្វើការបញ្ឈប់និងរឹតបន្តឹងដាច់ខាតចំពោះបទល្មើសនេសាទ នៅក្នុងរដូវបិទនេសាទដែលជារដូវត្រីពងកូននេះ អ្វីដែលសំខាន់គេនៅតែឃើញបទល្មើសនេសាទកើតមានស្ទើរពាសពេញផ្ទៃបឹងទន្លេដដែល គ្មានការទប់ស្កាត់ ឬបង្ក្រាបនោះឡើយ។
បើតាមការអះអាងពីប្រជាពលរដ្ឋដែលរកស៊ីនៅតាមដងទន្លេបានអោយដឹងថា បទល្មើសនេសាទជាក់ស្តែងបច្ចុប្បន្នកើតមានច្រើនណាស់ នៅតាមដងព្រែកដៃទន្លេសំខាន់ៗដែលជាផ្លូវ ត្រីធ្វើចរាចរណ៍ចុះឡើងត្រីរកកន្លែងពងកូន ឥឡូវត្រូវបានក្រុមជនល្មើសកំពុងធ្វើសកម្មភាពដាក់រាយឧបករណ៍ស្បៃមុងក្រឡាញឹក ដែលត្រូវបានគេរាំងដាក់ផ្ជិត តាមដៃព្រែក ដៃទន្លេ ដៃបឹង លំហូរ ជ្រលង ផ្សេងៗ ។ល។ ដែលធ្វើអោយត្រីមិនអាចធ្វើចរាចរណ៍ចូល ព្រែកទាំងនោះមានដូចជា ១ ព្រែកស្ដេចក្មេង ២ព្រែកកោះទន្លាក្រៅ ៣ ព្រែកតូចព្រែកធំអតីតហៅព្រែកតាម៉េង៤ ព្រែកទន្លេថ្កោល៥ ព្រែកទន្លេកំពុងលួង ៦ និងនៅមានដៃទន្លេ និងព្រែកជាច្រើនទៀត ក្នុងខេត្តពោធិសាត់ ដែលរងនូវការដាក់របាំងស្បៃមុងក្រឡាញឹកផ្ជិតដើម្បីស្ទាក់ចាប់ត្រី ពីក្រុមឈ្មួញរកស៊ីល្មើសច្បាប់។
ប្រភពដដែលបានបន្តថា ការប្រើឧបករណ៍នេសាទត្រីខុសច្បាប់នៅក្នុងខេត្តពោធិសាត់ គឺជនល្មើសគេប្រើឧបករណ៍នេសាទទំនើបៗទៅតាមរដូវ ដូចជានៅក្នុងរដូវបិទនេសាទនេះគឺភាគច្រើនគេនេសាទដោយប្រើឧបករណ៍ លបលូស្បៃមុងក្រឡាញឹកដែលមានចំរុះពណ៌ និងឧបករណ៍ទំនើបមួយទៀតដែលមានឈ្មោះថា លបប្រើស១០០ ឧបករណ៍នេះគេដាក់លាតសន្ធឹងនៅតាម លំហូរ ជ្រលង ព្រែក ដៃទន្លេ ដៃបឹង ឬក៏ដាក់កាត់ទទឹងទន្លេតាមមាត់ព្រៃលិចទឹក ដែលជាកន្លែងត្រីឡើងពងកូន ហើយក្នុងមួយរបាំងៗមានប្រវែងចាប់ពី៣០០ ទៅជាង១០០០ម៉ែត្រ។
ប្រជាពលរដ្ឋក៏ដូចជាមន្ត្រីរាជការក្នុងខេត្តពោធិ៍សាត់ទាំងអស់ ស្នើសុំដល់ក្រសួងកសិកម្មរុក្ខាប្រមាញ់និងនេសាទ ពិសេសលោក អេង ជាសាន ប្រធានរដ្ឋបាលជលផលកម្ពុជា និងជាប្រតិភូរាជរដ្ឋាភិបាលដែលទើបឡើងថ្មីៗ មេត្តាចាត់វិធានការអោយបានហ្មឺងម៉ាត់ចំពោះបទល្មើសនេសាទខាងលើនេះ ព្រោះ ពីមួយឆ្នាំទៅមួយឆ្នាំបទល្មើសនេសាទនៅក្នុងខេត្តកំពង់ឆ្នាំងនេះកើតច្រើន ក្នុងនោះឧបករណ៍នេសាទចាប់យកត្រីវិញ ក៏កាន់តែទំនើបៗនិងផ្លែកៗពីមួយឆ្នាំទៅមួយឆ្នាំ។
បើទោះជាមានការផ្សព្វផ្សាយព័ត៌មានតាម រយៈការចុះដល់ទីកន្លែងនិងតាមប្រព័ន្ធផ្សព្វផ្សាយទូទៅ ដែលមានទាំងរូបភាពបង្ហាញពីសកម្មភាព ស្តីពីបទល្មើសនេសាទយ៉ាងជាក់ស្តែងយ៉ាងណាក៏ដោយ បទល្មើសនេសាទនៅតែកើតមានតែដដែល មិនដែលឃើញមន្ត្រីជលផលចាត់វិធានការណាមួយដែលលក្ខណៈជាទ្រង់ទ្រាយ ធំនៃការបង្ក្រាបបទល្មើសនេសាទខុសច្បាប់ម្តងណានោះឡើយ ដែលធ្វើអោយប្រជាពលរដ្ឋមិនមានទំនុកចិត្តលើមន្ត្រីជាអ្នកអនុវត្តច្បាប់នោះ ផ្ទុយទៅវិញពេលបង្ក្រាបម្តងៗ គឺបង្ក្រាបតែឧបករណ៍មងរបស់ប្រជាពលរដ្ឋតូចតាចដែលពួកគាត់រកស៊ីនេសាទជា លក្ខណៈគ្រួសារតែប៉ុណ្ណោះ។
ជុំវិញការប្រើឧបករណ៍នេសាទដោយខុសច្បាប់ និងខណៈដែលបទល្មើសនេសាទ ចេះតែកើតមានជារៀងរាល់ឆ្នាំមិនឃើញមន្ត្រីជំនាញចុះអនុវត្តច្បាប់ខាងលើនេះមិន ដឹងថា មន្ត្រីជលផលបានលាភសក្ការៈពីបទល្មើសទាំងនោះឬយ៉ាងណានោះទេ តែគ្រាន់តែបានដឹងថា កន្លងមកសម្តេចនាយករដ្ឋមន្ត្រីលោកតែងបានដាក់បទបញ្ជាយ៉ាងហ្មឺងម៉ាត់តាំង ពីអង្គភាពពាក់ព័ន្ធរហូតដល់ថ្នាក់មូលដ្ឋានមានអាជ្ញាធរភូមិឃុំ ត្រូវតែអនុវត្តអោយខាងតែបាននូវសារាចរណែនាំលេខ០១ ចំពោះបទល្មើសនេសាទ ប្រសិនកើតមាននៅកន្លែងណា អាជ្ញាធរនិងមន្ត្រីនៅទីនោះជាអ្នកទទួលខុសត្រូវ។
បញ្ហាបទល្មើសនេសាទដែលកើតមានជាច្រើនក្នុងខេត្តកំពង់ឆ្នាំងខាងលើនេះ អ្នកយកព័ត៌មានយើងធ្លាប់បានសម្ភាសន៍មន្ត្រីជលផលជារៀងរាល់ឆ្នាំ ឯចម្លើយគឺតែងតែនិយាយថា ខ្វះខាតកម្លាំងនិងមធ្យោបាយធ្វើសកម្មភាពរួមនិងថវិកាសម្រាប់ចុះទៅធ្វើការបង្ក្រាប និងមន្ត្រីជលផលខ្លះបាននិយាយថា អ្នករកស៊ី នេសាទល្មើសមានច្រើនពេកបង្ក្រាបពីមុខកើតខាងក្រោយតើអោយលោកធ្វើដូចម្តេច?។ តែទោះជាយ៉ាងនេះក្តី នេះគ្រាន់តែជាការឆ្លើយដោះសាយករួចខ្លួនតែប៉ុណ្ណោះ ហេតុនេះសុំអោយថ្នាក់ដឹកនាំខាងលើៗ មេត្តាជួយចាត់វិធានការអោយមានប្រសិទ្ធភាព ចំពោះបទល្មើសនេសាទនេះជាបន្ទាន់ព្រោះខណៈនេះវាជារដូវត្រីពងកូន៕
ចំនួនអ្នកទស្សនា
- ថ្ងៃនេះ3371
- ម្សិលមិញ10851
- សប្តាហ៍នេះ69891
- ខែនេះ185041
- ឆ្នាំនេះ185041
- សរុប20627497