កំណែងទម្រង់ស៊ីជម្រៅ របស់ក្រសួងដែនដីនគរូបនីយកម្ម និងសំណង់ !តែងតាំងមន្ត្រីផ្ទុយខ្លឹមសារ អនុក្រឹត្យរបស់រាជរដ្ឋភិបាល
14-March-2016 | ដោយ មែន កំសត់
ឯកឧត្ដមទេសរដ្ឋមន្ត្រី អ៊ឹម ឈុនលឹម តែងតាំងមន្ត្រីផ្ទុយខ្លឹមសារ អនុក្រឹត្យរបស់រាជរដ្ឋភិបាលលេខ ៤៩៧ អនក្រ បក ចុះថ្ងៃទី ៦ ខែវិច្ឆិកា ឆ្នាំ ២០១៣ ការតែងតាំងមិនប្រក្រតី សង្ស័យមានរឿងរត់ការក្រោមតុ មន្ត្រីភាគច្រើនប្រតិកម្ម តែក្រសួងដែនដីធ្វើមិនដឹងមិនលឺនៅតែការពារប្រកាសខុសរបស់ខ្លួន ថាត្រឹមត្រូវ ខណៈរដ្ឋមន្ត្រីក្រសួងមុខងារចាត់ទុកថាមិនត្រឹមត្រូវតាមអនុក្រឹត្យ ។
តាមរយៈលិខិតមួយច្បាប់របស់ក្រសួងមុខងារសាធារណៈ ចុះថ្ងៃទី ១៦ ខែកុម្ភៈ ផ្ញើជូនមកលោកប្រធានមន្ទីរមុខងារសាធារណៈ ខេត្តព្រៃវែង បានសរសេរថា ប្រកាសលេខ ២១៩ ចុះថ្ងៃទី ៣០ ខែធ្នូ ឆ្នាំ ២០១៥ របស់ក្រសួងដែនដីនគរូបនីកម្មនិងសំណង់ ដែលមានចុះហត្ថលេខាដោយឯកឧត្តម អ៊ឹម ឈុនលឹម តែងតាំងលោក អេង ផេងអាន ពីប្រធានការិយាល័យសំណង់ក្រុងព្រៃវែងមកជាអនុប្រធានមន្ទីររៀបចំដែនដីនគររូបនីយកម្មសំណង់ និងសូរិយោដី ខេត្តព្រៃវែង មានចំណុចមិនប្រក្រតីមួយចំនួនដូចខាងក្រោម ៖
១- ផ្ទុយពីខ្លឹមសារអនុក្រឹត្យលេខ ៤៩៧ អនក្រ ចុះថ្ងៃទី ៦ ខែវិច្ឆឹកា ឆ្នាំ ២០១៣ ស្ដីពីការធ្វើប្រតិភូកម្មអំណាចរដ្ឋបាលដល់ថ្នាក់ក្រោមជាតិក្នុងការតែងតាំង និងបញ្ចប់ភារកិច្ចមន្ត្រីរាជការស៊ីវិល ដែលបំពេញការងារនៅថ្នាក់ក្រោមជាតិ ។
២-ផ្ទុយសេចក្ដីណែនាំ ២២០២ មស សណន ចុះថ្ងៃទី ៤ ខែកក្កដា ឆ្នាំ ២០១៤ ការតែងតាំងអនុប្រធានមន្ទីរត្រូវធ្វើដោយដីការបស់សាលារាជនីខេត្ត និងអនុក្រឹត្យលេខ ១១៤ អនក្រ បក ចុះថ្ងៃទី ៧ ខែកញ្ញា ឆ្នាំ ២០១៥ ស្ដីពីការកំណត់រចនាសម្ព័ន្ធគ្រប់គ្រង និង មុខតំណែងក្នុងរចនាសម្ព័ន្ធគ្រប់គ្រង នៃក្រសួងស្ថាប័នថ្នាក់ជាតិ និងថ្នាក់ក្រោមជាតិ ។
មានលុយពិតជាប្រើខ្មោចអោយរាំបានមែនឬ ? ខេត្តព្រៃវែងចាញ់ឆ្នោតច្រើនណាស់ ល្មមដឹងខ្លួនហើយ សូមមេត្តាបញ្ឈប់ការតែងតាំងរបៀបមហាលោតផ្លោះ មហាអស្ចារ្យបែបនេះទៀត ។ មន្ត្រីថ្នាក់ក្រោម និង ប្រជាពលរដ្ឋមិនពេញចិត្តទេ ។
តើអស់លោកធ្វើការផ្គាប់ចិត្តមនុស្សពីរបីនាក់ ឬផ្គាប់ចិត្តប្រជាពលរដ្ឋភាគច្រើន ?
ក្រសួងដែនដីចូលចិត្តតែងតាំងប្លែកៗខុសគេជាពិសេស ពូកែខាងតែងតាំងប្រធានការិយាល័យសំណង់ស្រុក អោយផ្លោះមកធ្វើជាប្រធានមន្ទីរសំណង់ខេត្ត ។ នេះហើយជាកំណែទម្រង់ស៊ីអោយជ្រៅរបស់ក្រសួងដែនដី ៕
ចំនួនអ្នកទស្សនា
- ថ្ងៃនេះ10031
- ម្សិលមិញ10851
- សប្តាហ៍នេះ76551
- ខែនេះ191701
- ឆ្នាំនេះ191701
- សរុប20634157