កាកបាទក្រហមកម្ពុជាយកអំណោយចូលបុណ្យសព លោកយ៉ាវ បូរ៉ាមន្ត្រី នគរបាលស្លាប់ដោយខ្យល់គរ
14-March-2016 | ដោយ មែន កំសត់
ភ្នំពេញ៖ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅរសៀលថ្ងៃទី១៤ ខែមីនា ឆ្នាំ២០១៦ នេះបានចាត់តាំងអោយមន្ត្រីកាកបាទក្រហមកម្ពុជា ទៅចូលរួមរំលែកទុក្ខគ្រួសារសពលោក យ៉ាវ បូរ៉ា ជាមន្ត្រីនគរបាលចរាចរណ៍ ខណ្ឌ៧មករា ដែលបានទទួលមរណភាពដោយសារខ្យល់គរ កាលពីរសៀលថ្ងៃទី១៣ ខែមីនា ឆ្នាំ២០១៦ ខណ:លោកកំពុងចុះបំពេញបេសកកម្មសម្រួលចររាចរណ៍ តាមដងវីថីសហព័ន្ធរុស្ស៊ី ។
ក្រុមការងារបាននាំយកអំណោយជាបច្ច័យមានដូចជាសម្ភារ:ប្រើប្រាស់ គ្រឿងឧបភោគ បរិភោគ និងថវិកាមួយចំនួន ជូនដល់ក្រុមគ្រួសារសព ដែលរស់នៅភូមិ១៦ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ក្រុមគ្រួសារសព បានថ្លែងអំណរគុណ ចំពោះ កាកបាទក្រហមកម្ពុជា ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានចាត់មន្ត្រីមកចូលរួមរំលែកទុក្ខ និងបាននាំយកបច្ច័យមកចូលបុណ្យដើម្បីសម្រាលទុក្ខលំបាកនៃគ្រួសារសព។
ព្រមជាមួយគ្នាសាលាខណ្ឌ៧មករា នាំថវិកាចូលរួមបុណ្យសពលោក យ៉ាវ បូរ៉ា, ឯកឧត្តម ហ៊ុន ម៉ាណែត និងលោកស្រី ចូលថវិកា៣លានរៀល លោក លីម សុភា អភិបាលខណ្ឌ៧មករា ដឹកនាំគណៈប្រតិភូខណ្ឌ៧មករា រួមមានអភិបាលរង អធិការខណ្ឌ មេបញ្ជាការអាវុធហត្ថខណ្ឌ ប្រធានផ្សារអូរឫស្សី អញ្ជើញគោរពវិញ្ញាណក្ខន្ធសព លោក យ៉ាវ បូរ៉ា (ហៅ កែ តឿ) មន្ត្រីនគរបាលសណ្ដាប់ធ្នាប់ខណ្ឌ ៧មករា ដែលបានស្លាប់ដោយដួលផ្ងាក្រោយក្នុងពេលបំពេញភារកិច្ច កាលពីរសៀលថ្ងៃម្សិលមិញ។
គណ:ប្រតិភូសាលាខណ្ឌ៧មករា បានចូលរួមរំលែកទុក្ខយ៉ាងក្រៀមក្រំ សោកស្ដាយជាទីបំផុតជាមួយ ក្រុមគ្រួសារសព ដោយបានរៀបចំផ្កា និងបច្ច័យចំនួន ៣,៣០០,០០០រៀល និង ១១០ដុល្លារអាមេរិក នៅគេហដ្ឋានសព ស្ថិតនៅផ្ទះលេខ៣៤៩ ផ្លូវនរោត្តម សង្កាត់ទន្លេបាសាក់ ខណ្ឌចំការមន ។
នៅរសៀលថ្ងៃដដែលនេះ ឯកឧត្តម ហ៊ុន ម៉ាណែត និងលោកជំទាវ បានចាត់ឲ្យក្រុមការងារនាំយកថវិកា ចំនួន៣លានរៀល តាមរយៈចលនាយុវជនកម្ពុជា ក្រុម១៥៧ ត្រូវបាននាំយកមកជូនដល់ដៃភរិយាសព លោកវរសេនីយ៍ត្រី យ៉ាវ បូរ៉ា ផងដែរ។
សពលោក យ៉ាវ បូរ៉ា នឹងត្រូវដង្ហែ សពទៅកាន់ឈាបនដ្ឋាន វត្តនួនមុនីរាម (ហៅ វត្តថាន់) ដើម្បីធ្វើឈាបនកិច្ច និមន្តព្រះសង្ឃបង្សុកូល គោរពវិញ្ញាណខន្ធជាលើកចុងក្រោយ វេលាម៉ោង ៧ព្រឹក ថ្ងៃទី ១៦ ខែមីនា ឆ្នាំ២០១៦៕
ចំនួនអ្នកទស្សនា
- ថ្ងៃនេះ10411
- ម្សិលមិញ10851
- សប្តាហ៍នេះ76931
- ខែនេះ192081
- ឆ្នាំនេះ192081
- សរុប20634537