គជប៖ អ្នកពុំមានអត្តសញ្ញាណបណ្ណសញ្ជាតិខ្មែរ ក៏អាចចុះឈ្មោះបោះឆ្នោតបានដែរ
27-March-2016 | ដោយ មែន កំសត់
ភ្នំពេញ៖ ឯកឧត្តម ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត(គជប) បានបញ្ជាក់ថា គជប នឹងចែងជាបទបញ្ជា និងនីតិវិធី សម្រាប់អ្នកដែលពុំមានអត្តសញ្ញាណបណ្ណសញ្ជាតិខ្មែរ ក្នុងអំឡុងពេលចុះឈ្មោះបោះឆ្នោត ដោយត្រូវទៅសុំលិខិតបញ្ជាក់អត្តសញ្ញាណដើម្បីចុះឈ្មោះបោះឆ្នោត។
ឯកឧត្តម ស៊ិក ប៊ុនហុក បានលើកឡើងដូច្នេះ ក្នុងពេលជួបពិភាក្សាជាមួយលោកស្រី រ៉ូណា ស្មីត អ្នករាយការណ៍ពិសេស របស់អង្គការសហប្រជាជាតិ ទទួលបន្ទុកសិទ្ធិមនុស្ស ប្រចាំកម្ពុជា កាលពីថ្ងៃទី២៥ ខែមីនា ឆ្នាំ២០១៦។
គជបប្រកាសថា ក្នុងកិច្ចប្រជុំនោះ លោកស្រី រ៉ូណា ស្មីត បានចាប់អារម្មណ៍លើចំណុចមួយចំនួន រួមមាន៖ អត្តសញ្ញាណបណ្ណសញ្ជាតិខ្មែរដែលត្រូវប្រើប្រាស់ សម្រាប់ការចុះឈ្មោះបោះឆ្នោត និងបោះឆ្នោត ដែលមិនមែនជាសមត្ថកិច្ចរបស់គជប តើគជប មានដំណោះស្រាយយ៉ាងណាដើម្បីធានាសិទ្ធិចុះឈ្មោះអ្នកបោះឆ្នោត? សិទ្ធិចុះឈ្មោះបោះឆ្នោតរបស់ប្រជាពលរដ្ឋ ដែលធ្វើការនៅក្រៅប្រទេស និងអ្នកដែលផ្លាស់ទីលំនៅនៅក្នុងប្រទេស ការយកចិត្តទុកដាក់អប់រំដល់ជនជាតិដើមភាគតិច ការអប់រំជន ដែលមានពិការភាព និងការអប់រំដល់ស្ត្រី ផែនការអប់រំអ្នកបោះឆ្នោតនិងការអប់រំសាធារណជន របស់គជប ការដាក់ឲ្យមានស្ត្រីឲ្យបានច្រើនជាបេក្ខនារីសម្រាប់ការបោះឆ្នោត និងសុំកិច្ចសហការបន្តទៀត ជាមួយគជបដើម្បីជួបពិភាក្សាគ្នា នៅពេលលោកស្រី ធ្វើទស្សនកិច្ចមកកម្ពុជាលើកក្រោយ។
ចំណែកឯកឧតត្តម ស៊ិក ប៊ុនហុក ប្រធានគជប បានលើកឡើងថា ខាងក្រសួងមហាផ្ទៃ បញ្ជាក់ថា នឹងខិតខំធ្វើអត្តសញ្ញាណបណ្ណសញ្ជាតិខ្មែរជូនប្រជាពលរដ្ឋឲ្យបាន គ្រប់ៗគ្នា ប៉ុន្តែទោះជាយ៉ាងណាក៏ដោយ គជប នឹងចែងជាបទបញ្ជា និងនីតិវិធីសម្រាប់អ្នកដែលពុំមានអត្តសញ្ញាណបណ្ណសញ្ជាតិខ្មែរ ក្នុងអំឡុងពេលចុះឈ្មោះបោះឆ្នោត ត្រូវទៅសុំលិខិតបញ្ជាក់អត្តសញ្ញាណ ដើម្បីចុះឈ្មោះបោះឆ្នោត។
ឯកឧត្តម ស៊ិក ប៊ុនហុក បន្តថា ប្រជាពលរដ្ឋ ដែលធ្វើការនៅក្រៅប្រទេស ត្រូវមកចុះឈ្មោះបោះឆ្នោត និងបោះឆ្នោត នៅក្នុងប្រទេសកម្ពុជា។រីឯអ្នកដែលផ្លាស់ប្តូរទីលំនៅ គាត់មានសិទ្ធិចុះឈ្មោះបោះឆ្នោត នៅទីកន្លែង ដែលគាត់កំពុងស្នាក់នៅក្នុងឃុំសង្កាត់ ប្រសិនបើគាត់មិនចង់វិលត្រឡប់ទៅបោះឆ្នោត នៅស្រុកកំណើតរបស់គាត់។ គជប បានត្រៀមផលិតឯកសារអប់រំដល់ជនជាតិដើមភាគតិច ជនដែលមានពិការភាព និងស្ត្រី ហើយដែរ។ គជប មានផែនការច្បាស់លាស់ សម្រាប់អប់រំអ្នកបោះឆ្នោត និងសាធារណជន ជាពិសេសនឹងមានគម្រោងសុំកិច្ចសហការជាមួយក្រសួងអប់រំយុវជននិងកីឡា លើការងារនេះ។ ចំពោះការដាក់ឲ្យមានស្ត្រីជាបេក្ខនារី សម្រាប់ការបោះឆ្នោត មិនមែនជាសមត្ថកិច្ចរបស់គជបទេ។
ឯកឧត្តមស៊ិក ប៊ុនហុក ប្រធានគជប បានស្វាគមន៍ក្នុងការទទួលជួបជាមួយលោកស្រី រ៉ូណា ស្មីត ជាបន្តទៀត៕
ចំនួនអ្នកទស្សនា
- ថ្ងៃនេះ5291
- ម្សិលមិញ12921
- សប្តាហ៍នេះ5291
- ខែនេះ199891
- ឆ្នាំនេះ199891
- សរុប20642347