ACU បើកស្រោមសំបុត្រពិនិត្យទ្រព្យសម្បត្តិលោក កឹម សុខា
27-March-2016 | ដោយ មែន កំសត់
ភ្នំពេញៈ អង្គភាពប្រឆាំងអំពើពុករលួយ ACU កាលពីម្សិលមិញបានប្រកាសថាខ្សែអាត់សំឡេងចំនួន ៣៤ ខ្សែអាត់ដែលត្រូវបានគេផ្សព្វផ្សាយគឺពិតជាសំឡេងរបស់លោក កឹម សុខា ប្រធានស្តីទីគណបក្សសង្គ្រោះជាតិហើយ ACU បានចាប់ផ្តើមដំណើរការស៊ើបអង្កេតទៅលើសំណុំរឿងពុករលួយដោយចាប់ ផ្តើមពីការបើកស្រោមសំបុត្រប្រកាសទ្រព្យសម្បត្តិរបស់មេបក្ស ប្រឆាំងរូបនេះទៅតាមពាក្យបណ្តឹងរបស់ក្រុមនិស្សិត។
ក្រោយពីកិច្ចប្រជុំជិត ៣ ម៉ោង នៅ ACU កាលពីម្សិលមិញដើម្បីពិភាក្សាពីបញ្ហាផ្លូវច្បាប់លើសំឡេងខ្សែអាត់ ដែលគេសង្ស័យថា ជាសំឡេងលោក កឹម សុខា បានទិញដី និងផ្តល់លុយឱ្យស្រីស្នេហ៍នោះ ACU ឯកឧត្តមឱម យ៉ិនទៀង បានថ្លែងថាតាមរយៈការស្តាប់កិច្ចពិភាក្សារបស់មន្ត្រីបានបកស្រាយ អង្គភាពសម្រេចទទួលយកពាក្យបណ្តឹងរបស់យុវជនដើម្បីស៊ើបអង្កេតលើលោក កឹម សុខា ពាក់ព័ន្ធអំពើពុករលួយ។
ឯកឧត្តមបន្តថា៖ «ទី ១ បញ្ជាក់ថាខ្សែអាត់ដែលបែកធ្លាយនោះពិតជាសំឡេងរបស់លោក កឹម សុខា ទី ២ អ.ប.ព ទទួលយកពាក្យបណ្តឹងរបស់ប្អូនមកចាត់ការ និងមួយទៀតអង្គភាពបើកហើយសូមជម្រាប (បើកស្រោមសំបុត្រការប្រកាសទ្រព្យសម្បត្តិលោក កឹម សុខា)»។
ឯកឧត្តមថា៖ «លុយរបស់គាត់ដែលទិញផ្ទះឱ្យនាងហ្នឹងគាត់ប្រកាសក្នុងការប្រកាស ទ្រព្យសម្បត្តិបើសិនជាគាត់បានប្រកាសហើយចុះផ្ទះនោះគាត់បានលុយ មកពីណា? ត្រង់នេះហើយដែលត្រូវការធ្វើការស៊ើបអង្កេតហើយអ្នកណាមានអំណាចឱ្យ បើកស្រោមសំបុត្រប្រកាសទ្រព្យសម្បត្តិ គឺខ្ញុំ ឱម យ៉ិនទៀង នេះហើយ»។
លោក កឹម សុខា បានមកប្រកាសទ្រព្យសម្បត្តិចំនួនបីលើករួចមកហើយនៅ ACU ដោយលើកទី ១ ឆ្នាំ ២០១១ លើកទី ២ ឆ្នាំ ២០១៣ និងលើកទី ៣ ឆ្នាំ ២០១៥។ បើតាម ACU មុននឹងអង្គភាពសម្រេចបើកការស៊ើបអង្កេតទៅលើសំណុំរឿងពុករលួយរបស់ លោក កឹម សុខា គឺមន្ត្រីជំនាញរបស់អង្គភាពយ៉ាងតិច ៤០ នាក់បានខិតខំធ្វើការទាំងយប់ទាំងថ្ងៃដោយយកសំឡេងខ្សែអាត់ដែល ត្រូវបានគេផ្សព្វផ្សាយចំនួន ៣៤ ខ្សែអាត់ទៅផ្ទៀងផ្ទាត់ និងបានធ្វើរបាយការណ៍លើសំណុំរឿងនេះចំនួន ៦៣ ទំព័រ។
ប្រធាននាយកដ្ឋានបច្ចេកទេស និងកោសល្យវិច័យនៃ ACU លោក ជា សំអាត ថ្លែងថាលោកបានធ្វើកោសល្យវិច័យសំឡេងមាន ៤ ជំហានពោលស្រាវជ្រាវយកសំឡេងលោក កឹម សុខា ចេញពីវិទ្យុអាស៊ីសេរី VOA តាមប្រព័ន្ធហ្វេសប៊ុកទៅផ្ទៀងផ្ទាត់ខ្សែអាត់ដែលបានបែកធ្លាយវិភាគ សំឡេងស្រី មុំ ហៅ ខុម ចាន់ដារ៉ាទី ផ្ទៀងផ្ទាត់សំឡេងមានវ័យចំណាស់សំឡេងខ្សាវៗនិយាយមធ្យមមិនញាប់ និងមិនយឺតពេកចេញពីតំបន់ និងខេត្តមួយចំនួន។
លោកថា៖ «ក្នុងសំឡេងដែលយកធ្វើជាគំរូហ្នឹងគឺមាននិយាយពាក្យដូចគ្នាត្រូវ គ្នាជាមួយសំឡេងលោក កឹម សុខា ហើយគឺជាមនុស្សតែមួយ»។
ក្រោយការសម្រេចរបស់ ACU លោក ស្រី ចំរើន មេក្រុមនិស្សិតដែលបានដាក់ពាក្យប្តឹងថ្លែងថា៖ «ចម្លើយដូចបានឆ្លើយរួចរាល់ហើយគឺសមស្របនឹងអ្វីដែលខ្ញុំកំពុង ចង់បានចំណែកជាវិធានការបន្ទាប់ជាចំណាត់ការ និងនីតិវិធីរបស់ ACU លោកមានវិធានការយ៉ាងណាអនុលោមទៅតាមសមត្ថកិច្ចរបស់ ACU ដើម្បីចាត់វិធានការផ្លូវច្បាប់លើឯកឧត្តម កឹម សុខា»។
យ៉ាងណាក៏ដោយ លោកនៅតែទទូចឱ្យលោក កឹម សុខា ចេញមុខបកស្រាយសំឡេងជាមួយនារីក្នុងខ្សែអាត់នោះ៕
ចំនួនអ្នកទស្សនា
- ថ្ងៃនេះ4951
- ម្សិលមិញ12921
- សប្តាហ៍នេះ4951
- ខែនេះ199551
- ឆ្នាំនេះ199551
- សរុប20642007