ប្រជាពលរដ្ឋខេត្តកែប នាំគ្នាភ្ញាក់ផ្អើលរឿងទឹកសមុទ្រប្រែពណ៌ បណ្តាលឱ្យសត្វក្នុងសមុទ្រមួយចំនួន ងាប់ជាបន្តបន្ទាប់
02-April-2016 | ដោយ មែន កំសត់
ភ្នំពេញ៖ ប្រជាពលរដ្ឋខេត្តកែបបានឱ្យដឹងថា នៅថ្ងៃទី១ ខែមេសា ឆ្នាំ២០១៦នេះ ទឹកសមុទ្រនៅខេត្តកែប បានប្រែពណ៌ខុសពីធម្មតា ដោយមានពណ៌ទឹកឡើងលឿង ហើយបណ្តាលឱ្យសត្វសមុទ្រមួយចំនួន ដូចជាក្តាម បង្គារជាដើម ងាប់ជាបន្តបន្ទាប់។ ហេតុការណ៍នេះ បានបណ្តាលឱ្យប្រជាពលរដ្ឋមួយចំនួន មានភាពភ្ញាក់ផ្អើល។
ប្រជាពលរដ្ឋទាំងនោះ បានសម្តែងការព្រួយបារម្ភអំពីផលប៉ះពាល់ផ្សេងៗ សម្រាប់ភ្ញៀវទេសចរណ៍ ក៏ដូចជា អ្នកទៅកម្សាន្តនៅមាត់សមុទ្រខេត្តកែប ដោយសារតែទឹកសមុទ្រមានក្លិនឆ្អាប ហើយរមាស់។ ពួកគេសង្ស័យថា ទឹកសមុទ្រនេះមានសារធាតុមិនល្អ។
ជុំវិញបញ្ហានេះ អាជ្ញាធរខេត្តកែប បានអះអាងថា មន្ត្រីជំនាញបរិស្ថាន និងមន្ត្រីជលផល កំពុងធ្វើការត្រួតពិនិត្យតាមដានលើករណីនេះយ៉ាងយកចិត្តទុកដាក់ ។ ប្រភពខាងលើ បាននិយាយថា ការដែលធ្វើឱ្យទឹកសមុទ្រឡើងពណ៌លឿងពេលនេះ អាចមានប្រភពមកពីតំបន់ព្រែកចាកជិតបង្គោលព្រំដែន៣១៤។
ទោះជាយ៉ាងណា អាជ្ញាធរ មិនទាន់ដឹងថា ទឹកសមុទ្រពណ៌លឿងនេះ មានសារធាតុពុល ឬអត់នោះទេ ដោយអះអាងថា នឹងធ្វើការវិភាគឱ្យបានច្បាស់លាស់៕
ចំនួនអ្នកទស្សនា
- ថ្ងៃនេះ511
- ម្សិលមិញ5781
- សប្តាហ៍នេះ6301
- ខែនេះ200901
- ឆ្នាំនេះ200901
- សរុប20643357