ឯកឧត្ដម ម៉ម ប៊ុនហេងចូលរួម បើកកម្មវិធីសប្បុរសធម៌ និស្សិតសាកលវិទ្យាល័យវិទ្យាសាស្ត្រសុខាភិបាល
08-April-2016 | ដោយ មែន កំសត់
ភ្នំពេញ ៖ នៅព្រឹកថ្ងៃទី០៧ ខែមេសា ឆ្នាំ២០១៦ នៅសាកលវិទ្យាល័យវិទ្យាសាស្ត្រសុខាភិបាល បានប្រារព្ធកម្មវិធីសប្បុរសធម៌ និស្សិតសាកលវិទ្យាល័យវិទ្យាសាស្ត្រសុខាភិបាល ក្រោមវត្តមាន ឯកឧត្ដមវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានក្រុមប្រឹក្សាភិបាលសាកលវិទ្យាល័យវិទ្យាសាស្ត្រសុខាភិបាល។
ឯកឧត្ដម បានកោតសរសើរចំពោះនិស្សិតសាកលវិទ្យាល័យវិទ្យាសាស្ត្រសុខាភិបាល ដែលជានិស្សិតឆ្នើមទាំងការសិក្សា ទាំងក្នុងសកម្មភាពកីឡា និងការងារមនុស្សធម៌។ ឯកឧត្ដម មានមោទនភាពដោយឃើញនិស្សិត ដែលបាបញ្ចប់ពីសាកលវិទ្យាល័យវិទ្យាសាស្ត្រសុខាភិបាល ទទួលបាននូវចំណេះដឹងជំនាញ និងឥរិយាបថល្អមានការទទួលខុសត្រូវលើវិជ្ជាជីវៈខ្ពស់ ការចូលរួមក្នុងសកម្មភាពសង្គម និងសកម្មភាពមនុស្សធម៌នានា ពិសេសបានចូលរួមក្នុង សកម្មភាពមនុស្សធម៌ នៃសមាគមគ្រូពេទ្យស្ម័គ្រចិត្តយុវជនសម្ដេចតេជោ ហើយថ្ងៃនេះនិស្សិត បានចូលរួមយ៉ាងច្រើនកុះករក្នុងកម្មវិធីមនុស្សធម៌មួយទៀតនៃ និស្សិតសាកលវិទ្យាល័យវិទ្យាសាស្ត្រសុខាភិបាល ដែលបង្ហាញអំពីការស្រលាញ់ ចេះជួយចែករំលែកដល់និស្សិតខ្វះខាត ស្របតាមប្រធានបទយុវជន និងវប្បធម៌ចែករំលែក។
តាមរបាយការណ៍របស់ ឯកឧត្ដម សាស្ត្រាចារ្យ សាផុន វឌ្ឍនៈ សាកលវិទ្យាធិការនៃសាកលវិទ្យាល័យវិទ្យាសាស្ត្រសុខាភិបាល បានបង្ហាញថា ឆ្នាំនេះជាលើកទីពីរហើយដែលសមាគមនិស្សិតសាកលវិទ្យាល័យវិទ្យាសាស្ត្រ សុខាភិបាលរៀបចំកម្មវិធីសប្បុរសធម៌ ហើយឆ្នាំនេះមានការចូលរួមពីសមាគមគ្រូពេទ្យស្ម័គ្រយុវជនសម្ដេចតេជោ និងដៃគូអភិវឌ្ឍន៍ ស.វ.ស ចំនួន១៣ក្រុមហ៊ុន/អង្គភាព សមាគម សមាគមនិស្សិត និស្សិតទាំងអស់នៃសាកលវិទ្យាល័យ ដែលបានចូលរួមជាសកម្មភាពលក់ដូរទំនិញផ្សេងៗ មានពិព័រណ៍សម្ភារៈ ការប្រគំតន្ត្រីដោយក្រុមនិស្សិត ការលេងល្បែងប្រជាប្រិយនានា និងអាហារដែលជាស្នាដៃរបស់ សមាគមនិស្សិត និងនិស្សិតសាកលវិទ្យាល័យវិទ្យាសាស្ត្រសុខាភិបាល។សូមបញ្ជាក់ផងដែរថា កម្មវិធីសប្បុរសធម៌និស្សិតសាកលវិទ្យាល័យវិទ្យាសាស្ត្រសុខាភិបាល លើកទី១បានរៀបចំនៅថ្ងៃទី០៧ ខែមេសាឆ្នាំ២០១៤ ប្រមូលបានថវិកាបានជាង១៤លានរៀលសដើម្បីជួយដល់និស្សិតខ្វះខាត ចំនួន០៧រូបសម្រាប់បង់ថ្លៃសិក្សា។
ជាចុងក្រោយគណៈអធិបតី សាស្ត្រាចារ្យ និងភ្ញៀវកិត្តិយសបានអញ្ជើញទស្សនាស្តង់ពិព័រណ៍ សមាគមគ្រូពេទ្យស្ម័គ្រចិត្តយុវជនសម្ដេចតេជោ និងស្តង់ដទៃទៀតព្រមទាំងបានថតរូបអនុស្សាវរីយ៍ដែលបង្ហាញអំពី ការចូលរួមលើកស្ទួយសកម្មភាពសប្បុរសធម៌ មនុស្សធម៌នៅក្នុងសង្គម និងការលើកទឹកចិត្តឲ្យយុវជនចូលរួមអោយកាន់តែសកម្មនៅក្នុងកិច្ច ការងារសង្គម ៕
ចំនួនអ្នកទស្សនា
- ថ្ងៃនេះ1981
- ម្សិលមិញ5781
- សប្តាហ៍នេះ7771
- ខែនេះ202371
- ឆ្នាំនេះ202371
- សរុប20644827