​ភ្នំពេញ ៖ រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ ដែល​ទើប​ឡើងកាន់តំណែង គ្រោង​ស្នើសុំ​រាជរដ្ឋាភិបាល​កម្ពុជា​អនុញ្ញាត​ឲ្យ​ប្រជាពលរដ្ឋ​ខ្មែរ ចិញ្ចឹម​ត្រី​ឆ្តោរ​ឡើងវិញ ដើម្បី​កាត់បន្ថយ​ការនាំ​ចូល​ត្រី​មកពី​ក្រៅប្រទេស និង ធ្វើ​ឲ្យ​សេដ្ឋកិច្ច​ប្រជាពលរដ្ឋ​មាន​ភាពល្អប្រសើរ​ជាង​មុន​។​

​ឯកឧត្តម វេ​ង សាខុន រដ្ឋមន្ដ្រី​ក្រសួងកសិកម្ម រុក្ខាប្រមាញ់​និង​នេសាទ បាន​ថ្លែង​បង្ហាញ​ពី​គម្រោង​ស្នើសុំ​រាជរដ្ឋាភិបាល​ឲ្យ​ប្រជាពលរដ្ឋ ចិញ្ចឹម​ត្រី​ឆ្តោរ​ឡើងវិញ​នេះ ក្នុងឱកាស​ដែល​រូប លោក​ចូលរួម​សំណេះសំណាល​ជាមួយ​មន្ត្រី​មន្ទីរ​កសិកម្ម ខណ្ឌ​រដ្ឋបាល​ព្រៃឈើ​និង​ខណ្ឌ​រដ្ឋបាល​ជលផល​ខេត្តសៀមរាប​នៅ​ព្រឹក​ថ្ងៃ ទី​២០ ខែមេសា ឆ្នាំ​២០១៦​។​

​គួរ​បញ្ជាក់ថា រាជរដ្ឋាភិបាល​កម្ពុជា​ធ្លាប់​បានចេញ​សារា​ចរណ៍​ហាមប្រាម​មិន​ឲ្យ ប្រជាពលរដ្ឋ​ខ្មែរ​ចិញ្ចឹម​ត្រី​ឆ្តោ​នោះឡើយ ដោយមាន​ហេតុផល​ថា ការចិញ្ចឹម​ត្រី​ឆ្តោ​នេះ នាំ​ឲ្យ​មានការ​ចាប់​កូន​ត្រី​តូច​យកទៅ​ធ្វើជា​ចំណី​ត្រី​ឆ្តោ ដែលជា​បំផ្លាញ​ធនធាន​ត្រី​ក្នុង​ទឹកសាប​។​

​ឆ្លើយតប​បញ្ហា​នេះ ឯកឧត្តម វេ​ង សាខុន បាន​ពន្យល់ថា ការចិញ្ចឹម​ត្រី​ឆ្តោរ មិន​រំពឹង​ទៅលើ​ចំណី​ជា​កូន​ត្រី​នោះទេ គឺ​ត្រូវ​ចេះ​ធ្វើ​ចំណី​ឲ្យ​ត្រី ឆ្តោ​ស៊ី​។ លោក​បន្តថា ប្រទេស​គេ​អាចធ្វើ​បាន ដូច្នេះ​កម្ពុជា ក៏​អាចធ្វើ​បានដែរ​៕

​