សម្ដេចតេជោ សំណេះសំណាលជាមួយ កម្មករកម្មការនី បុគ្គលិកកំពង់ផែស្វយ័តក្រុងព្រះសីហនុ
01-May-2016 | ដោយ មែន កំសត់
ភ្នំពេញ ៖ អញ្ជើញថ្លែងក្នុងទិវាពលកម្មអន្តរជាតិលើកទី១៣០នាព្រឹកថ្ងៃទី០១ ឧសភានេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា៖ប្រទេសកម្ពុជា មានការសប្បាយរីករាយ តែបែរជាមានអ្នកខ្លះថាប្រទេសកម្ពុជា កំពុងមានវិបត្តិ ហើយបើបរទេសណានិយាយថា ប្រទេសកម្ពុជាមានវិបត្តិសុំមើលប្រទេសខ្លួនឯងមើល តើវាយ៉ាងម៉េច? ដូចជានៅប្រទេសអឺរ៉ុបមានការវាយប្រហារភេរវកម្ម វិបត្តិជនភៀសខ្លួនជាដើម។
សម្ដេចតេជោ ប្រមុខរាជរដ្ឋាភិបាលកម្ពុជា មានប្រសាសន៍បែបនេះ ខណៈអញ្ជើញជាអធិបតី ដ៏ខ្ពង់ខ្ពស់ ក្នុងទិវាពលកម្មអន្តរជាតិខួបលើកទី១៣០នៅកំពុងផែខេត្តព្រះសីហនុ ដែល មានកម្មករ កម្មការនីចូលរួមប្រមាណជាង១.០០០នាក់។
ទាក់ទងនឹងការថ្លែងប្រៀបធៀប រវាងកម្ពុជា និងបណ្ដាប្រទេសមួយចំនួនដែលកំពុងមានវិបត្តិភេរវកម្ម និងបញ្ហាជនភៀសខ្លួនដែលនាំឱ្យទៅដល់បាត់បង់សិទ្ធិជនស៊ីវិលនោះ សម្ដេចបន្តថា កម្ពុជាគឺគ្រាន់តែប្រឆាំងជាមួយនឹងពួកអានាធិបតេយ្យតែប៉ុណ្ណោះ ព្រោះកាលណាមិនមែននីតិរដ្ឋហើយ គឺជាអានាធិបតេយ្យ ។
សម្ដេចបន្តថា៖ ប្រជាធិបតេយ្យត្រូវអមដោយនីតិរដ្ឋ ហើយព្រំដែនរបស់អ្នកសេរីភាពរបស់អ្នកត្រូវមានព្រំដែនជាមួយនឹង សេរីភាពរបស់អ្នកដទៃ។ សម្ដេចបញ្ជាក់ថា៖អ្នករំលោភ អ្នកត្រូវទទួលខុសត្រូវចំមុខច្បាប់ ហើយយើងចាត់វិធានការមិនឱ្យខកខាន ដើម្បីការពារនូវកិត្តិយស សេចក្តីថ្លៃថ្នូរ របស់គណបក្សប្រជាជន និងរាជរដ្ឋាភិបាលរបស់យើង។ ក្នុងន័យនេះ សម្ដេចតេជោ បានស្នើបរទេសសុំកុំលូកដៃចូលកិច្ចការផ្ទៃក្នុងកម្ពុជា កម្ពុជាមិនបាន លូកលាន់ចូលកិច្ចការផ្ទៃក្នុងរបស់ប្រទេសអ្នកដទៃទេ តែសុំអ្នកដទៃគោរពនូវឯករាជ្យ អធិបតេយ្យភាព និងបូរណភាពទឹកដីរបស់កម្ពុជា។
សម្ដេចតេជោបន្តថា អ្នកធ្លាប់តែនិយាយថា សូមឱ្យបែងចែកអំណាច នីតិប្បញ្ញត្តិ នីតិប្រតិបត្តិ និងតុលាការ ក៏ប៉ុន្តែអ្នកកំពុងធ្វើ កំពុងដាក់សំពាធខ្លះ មកឱ្យយើង ដើម្បីបំពានអំណាចរបស់តុលាការ អ្នកកំពុងធ្វើខុសខ្លួនឯង ប៉ុន្តែសំណាងហើយដែលអ្នក មិនបានជួបខ្ញុំផ្ទាល់ ព្រោះបើអ្នកជួបខ្ញុំផ្ទាល់ អ្នកនឹងទទួលរងនូវការអាមាសដែលខ្ញុំនឹងស្តីឱ្យនៅចំពោះមុខ ។ នេះ ជាប្រសាសន៍របស់សម្ដេច ដោយសម្ដេចលើកឡើងថា សម្ដេចមិនដែលអត់ឱ្យអ្នកណានោះទេ សូម្បីតែប្រធានាធិបតីសហរដ្ឋអាមេរិក បារ៉ាក់ អូបាម៉ា និយាយជាមួយសម្ដេចកាលពីឆ្នាំ២០០២ សម្ដេចមានប្រសាសន៍ទៅកាន់ ប្រធានាធិបតី សហរដ្ឋអាមេរិក បារ៉ាក់ អូបាម៉ា ថា ស្រុកខ្មែរ អត់មានអ្នកទោសនយោបាយទេ គឺមានតែអ្នកទោសនយោបាយជាប់គុកព្រហ្មទណ្ឌ តែ ប៉ុណ្ណោះ។
ជាមួយនឹងសិទ្ធិសេរីភាពរបស់កម្ម ករ និងការប្រារព្ធទិវាពលកម្មអន្តរជាតិ ខួបលើកទី១៣០នេះដែរ សម្ដេចតេជោ ហ៊ុន សែន ក៏មានប្រសាសន៍ថា ឆ្នាំនេះ គឺជាឆ្នាំខួបលើកទី២០ នៃការសន្យា និងការអនុវត្តជាមួយគ្នា ចាប់តាំងពីឆ្នាំ១៩៩៦ រហូតដល់ឆ្នាំ ២០១៦នេះ ដែលសម្ដេចបានចុះ មកកាន់កំពុងផែខេត្តព្រះសីហនុ ជាបន្តបន្ទាប់ ប៉ុន្តែ រយៈពេលពេលប៉ុន្មានឆ្នាំចុងក្រោយនេះ គឺត្រូវបានតំណាងដោយឯកឧត្តម អតីតឧបនាយករដ្ឋមន្ត្រី គាត ឈន់ ។
ប៉ុន្តែថ្ងៃនេះ សម្ដេច ពិតជាមានសេចក្តីរីករាយ ជាថ្មីម្តងទៀត ដែលបានមកជួបជុំជាមួយនឹងកម្មករ នៅកំពុងផែ ស្វយ័តក្រុងព្រះសីហនុនេះ ប្រចាំឆ្នាំ ដើម្បីតំណាងឱ្យការជួបជុំកម្មករ កម្មការិនីនៅទូទាំងប្រទេសដោយសម្ដេចបានផ្ញើនូវការជូនពរ ដល់កម្មករ កម្មការិនី នៅទូទាំងប្រទេសទាំងអស់ ហើយសង្ឃឹមថា កម្មករ កម្មការិនីដ៏ច្រើនកុះករ រាប់រយរោងចក្រ សហគ្រាស នឹងខិតខំ និងមានការរៀបចំសប្បាយរីករាយ រហូតដល់មានប្រឡងបវរកញ្ញាប្រឡងផ្តាច់ព្រ័ត្រ នៅថ្ងៃនេះតែម្តង។
សម្ដេចបន្តថា ពិតមែនហើយ នៅក្នុងកម្មករ ទិវាពលកម្មអន្តរជាតិតែងតែ មានការហែក្បួន ធំៗ នៅក្នុងប្រទេសនានា លើពិភពលោក ហើយនៅកម្ពុជា របស់យើងក៏មាន ការហែក្បួន មួយចំនួនដោយមនុស្សមួយក្រុម រាប់សិបនាក់ ឬ រាប់រយនាក់ នៅទីក្រុងភ្នំពេញ ក៏ប៉ុន្តែធាតុអាកាស ក្តៅណាស់ ដូច្នេះ អ្នកហែក្បួននោះ ប្រហែលជាគេចទៅរកហាងកាហ្វេ ផងក៏មិនដឹង!។ ប៉ុន្តែទោះជាយ៉ាងណាក៏ដោយ បរិយាកាសបែបនេះ បានបង្ហាញឱ្យឃើញថា សុខសន្តិភាព កំពុងគ្របដណ្ដប់ នៅលើទឹកដី នៃព្រះរាជាណាចក្រកម្ពុជា ហើយរបាយការណ៍ ពីអ្នកនយោបាយខ្លះ បានថ្វាយទៅព្រះមហាក្សត្រថា ប្រទេសកម្ពុជា គឺកំពុងស្ថិតនៅក្នុងវិបត្តិវាមិនមែនជារឿងពិតនោះទេសូមឱ្យគេ ពិនិត្យមើលឱ្យច្បាស់, ខ្លួនគេទេ ដែលកំពុងតែដើរលេងនោះទេ ៕
ចំនួនអ្នកទស្សនា
- ថ្ងៃនេះ931
- ម្សិលមិញ3811
- សប្តាហ៍នេះ14511
- ខែនេះ209111
- ឆ្នាំនេះ209111
- សរុប20651567