សម្តេចតេជោអញ្ជើញជាអធិបតីកាត់ឬសសីមាព្រះវិហារ នៅស្រុកកងមាស ខេត្តកំពង់ចាម
05-May-2016 | ដោយ មែន កំសត់
ខេត្តកំពង់ចាម៖"ខ្ញុំសប្បាយចិត្តណាស់ ដែលបានមកបញ្ចុះខ័ណ្ឌសីមាព្រះវិហារ វត្តកែវមុនី ហៅវត្តថ្មី ស្ថិតនៅឃុំអង្គរបាន ស្រុកកងមាសខេត្តកំពង់ចាម។ ទន្ទឹមនឹងនេះដែរ ខ្ញុំបានឃើញបងប្អូនខ្មែរឥស្លាមក៏មកចូលរួមជាមួយផងដែរ។ ខ្ញុំសូមអរគុណបងប្អូនប្រជាពលរដ្ឋ លោកយាយលោកតានិងក្មួយៗយុវជន ដែលមកទទួលខ្ញុំដោយទឹកមុខរីករាយរាក់ទាក់។ នេះជាសុខដុមនីយកម្មនៃជនជាតិ និងសាសនានៃប្រជាពលរដ្ឋយើង"។នេះសារក្នុងFacebookរបស់សម្តេចតេ ជោនៅព្រឹកថ្ងៃព្រហស្បត៍ទី៥ឧសភានេះ ចំពេលដែលសម្តេចអញ្ជើញជាអធិបតីកាត់ឬសសីម៉ាព្រះវិហារ ក្នុងវត្តកែវមុនី (ហៅវត្តអង្គរបាន) នៅឃុំអង្គរបាន ស្រុកកងមាស ខេត្តកំពង់ចាម នាព្រឹកនេះ។
សម្តេចតេជោ បានសរសេរបន្តថា៖ដោយសារសន្តិភាព ទើបយើងមានឱកាសអភិវឌ្ឍប្រទេសនិងបានកសាងវត្តអារាមដ៏ធំបែបនេះ ដើម្បីបម្រើវិស័យពុទ្ឋសាសនាហើយក៏ជាកន្លែងសម្រាប់ស្នាក់អាស្រ័យ ដ៏សមរម្យរបស់មនុស្សចាស់ យុវជន និងកុមារ។
តាមដងផ្លូវនៃ ការធ្វើដំណើរខ្ញុំពិនិត្យឃើញការកើនឡើងនៃជីវភាពប្រជាជនតាមរយៈ លំនៅដ្ឋានថ្មី មធ្យោបាយធ្វើដំណើរ អង់តែនទូរទស្សន៍តាមផ្ទះ ការប្រើប្រាស់អគ្គិសនីស្ទើរគ្រប់ផ្ទះ ការលក់ដូរយ៉ាងសកម្ម សម្លៀកបំពាក់សមរម្យ។ល។
ជាមួយភាពល្អប្រសើរនៃជីវភាពគ្រួសារ នីមួយៗ ផ្នែកសាធារណ:ក៏បានលើកកំពស់ ផ្លូវ ស្ពានធំនិងល្អជាងមុន សាលារៀន មន្ទីរពេទ្យ វត្តអារ៉ាម ក៏ល្អស្អាតជាងពេលមុនតែយើងក៏ត្រូវប្រឹងប្រែងបន្តទៀតដើម្បីឆ្លើយតប ជាមួយនឹងតម្រូវការរបស់ប្រជាជនពិសេសក្មួយយុវជនដែលមានតម្រូវការ កាន់តែច្រើននិងកាន់តែខ្ពស់"។
ក្នុងពិធីនេះដែរ សម្តេចតេជោ ហ៊ុន សែន បានថ្លែងចាប់អារម្មណ៍ថា រហូតមកដល់ពេលនេះ មិនទាន់មានបក្សនយោបាយក្រៅរដ្ឋាភិបាលណាមួយ ចេញធ្វើសកម្មភាពជួយដោះស្រាយបញ្ហាខ្វះខាតទឹកជូនប្រជាពលរដ្ឋនោះឡើយ ក្រៅតែពីគណបក្សប្រជាជនកម្ពុជាដូច្នេះសម្តេចលែងហ៊ានអំពាវនាវដល់ បក្សនយោបាយដទៃទៀត ឲ្យចុះជួយប្រជាពលរដ្ឋជួបគ្រោះខ្វះខាតទឹក ប្រើប្រាស់ទៀតហើយ ព្រោះមកដល់ពេលនេះមិនទាន់ឃើញមានបក្សនយោបាយណាមួយ ចូលរួមធ្វើសកម្មភាពចែកទឹកជូនប្រជាពលរដ្ឋនោះទេ សូម្បីការផ្តល់កម្លាំងចិត្តក៏គ្មានដែរ។
ទន្ទឹមនិងនេះ សម្តេចតេជោ ហ៊ុន សែន បានអំពាវនាវដល់សមាជិក សមាជិកបក្សប្រជាជនកម្ពុជាទាំងអស់បន្តការងារជួយសង្គ្រោះប្រជាពលរដ្ឋ ពីគ្រោះខ្វះទឹកប្រើប្រាស់ រហូតដល់មានទឹកគ្រប់គ្រាន់៕
ចំនួនអ្នកទស្សនា
- ថ្ងៃនេះ1541
- ម្សិលមិញ3811
- សប្តាហ៍នេះ15121
- ខែនេះ209721
- ឆ្នាំនេះ209721
- សរុប20652177