ក្រសួងពង្រឹងវិធានការទប់ស្កាត់ការដឹកជញ្ជូនលើសចំណុះធ្វើឲ្យខូចផ្លូវ
15-May-2016 | ដោយ មែន កំសត់
ភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន ឯកឧត្តម ស៊ុន ចាន់ថុល ព្រមានចាត់វិធានការក្តៅទៅលើមន្ត្រីនៅតាមស្ថានីយជញ្ជីងថ្លឹង រថយន្តនៅទូទាំងប្រទេសដែលអនុញ្ញាតឲ្យរថយន្តដឹកជញ្ជូនលើស ទម្ងន់កំណត់ធ្វើចរាចរណ៍លើដងផ្លូវបណ្តាលឲ្យខូចខាតផ្លូវ និងណែនាំដល់មន្ត្រីក្រោមឱវាទពង្រឹងវិធានការត្រួតពិនិត្យទៅលើ យានដ្ឋានជួលជុល និងកែច្នៃដំឡើងយានយន្តជិត ២០០០ កន្លែងដែលនៅមិនទាន់ចុះបញ្ជី។
នៅក្រោយកិច្ចប្រជុំពិភាក្សាលើការពង្រឹងវិធានការទប់ស្កាត់ យានយន្តដឹកជញ្ជូនលើសទម្ងន់កម្រិតកំណត់ និងការកែច្នៃដំឡើងយានយន្តខុសស្តង់ដារបច្ចេកទេសនៅក្រសួង សាធារណការឯកឧត្តមទេសរដ្ឋមន្ត្រី ស៊ុន ចាន់ថុល បានថ្លែងថាមួយឆ្នាំៗរដ្ឋាភិបាលចំណាយលុយជួសជុល និងថែទាំផ្លូវ និងស្ពានអស់ជាង ១០០ លានដុល្លារព្រោះតែការដឹកជញ្ជូនលើសទម្ងន់កំណត់ និងការកែច្នៃយានយន្តខុសស្តង់ដារបច្ចេកទេស។
ឯកឧត្តមបានណែនាំដល់មន្ត្រីក្រោមឱវាទ និងអាជ្ញាធរពាក់ព័ន្ធត្រូវត្រួតពិនិត្យទប់ស្កាត់ និងបង្ក្រាបការដឹកទំនិញហួសកំណត់ឲ្យបានតឹងរ៉ឹងជាពិសេស មន្ត្រីនៅតាមស្ថានីយជញ្ជីងថ្លឹងរថយន្តនិមួយៗបើពុំនោះទេក្រសួង នឹងដាក់ពិន័យជាទឹកប្រាក់ ឬប្រើវិន័យរដ្ឋបាលទៅលើមន្ត្រីដែលអនុញ្ញាតឲ្យរថយន្តដឹកលើស កំណត់បន្តធ្វើចរាចរណ៍ទៅមុខទៀតបណ្តាលឲ្យខូចខាតផ្លូវ និងស្ពាន។
ឯកឧត្តមថា «យើងត្រូវតែមាននីតិវិធីពិន័យមន្ត្រីរបស់យើងមិនអាចអនុញ្ញាត ឲ្យគាត់ស៊ីសស៊ុសគ្នាឲ្យឡានហ្នឹងដឹកធ្វើឲ្យខូចផ្លូវអស់ទេ យើងនឹងទប់ស្កាត់ឲ្យដល់ឫសគល់តែម្តង»។
បច្ចុប្បន្នក្រសួងមានជញ្ជីងចល័តថ្លឹងរថយន្តចំនួន ២៤ គ្រឿងហើយក្រសួងគ្រោងនឹងដាក់ជញ្ជឹងចល័តបន្ថែមទៀតនៅទូទាំង ប្រទេស និងរៀបចំប្រព័ន្ធ GPS ដើម្បីពិនិត្យ និងទប់ស្កាត់ការដឹកជញ្ជូនលើសកំណត់។ ចំណែកយានដ្ឋានជួសជុល និងកែច្នៃដំឡើងរថយន្តគិតត្រឹមឆ្នាំ ២០១៥ មានចំនួន ២៦៣៣ យានដ្ឋានក្នុងនោះមាន ៧១០ យានដ្ឋានចុះបញ្ជីរួច និង ១៩៣៣ យានដ្ឋាន មិនទាន់ចុះបញ្ជី។
ឯកឧត្តមស៊ុន ចាន់ថុល ក៏បានបញ្ជាដល់មន្ត្រីក្រោមឱវាទចុះត្រួតពិនិត្យ និងណែនាំដល់ម្ចាស់យានដ្ឋានជួលជុល និងកែច្នៃរថយន្តដែលមិនទាន់ចុះបញ្ជីត្រូវចុះបញ្ជីតាមនីតិវិធី ច្បាប់នៅក្រសួង ឬនៅមន្ទីរសាធារណការ និងដឹកជញ្ជូន។ ចំណែកក្រុមហ៊ុនដឹកជញ្ជូនទាំងអស់ត្រូវរៀបចំរថយន្តដឹកទំនិញ របស់ខ្លួនឲ្យត្រូវតាមស្តង់ដារដែលបានកំណត់ដោយច្បាប់បើពុំ នោះទេនឹងប្រឈមការផាកពិន័យ ឬឈានដល់ការបិទក្រុមហ៊ុនតែម្តង។
ទាក់ទងករណីនេះអភិបាលរងសាលារាជធានីភ្នំពេញ លោក ស៊ុយ ធារិទ្ធ បានលើកឡើងថា កន្លងមកសាលារាជធានីធ្លាប់បានចេញគោលការណ៍កំណត់ប្រភេទយានយន្ត ដែលអនុញ្ញាតឲ្យចូលក្រុងត្រួតពិនិត្យរថយន្តកែច្នៃខុសបច្ចេកទេស និងកំណត់ម៉ោងធ្វើចរាចរណ៍រថយន្តធុនធំ ប៉ុន្តែការគ្រប់គ្រងនៅមានភាពស្មុគស្មាញដោយសារអាជ្ញាធរនៅមិន ទាន់មានចំណាត់ការច្បាស់លាស់ការយល់ដឹងផ្នែកច្បាប់នៅមាន កម្រិតហើយមាន
សមត្ថកិច្ចមួយចំនួនបានឃុបឃិតគ្នាជាមួយក្រុមហ៊ុនដឹក ជញ្ជូនអនុញ្ញាតឲ្យមានការដឹកលើសចំណុះជាដើម។
ទោះយ៉ាងណាលោកស្នើថា «បើយកល្អរថយន្ត [ដឹកទំនិញ] កុំឲ្យមានការកែច្នៃបើកែច្នៃនឹងខុសស្តង់ដារអន្តរជាតិហើយ»។
នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជាលោក សន ជ័យ យល់ថាវិធានការទាំងនេះពុំមានអ្វីថ្មីនោះទេដោយលោកជំរុញ ឲ្យក្រសួងគួរតែមានការត្រួតពិនិត្យ និងកំណត់លក្ខខណ្ឌឲ្យច្បាស់លាស់ចំពោះរថយន្តដឹកទំនិញ និងដឹកដីធំៗដែលដឹកលើសចំណុះ និងជ្រុះកម្ទេចដីពេញផ្លូវបណ្តាលឲ្យខូចផ្លូវ និងបង្កគ្រោះថ្នាក់ដល់ពលរដ្ឋ។
លោកបានជំរុញឲ្យក្រសួងចាត់វិធានការទៅលើករណីចាស់ៗដែលបង្ក ឲ្យខូចផ្លូវ និងស្ពានដូចជាករណីនៅស្ពានអ្នកលឿងជាដើមមុននឹងមានវិធានការ ថ្មីបន្ថែមទៀត៕
ចំនួនអ្នកទស្សនា
- ថ្ងៃនេះ2661
- ម្សិលមិញ4001
- សប្តាហ៍នេះ20251
- ខែនេះ214851
- ឆ្នាំនេះ214851
- សរុប20657307