សម្តេចក្រឡាហោម ស ខេង៖ ប្រឆាំងដាច់ខាតការកេងចំណេញពីរបបប្រជាធិបតេយ្យសេរីពហុបក្ស
17-May-2016 | ដោយ មែន កំសត់
ភ្នំពេញ ៖ សម្ដេចក្រឡាហោមស ខេង ឧបនាយករដ្ឋមន្ត្រី និងជារដ្ឋមន្ដ្រីក្រសួងមហាផ្ទៃបានលើកឡើងថាយើងប្រឆាំងដាច់ខាតចំពោះ អ្នកទាំងឡាយណាដែលយករបបប្រជាធិបតេយ្យសេរីពហុបក្សកេងចំណេញសម្រាប់ បុគ្គលនិងគណបក្ស ពីព្រោះថា របបប្រជាធិបតេយ្យសេរីពហុបក្ស គឺជារបស់យើងទាំងអស់គ្នា ហើយជាធាតុស្នូលនៃនិរន្តរភាពរបស់ជាតិកម្ពុជាដែលមិនអាចអ្នកណា ប្រើប្រាស់ជាឧបករណ៍របស់បក្សមួយឬបុគ្គលណាម្នាក់ឡើយ។
ការលើកឡើងរបស់សម្តេចក្រឡា ហោម ស ខេង ខណៈដែលសម្តេចបានអញ្ជើញធ្វើជាអធិបតីនៅក្នុងពិធីមិទ្ទិញអបអរសាទរ ខួបអនុស្សាវរីយ៍លើកទី៧១ ថ្ងៃកំណើតនគរបាលជាតិកម្ពុជា១៦ ឧសភា ១៩៥៤-១៦ ឧសភា ២០១៦ កាលពីព្រឹកថ្ងៃទី១៦ ខែឧសភាឆ្នាំ២០១៦កន្លងមកនេះនៅទីស្តីការក្រសួងមហាផ្ទៃ។
សម្តេចក្រឡាហោមស ខេង បានមានប្រសាសន៍ថា ដំណើរការបោះឆ្នោត ដំណើរការកសាងលទ្ធិប្រជាធិបតេយ្យសេរីពហុបក្សនេះ គឺជារបបនយោបាយតែមួយគត់ដែលសមស្របសម្រាប់កម្ពុជាគ្មានរបបនយោបាយ ណាដែលសមស្របជាងដែលយើងប្រកាន់យកនេះទេ។ ការលើកយកចំណុចនេះមកនិយាយ គឺដើម្បីឲ្យអ្នកទាំងអស់គ្នាចាប់អារម្មណ៍ហើយចូលរួម ដើម្បីពង្រឹងរបបប្រជាធិបតេយ្យសេរីពហុបក្សនេះ តទៅទៀត។
សម្តេចក្រឡា ហោម បានបញ្ជាក់ថា “យើងប្រឆាំងជំទាស់ដាច់ខាតចំពោះអ្នកទាំងឡាយណាដែលប្រើប្រាស់របប នេះគ្រាន់តែជាការក្លែងបន្លំគេងយកចំណេញសម្រាប់បុគ្គលនេះ បុគ្គលនោះ ឬសម្រាប់គណបក្សប៉ុណ្ណោះ។ ជាការពិតណាស់របបមួយនេះដែលបម្រើឲ្យមនុស្សគ្រប់រូបទាំងនៅទីក្រុង និងជនបទ ទាំងក្មេង ទាំងបុរស ទាំងស្ត្រី ហើយវាជានិន្នាការដែលសកលលោកទាំងមូលកំពុងចាប់យក។
ដូច្នេះ ការបោះឆ្នោតគឺជាជម្រើសដ៏ល្អដើម្បីធានាឲ្យមានស្ថិរភាព ធានាឲ្យមានការផ្សះផ្សារបង្រួបបង្រួមជាតិធានាឲ្យកម្ពុជាអាចបន្ត ឬក៏មាននិរន្តរភាពតទៅទៀត”៕
ចំនួនអ្នកទស្សនា
- ថ្ងៃនេះ2861
- ម្សិលមិញ4001
- សប្តាហ៍នេះ20451
- ខែនេះ215051
- ឆ្នាំនេះ215051
- សរុប20657507