បោះឆ្នោតជ្រើសរើសរើសក្រុមប្រឹក្សាឃុំ សង្កាត់ ឆ្នាំ២០១៧ ចំថ្ងៃអាទិត្យទី៤ មិថុនា
24-May-2016 | ដោយ មែន កំសត់
ភ្នំពេញ៖រាជរដ្ឋាភិបាល ចេញសេចក្តីសម្រេចកំណត់យកថ្ងៃអាទិត្យទី០៤ ខែមិថុនាឆ្នាំ២០១៧ជាកាលបរិច្ចេទនៃការបោះឆ្នោតជ្រើសរើសរើស ក្រុមប្រឹក្សាឃុំ សង្កាត់ អាណត្តិទី៤ ឆ្នាំ២០១៧បន្ទាប់ពីរាជរដ្ឋាភិបាលបង្ហាញកាលបរិច្ឆេទបោះឆ្នោតជ្រើសរើសក្រុមប្រឹក្សាឃុំ-សង្កាត់ មន្ត្រីជាន់ខ្ពស់រាជរដ្ឋាភិបាល ក៏ដូចជាមេបក្សប្រឆាំងនៅកម្ពុជា ដែលកំពុងគេចខ្លួននៅក្រៅប្រទេស លោក សម រង្ស៊ី បានទទូចដូចគ្នាឲ្យប្រជាពលរដ្ឋខ្មែរត្រៀមលក្ខណៈសម្បត្តិ ទៅចូលរួមបោះឆ្នោតជ្រើសរើសមេដឹកនាំនៅក្នុងមូលដ្ឋាន ដែលខ្លួនស្រឡាញ់ពេញចិត្ត។
សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា នៅព្រឹកថ្ងៃទី២៤ ខែឧសភា ឆ្នាំ២០១៦នេះ បានប្រកាសឲ្យដឹងថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ នឹងធ្វើឡើងនៅថ្ងៃអាទិត្យ ទី០៤ ខែមិថុនា ឆ្នាំ២០១៧។ការកំណត់កាលបរិច្ឆេទសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់នេះ ក៏ត្រូវបានលោក សម រង្ស៊ី ប្រធានគណបក្សសង្គ្រោះជាតិ ចេញមកបង្ហាញនូវការយល់ស្រប ព្រមទាំងអំពាវនាវដល់ប្រជាពលរដ្ឋខ្មែរឲ្យត្រៀមលក្ខណៈសម្បត្តិចូលរួមបោះឆ្នោត។
លោក សម រង្ស៊ី បានសរសេរភ្លាមៗ នៅលើ Facebook របស់លោកថា «ប្រទេសកម្ពុជានឹងបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ នៅថ្ងៃអាទិត្យទី៤ ខែមិថុនា ឆ្នាំ២០១៧។ សូមបងប្អូនកូនក្មួយត្រៀមខ្លួនចាប់ពីពេលនេះ»។ លោក សម រង្ស៊ី ក៏បានរំលឹកឲ្យ ប្រជាពលរដ្ឋ នាំគ្នាទៅចុះឈ្មោះបោះឆ្នោត និងត្រូវមានអត្តសញ្ញាណបណ្ណសញ្ជាតិខ្មែរ ដើម្បីចូលរួមការបោះឆ្នោតនេះបាន។
ឯកឧត្តម ផៃ ស៊ីផាន រដ្ឋលេខាធិការទីស្តីការគណៈរដ្ឋមន្ត្រី និងជាអ្នកនាំពាក្យ ក៏បានទទូចឲ្យប្រជាពលរដ្ឋខ្មែរនាំគ្នាទៅចុះឈ្មោះបោះឆ្នោត និងត្រៀមលក្ខណៈសម្បត្តិឲ្យបានគ្រប់គ្រាន់ទៅបោះឆ្នោត ជ្រើសក្រុមប្រឹក្សាឃុំ សង្កាត់ ដែលនឹងធ្វើឡើងដូចកាលបរិច្ឆេទរាជរដ្ឋាភិបាលកំណត់។ ព្រោះរាជរដ្ឋាភិបាលបានជ្រើសរើសយកថ្ងៃទី០៤ ខែមិថុនា ឆ្នាំ២០១៧ខាងមុខ ជាពេលវេលាសមរម្យសម្រាប់បងប្អូន ប្រជាពលរដ្ឋ ទៅចូលរួមបោះឆ្នោត ក្រុមប្រឹក្សាឃុំ-សង្កាត់។ ការបោះឆ្នោតនេះជាការជ្រើសរើសមេដឹកនាំក្នុងមូលដ្ឋានរបស់ខ្លួនយើងផ្ទាល់តែម្តង។
បន្ថែមពីលើការអំពាវនាវឲ្យប្រជាពលរដ្ឋទៅបោះឆ្នោត ឯកឧត្តម ផៃ ស៊ីផាន ក៏បានជំរុញឲ្យប្រជាពលរដ្ឋជ្រើសរើសនូវមេដឹកនាំ ដែលបានបម្រើ ប្រយោជន៍ជូនប្រជាពលរដ្ឋ នៅផ្ទាល់ជាមួយបងប្អូន ជាពិសេសមេដឹកនាំរស់នៅរួមសុខ រួមទុក្ខជាមួយប្រជាពលរដ្ឋជាប់ជានិច្ច៕
ចំនួនអ្នកទស្សនា
- ថ្ងៃនេះ3211
- ម្សិលមិញ4471
- សប្តាហ៍នេះ3211
- ខែនេះ228881
- ឆ្នាំនេះ228881
- សរុប20671337