នគរបាលចាប់ផ្តើមធ្វើកោសល្យវិច័្ចយស្នាមមេដៃប្រជាពលរដ្ឋជាង១៧ម៉ឺននាក់
06-June-2016 | ដោយ មែន កំសត់
ភ្នំពេញ ៖ នៅទីបំផុតការធ្វើកោសល្យវិច័្ចយលើស្នាមមេដៃរបស់ប្រជាពលរដ្ឋជាង១៧ ម៉ឺននាក់ដែលគណបក្សសង្គ្រោះជាតិបានដាក់ថ្វាយព្រះមហាក្សត្រគឺ បានចាប់ផ្តើមហើយ បន្ទាប់ពីការបង្កើតគណៈកម្មការស្រាវជ្រាវនិងធ្វើកោសល្យវិច័យលើស្នាម មេដៃប្រជាពលរដ្ឋនៅលើញត្តិរបស់គណបក្សសង្គ្រោះជាតិកាលពីថ្ងៃទី២ ខែមិថុនា ឆ្នាំ២០១៦ កន្លងមកនេះ។
នៅព្រឹកថ្ងៃទី៦ ខែមិថុនា ឆ្នាំ២០១៦នេះ គណៈកម្មការស្រាវជ្រាវនិងធ្វើកោសល្យវិច័យលើស្នាមមេដៃប្រជាពលរដ្ឋ នៅលើញត្តិរបស់គណបក្សសង្គ្រោះជាតិ បានបើកកិច្ចប្រជុំដំបូងរបស់ខ្លួនដើម្បីចាត់តាំងភារកិច្ចឲ្យអនុវត្ត ទៅតាមជំនាញនីមួយៗក្រោមអធិបតីភាពលោកនាយឧត្តមសេនីយ៍នេត សាវឿន អគ្គស្នងការនគរបាលជាតិនិងជាប្រធានគណៈកម្មការស្រាវជ្រាវនិងធ្វើ កោសល្យវិច័យលើស្នាមមេដៃប្រជាពលរដ្ឋនៅលើញត្តិរបស់គណបក្សសង្គ្រោះ ជាតិ នៅនាយកដ្ឋានកណ្តាលនគរបាលយុត្តិធម៌នៃក្រសួងមហាផ្ទៃ។
លោកនាយឧត្តមសេនីយ៍បានបញ្ជាក់ថាយោងតាមសេចក្តីសម្រេចរបស់ ក្រសួងមហាផ្ទៃបេសកកម្មធ្វើកោសល្យវិច័យលើស្នាមមេដៃប្រជាពលរដ្ឋនៅលើ ញត្តិរបស់គណបក្សសង្គ្រោះជាតិត្រូវធ្វើក្នុងរយៈពេលរង្វង់៣០ថ្ងៃ ហើយក្រុមរបស់លោកនឹងខិតខំប្រឹងប្រែងធ្វើរឿងនេះឲ្យបានទាន់ពេលវេលា និងមានប្រសិទ្ធភាព។
ឆ្លើយទៅនឹងសំណួរសួរថាយើងនឹងដាក់ ទោសទណ្ឌយ៉ាងណាប្រសិនបើរកឃើញថា ស្នាមមេដៃនិងញត្តិទាំងនោះមិនប្រក្រតី លោកនាយឧត្តមសេនីយ៍ កង សុខន អគ្គស្នងការរងនគរបាលជាតិ និងជាអនុប្រធានគណៈកម្មការស្រាវជ្រាវនិងធ្វើកោសល្យវិច័យនេះបាន មានប្រសាសន៍ថា មិនទាន់មានគោលការណ៍ដូច្នេះនៅឡើយនោះទេ យើងគ្រាន់តែពិនិត្យទៅលើស្នាមមេដៃរបស់ប្រជាពលរដ្ឋ និយាយសរុបមកយើងធ្វើត្រឹមកិច្ចការពិនិត្យតែប៉ុណ្ណោះ៕
ចំនួនអ្នកទស្សនា
- ថ្ងៃនេះ3191
- ម្សិលមិញ3511
- សប្តាហ៍នេះ15841
- ខែនេះ241511
- ឆ្នាំនេះ241511
- សរុប20683967