ប្តឹងមេប៉េអឹមរងខេត្តកំពង់ស្ពឺទៅនាយឧត្តមសេនីយ៍ សៅ សុខា រឿងស៊ីដាច់រថយន្តពីរគ្រឿង
20-June-2016 | ដោយ មែន កំសត់
ភ្នំពេញ៖មេបញ្ជាការរងកងរាជអាវុធហត្ថ ខេត្តកំពង់ស្ពឺម្នាក់ និងត្រូវជាកូនរបស់មេបញ្ជាការកងរាជអាវុធហត្ថខេត្តព្រៃវែង ស៊ីដាច់រថយន្តរបស់គេចំនួនពីរគ្រឿង និងបានគេចខ្លួនបាត់ រហូតមិនព្រមចូលខ្លួនមកដោះស្រាយ។ ដោយសារតែគ្មានជម្រើស ម្ចាស់រថយន្តបានដាក់ពាក្យប្តឹងមេបញ្ជាការរងរូបនោះ ទៅលោកនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ឲ្យជួយរកយុត្តិធម៌។
មន្ត្រីជាន់ខ្ពស់កងរាជអាវុធហត្ថលើផ្ទៃប្រទេសបានឲ្យដឹងថា មេបញ្ជាការរងកងរាជអាវុធហត្ថខេត្តកំពង់ស្ពឺ ដែលគេប្តឹងពីបទឆបោក (យករថយន្តរបស់គេ) គឺមានឈ្មោះ សៅ ពន្លឺ ហើយរថយន្តចំនួនដែលឈ្មោះ សៅ ពន្លឺ យកទៅនោះ គឺម៉ាកឡុចស៊ីស និងរថយន្តកាម៉ារី។ ហើយពាក្យបណ្តឹង គឺម្ចាស់រថយន្តបានប្តឹងទៅលោកនាយឧត្តមសេនីយ៍ សៅ សុខា ជួយរកយុត្តិធម៌ កាលសប្តាហ៍មុន។
នៅក្នុងពាក្យបណ្តឹង របស់ប្រជាពលរដ្ឋរងគ្រោះបានរៀបរាប់ប្រាប់លោកនាយឧត្តមសេនីយ៍ សៅ សុខា ថា កាលពីថ្ងៃទី២៨ ខែឧសភា ឆ្នាំ២០១៦ លោកសៅ ពន្លឺ បានយករថយន្តរបស់គាត់ ម៉ាកឡុចស៊ីស ពាក់ស្លាកលេខភ្នំពេញ 2G-3188 ពណ៌ទឹកមាស ផលិតនឆ្នាំ១៩៩៧ ដោយសន្យាថា យកទៅមួយម៉ោងនងយកមកប្រគល់ឲ្យវិញ ប៉ុន្តែពីការសន្យាគឺលោកសៅ ពន្លឺ មិនបានធ្វើដូចសន្យារបស់គាតើឡើយ ហើយបាត់ដំណឹងមិនអាចទំនាក់ទំនងបាន។
ចំណែកប្រជាពលរដ្ឋ រងគ្រោះម្នាក់ទៀត បានរៀបរាប់ជូនលោកនាយឧត្តមសេនីយ៍ សៅ សុខា ថា រថយន្តដែលលោកសៅ ពន្លឺ យកនោះ ម៉ាកកាម៉ារី សេរី៩១ ចង្កូតស្តាំ ពាក់ស្លាកលេខភ្នំពេញ 2F-0806។
ជាមួយគ្នានេះ ជនរងគ្រោះបានសុំឲ្យលោកនាយឧត្តមសេនីយ៍ សៅ សុខា ជួយអន្តរាគមន៍ និងរកយុត្តិធម៌ឲ្យ។
ទាក់ទងករណីនេះ លោកនាយឧត្តមសេនីយ៍ សៅ សុខា មិនសុំការអត្ថាធិប្បាយបានទេ ដោយទូរស័ព្ទមិនទំនាក់ទំនងបាន។ រីឯលោកជូ សារុន មេបញ្ជាការកងរាជអាវុធហត្ថខេត្តកំពង់ស្ពឺ មិនធ្វើអត្ថាធិប្បាយដែរ ដោយថា ជាប់រវល់៕
ចំនួនអ្នកទស្សនា
- ថ្ងៃនេះ971
- ម្សិលមិញ4911
- សប្តាហ៍នេះ18541
- ខែនេះ971
- ឆ្នាំនេះ244211
- សរុប20686667