ជុំវិញសំណុំរឿងមន្ត្រីចរាចរណ៍ផាកពិន័យមិនព្រមចេញវិក្កយបត្រនៃ ស្នងការដ្ឋានខេត្តបាត់ដំបង
22-June-2016 | ដោយ មែន កំសត់
ខេត្តបាត់ដំបង ៖ ជុំវិញសំណុំរឿងមន្ត្រីចរាចរណ៍ផាកពិន័យមិនព្រមចេញវិក្កយបត្រ បង់ប្រាក់ឲ្យម្ចាស់យានយន្ត លោក សាត គីមសាន្ត ប្រធានការិយាល័យចរាចរណ៍ជើងគោកនៃ ស្នងការដ្ឋានខេត្តបានបំភ្លឺប្រាប់ថា មន្ត្រីរបស់លោកមិនបានទទួលយកប្រាក់ចំនួន២ម៉ឺនរៀលពីនារី២នាក់ ដែលបង់ថ្លៃការផាកពិន័យក្នុងបទលហុ «មិនពាក់មួកសុវត្ថិភាព» នោះទេ តែនារីនោះបានបោះប្រាក់ទៅលើតុរួចចាកចេញទៅបាត់ រីឯប្រាក់២ម៉ឺនរៀលនោះក៏ហើរតាមខ្យល់បាត់ភ្លាមៗដែរ។ លោក សាត គីមសាន្ត ប្រធានការិយាល័យចរាចរណ៍ខេត្តបំភ្លឺបែបនេះ ខណៈដែលសំណុំរឿងដ៏រសើប និងតូចតាចមួយនេះ បានរងនូវការរិះគន់យ៉ាងខ្លាំងពីមហាជនក៏ដូចជាមន្ត្រីមួយចំនួន នៅក្នុងខេត្ត ហើយក៏ចំពេលដែលមន្ត្រីសវនកម្មផ្ទៃក្នុងរបស់អគ្គស្នងការនគរបាលជាតិ កំពុងចុះស្រាវជ្រាវ និងពិនិត្យលើភាពមិនប្រក្រតីនានានៅក្នុងអង្គភាពចរាចរណ៍មួយនេះដែរ។
លោក សាត គីមសាន្ត បានថ្លែងថា នារីវ័យក្មេង២នាក់នោះត្រូវមន្ត្រីចរាចរណ៍ប្រចាំគោលដៅខាងត្បូង រង្វង់មូលព្រះនារាយណ៍ ឃាត់ផាកពិន័យដោយសារតែជិះម៉ូតូមិនពាក់មួកសុវត្ថិភាព។
លោកថា បើតាមផ្លូវច្បាប់នារីទាំង២នាក់ត្រូវផាកពិន័យម្នាក់១៥០០០រៀល តែពួកគេទាំង២នាក់សុំបង់ត្រឹម២ម៉ឺនរៀល ហើយមិនយកវិក្កយបត្របង់ប្រាក់ទេ។ ក្រោយពីតថ្លៃរួចនារី២នាក់នោះបានបោះប្រាក់២ម៉ឺនរៀលទៅលើតុ រួចនាំគ្នាដើរចេញទៅយកម៉ូតូជិះបាត់ទៅ ហើយប្រាក់នោះក៏ហើរតាមខ្យល់បាត់ទៅដែរ។
ការបកស្រាយរបស់លោក សាត គីមសាន្ត ប្រធានការិយាល័យចរាចរណ៍នេះ ហាក់មិនមានហេតុផលច្បាស់លាស់ ដែលអាចធ្វើឲ្យមហាជនទូទៅមានការជឿជាក់ឡើយ។ ផ្ទុយទៅវិញរឹតតែធ្វើឲ្យមានចម្ងល់ និងសំនួរជាច្រើនចោទសួរទៅកាន់លោក។
នៅពេលសួរថា តាមគោលដៅនីមួយៗរបស់មន្ត្រីចរាចរណ៍ សុទ្ធតែមានប្រធានក្រុមដឹកនាំទទួលខុសត្រូវ ក្នុងការអនុវត្តច្បាប់យ៉ាងតឹងរ៉ឹង និងមានការប្រយ័ត្នប្រយែងបំផុត ចុះហេតុអ្វីបានជាមន្ត្រីអ្នកសរសេវិក្កយបត្រមិនព្រមរាយការណ៍ ប្រាប់ប្រធានក្រុមរបស់ខ្លួននៅពេលនារី២នាក់នោះបោះប្រាក់២ម៉ឺន រៀលលើតុបែបមាក់ងាយ សមត្ថកិច្ច ហើយចាកចេញ និងមិនព្រមយកវិក្កយបត្រទៀត? ត្រង់ចំណុចនេះ លោក សាត គីមសាន្ត ហាក់បានទទួលស្គាល់នូវកំហុសរបស់មន្ត្រីលោក។
លោកនិយាយថា នេះជាកំហុសដែលមន្ត្រីរបស់លោកមិនបានរាយការណ៍ទៅប្រធានក្រុម របស់ខ្លួនពេលដែលមានរឿងនេះកើតឡើង។ ដូច្នេះហើយទើបមានការចោទប្រកាន់ថា មន្ត្រីរបស់លោកផាកពិន័យហើយមិនចេញវិក្កយបត្របង់ប្រាក់ដល់ម្ចាស់ យានយន្តដែលបំពានច្បាប់ ប៉ុន្តែបញ្ហានេះលោកនៅតែបន្តធ្វើការស្រាវជ្រាវនៅឡើយទេ ដើម្បីរកឲ្យឃើញការពិត។
គួររំលឹកថា កាលពីល្ងាចថ្ងៃទី៣១ ឧសភាកន្លងទៅ មន្ត្រីចរាចរណ៍ប្រចាំគោលដៅខាងត្បូងរង្វង់មូលព្រះនារាយណ៍ ក្នុងសង្កាត់ស្វាយប៉ោ ក្រុងបាត់ដំបង បានឃាត់នារី២នាក់ ដែលជិះម៉ូតូមិនពាក់មួកសុវត្ថិភាព ដើម្បីផាកពិន័យតាមផ្លូវច្បាប់។ ប៉ុន្តែមន្ត្រីចរាចរណ៍ មិនបានផាកពិន័យ ឬចេញវិក្កយបត្របង់ប្រាក់ទៅតាមផ្លូវច្បាប់ឲ្យទៅ នារី២នាក់នោះទេ បែរជាទារប្រាក់២ម៉ឺនរៀល ហើយប្រាប់នារី២នាក់នោះថា «មិនបាច់យកវិក្កយបត្រទេ ព្រោះដល់ម៉ោងសម្រាកហើយ»។ លុះនារី២នាក់នោះជិះម៉ូតូចេញទៅដល់ខាងមុខយោធភូមិភាគទី៥ ក៏ត្រូវមន្ត្រីចរាចរណ៍ប្រចាំគោលដៅនៅទីនោះចាប់ផាកពិន័យពួកនាងអស់៣ ម៉ឺនរៀលមួយតង់ទៀត ទើបបែកធ្លាយនៅរឿងអាស្រូវនេះតែម្ដងទៅ។
នៅក្នុងក្លិបវីដេអូមួយដែលចែកចាយតាមបណ្តាញសង្គមបានបង្ហាញថា នារីវ័យក្មេងទាំង២នាក់បានរៀបរាប់ប្រាប់មន្ត្រីចរាចរណ៍គោលដៅទី២ ថា ពួកនាងត្រូវមន្ត្រីចរាចរណ៍ប្រចាំគោលដៅខាងត្បូងរង្វង់មូលព្រះ នារាយណ៍ចាប់ផាកពិន័យម្ដងហើយ តែមន្ត្រីនោះមិនចេញវិក្កយបត្រឲ្យទេ ដោយទារប្រាក់ពីនាងតែ២ម៉ឺនរៀលប៉ុណ្ណោះ។ មន្ត្រីនោះបានប្រាប់នាងថា ថ្ងៃល្ងាច និងដល់ម៉ោងសម្រាកហើយ អ៊ីចឹងបង់តែ២ម៉ឺនរៀលមក មិនបាច់យកវិក្កយបត្រទេ ហើយនាងក៏មិនបានទាមទារដែរ។ ប៉ុន្តែពេលនាងសួរថា ចុះបើអត់មានវិក្កយបត្រ ពេលនាងជិះចេញទៅគេផាកទៀតគិតយ៉ាងម៉េច ? មន្ត្រីនោះឆ្លើយថា អត់មានទេ គឺដល់ម៉ោងសម្រាកអស់ហើយ។ លុះពួកនាងជិះដល់ខាងមុខយោធភូមិភាគទី៥ ស្រាប់តែត្រូវមន្ត្រីចរារចណ៍ចាប់ផាកអស់៣ម៉ឺនរៀលទៀត តែក្រុមនេះបានចេញវិក្កយបត្រផាកពិន័យត្រឹមត្រូវ។
សូមបញ្ជាក់ដែរថា ការិយាល័យចរាចរណ៍ជើងគោកខេត្តបាត់ដំបង បានបែងចែកកម្លាំងជាច្រើនគោលដៅក្នុងការចុះអនុវត្តច្បាប់ក៏ដូចជា ការចុះរឹតបន្ដឹងច្បាប់ចរាចរណ៍ជើងគោក។ ការចុះអនុវត្តច្បាប់នេះ បើតាមមន្ត្រីចរាចរណ៍បានប្រាប់ថា ក្រសួងមហាផ្ទៃ មិនអនុញ្ញាតឲ្យមន្ត្រីជំនាញធ្វើការផាកពិន័យលើយានយន្ត ឬអ្នកដំណើរដែលមិនគោរពច្បាប់នៅនឹងកន្លែងគោលដៅទេ គឺតម្រូវឲ្យមន្ត្រីជំនាញចេញវិក្កបត្រផាកពិន័យឲ្យទៅម្ចាស់ យានយន្ត ឬ ពលរដ្ឋដែលប្រព្រឹត្តខុសកាន់វិក្កយបត្រនោះទៅបង់ប្រាក់ផាកពិន័យដោយ ខ្លួនឯងនៅការិយាល័យចរាចរណ៍។
ប៉ុន្តែផ្ទុយទៅវិញនៅតែមានមន្ត្រីខិលខូចមួយចំនួនលួចបន្លំ ទារប្រាក់ផាកពិន័យក្រៅផ្លូវច្បាប់ដដែល។ លុះមានការបែកធ្លាយនូវរឿងពុករលួយនេះ បែរជាគេចវេះមិនទទួលខុសត្រូវ ហើយព្យាយាមទម្លាក់កំហុសនេះទៅលើពលរដ្ឋទៅវិញ។ ដូចជាករណីខាងលើនេះជាដើម គឺខុសតែប្រជាពលរដ្ឋ រីឯមន្ត្រីខិលខូចនៅតែអាចរួចខ្លួនរហូត។
ទាក់ទិននឹងរឿងអាស្រូវនៅក្នុងការិយាល័យចរាចរណ៍ជើងគោកនៃស្នងការដ្ឋាន ខេត្តនេះដែរ បើតាមប្រភពពីមន្ត្រីចរាចរណ៍បានឲ្យដឹងថា មន្ត្រីសវនកម្មផ្ទៃក្នុងរបស់អគ្គស្នងការនគរបាលជាតិមួយក្រុមកំពុង ចុះស្រាវជ្រាវ និងពិនិត្យលើឯកសារមួយចំនួននៅក្នុងការិយាល័យនេះ ដែលគេសង្ស័យថា មានភាពមិនប្រក្រតី។
ចំនួនអ្នកទស្សនា
- ថ្ងៃនេះ2311
- ម្សិលមិញ4911
- សប្តាហ៍នេះ19881
- ខែនេះ2311
- ឆ្នាំនេះ245551
- សរុប20688007