សម្ដេចតេជោរងនូវការផាកពិន័យដោយនគរបាលចរាចរណ៍បើកបរមិនពាក់មួកសុវត្ថិភាព
22-June-2016 | ដោយ មែន កំសត់
មន្រ្តីជាន់ខ្ពស់ខុទ្ទកាល័យសម្តេចតេជោ ហ៊ុន សែន បានថ្លែងប្រាប់នៅមុននេះបន្តិចថា នៅថ្ងៃទី២៤ ខែមិថុនា ឆ្នាំ២០១៦ខាងមុខនេះ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា នឹងអញ្ជើញទៅកាន់ប៉ុស្តិ៍នគរបាលចតុមុខ វេលាម៉ោង៩ព្រឹក ដើម្បីបង់ការផាកពិន័យចំពោះកំហុសជិះម៉ូតូ មិនបានពាក់មួកសុវត្ថិភាព នៅស្រុកស្រែអំបិល ខេត្តកោះកុង កាលពីសប្តាហ៍មុន។
សម្ដេចតេជោបានសរសេរក្នុងហ្វេសបុកសម្ដេចថា៖ខ្ញុំបានដឹងជាមុនហើយថា បើទោះបីខ្ញុំសុំអភ័យទោសជាសាធារណៈហើយក៏ដោយ ក៏នគរបាលនៅតែផាកពិន័យខ្ញុំដដែល ព្រោះខ្ញុំបានសាងនូវកំហុសរួចស្រេចទៅហើយ។ ម្យ៉ាងទៀត អភ័យឯកសិទ្ធិសភាដែលចែងក្នុងរដ្ឋធម្មនុញ្ញ និងច្បាប់ផ្សេងទៀតគ្មានមាត្រាណាមួយផ្តល់សិទ្ធិឱ្យសមាជិកសភា ឬនាយករដ្ឋមន្ត្រីរួចផុតពីការផាកពិន័យដោយនគរបាលចរាចរណ៍នោះដែរ នៅពេលដែលយើងបំពានច្បាប់ទាំងមិនពាក់មួកសុវត្ថិភាព និងទាំងទោចក្រយានយន្តគ្មានផ្លាកលេខ។
ខ្ញុំទទួលបង់ពិន័យសំរាប់ខ្លួនឯងផង និងសំរាប់ប្អូនម្ចាស់ម៉ូតូផង បើទោះបីជាម៉ូតូអត់ផ្លាកលេខជាកំហុសរបស់ម្ចាស់ម៉ូតូក៏ដោយ ដើម្បីសម្រាលនូវការលំបាករបស់គាត់ និងទុកលទ្ធភាពឱ្យគាត់ទៅធ្វើផ្លាកលេខ។
ខ្ញុំសូមកោតសរសើរដល់នគរបាលស្រុកស្រែអំបិលខេត្តកោះកុង ដែលអនុវត្តន៍ច្បាប់ដោយគ្មានការរើសអើង និងមិនខ្លាចអំណាចអ្នកធំរាប់ទាំងនាយករដ្ឋមន្ត្រីផង។
ខ្ញុំសូមអំពាវនាវដល់អ្នកគាំទ្រខ្ញុំទាំងអស់កុំថ្នាំងថ្នាក់ជាមួយនគរបាលដែលផាកពិន័យខ្ញុំតែផ្ទុយទៅវិញត្រូវលើកទឹកចិត្ត និងយកធ្វើជាគំរូនៃការអនុវត្តន៌ច្បាប់៕
ចំនួនអ្នកទស្សនា
- ថ្ងៃនេះ1981
- ម្សិលមិញ4911
- សប្តាហ៍នេះ19551
- ខែនេះ1981
- ឆ្នាំនេះ245221
- សរុប20687677