រថយន្តមួយគ្រឿងដឹកអ្នកដំណើរបានបង្កប់ឈើប្រណីតបន្ទាប់ពីចាប់ត្រូវបានដោះលែងវិញក្រោយពីមានការទូទាត់ប្រាក់
23-June-2016 | ដោយ មែន កំសត់
ស្ទឹងត្រែង៖រថយន្តមួយគ្រឿងដឹកអ្នកដំណើរបានបង្កប់ឈើប្រណីតត្រូវ កម្លាំងនគរបាលប្រឆាំងបទល្មើសសេដ្ឋកិច្ចស្នងការដ្ឋាននគរបាល ខេត្តស្ទឹងត្រែងចាប់បាននៅក្រុងស្ទឹងត្រែងកាលពីថ្ងៃទី២១ ខែមិថុនា ឆ្នាំ២០១៦ មិនទាន់បានកសាងសំណុំរឿងបញ្ជូនទៅជំនាញ នៅឡើយទេ។ ប៉ុន្តែមកទល់នឹងថ្ងៃទី២២មិថុនានេះ ស្រាប់តែមានលេចឮដំណឹងថាមានអ្នករត់ការទៅសមត្ថកិច្ចពាក់ព័ន្ធ ក្នុងខេត្តស្ទឹងត្រែងដើម្បីធ្វើការដោះលែងដោយស្ងាត់ៗ។
ប្រភពព័ត៌មានពីមន្ត្រីនគរបាលខេត្តបានឱ្យដឹងថាកាលពីយប់ថ្ងៃទី២១ ខែមិថុនា មានរថយន្តសាំងយ៉ុងពណ៌សមួយគ្រឿង ពាក់ស្លាកលេខភ្នំពេញ2AJ8234 លួចដឹកឈើប្រណីតចេញពីក្នុងសិប្បកម្មមួយកន្លែងនៅក្រុងស្ទឹងត្រែង។ ពេលរថយន្តនោះ កំពុងបើកលើផ្លូវជាតិលេខ៧A ចេញពីក្រុងស្ទឹងត្រែងបម្រុងឆ្ពោះទៅកាន់ខេត្តក្រចេះក៏ត្រូវសមត្ថកិច្ច នគរបាលប្រឆាំងបទល្មើស សេដ្ឋកិច្ចខេត្តស្ទឹងត្រែងចាប់បាន។
បន្ទាប់ពី រថយន្តដឹកឈើនោះស្ថិតនៅក្នុងស្នងការដ្ឋាននគរបាលខេត្តស្ទឹងត្រែងនៅឡើយ ក៍ស្រាប់តែមានលេចឮដំណឹងមកថារថយន្តដឹកឈើនោះកំពុងតែមានអ្នករត់ ការស្នើសុំឱ្យដោះលែងស្ងាត់ៗជាថ្នូរនឹងទឹកប្រាក់មួយចំនួនធំ។ អ្នករត់ការដោះលែងនោះគឺមានឋានៈ ជាអភិបាលរងខេត្តម្នាក់។ ប៉ុន្តែនៅល្ងាចថ្ងៃទី២២ខែមិថុនាឆ្នាំ២០១៦មន្ត្រីនគរបាលខេត្ត បានឱ្យដឹងថារថយន្តដឹកឈើនោះស្ថិតនៅក្នុង ស្នងការដ្ឋាននគរបាលខេត្តស្ទឹងត្រែងនៅឡើយទេ។ មន្ត្រីដដែលបានបង្ហើបឱ្យដឹងថាពាក់ព័ន្ធសំណុំរឿងបទល្មើសបង្ក្រាប រថយន្តដឹកឈើមួយគ្រឿងកំពុងរង់ចាំបទបញ្ជាពីលោកព្រះរាជអាជ្ញា ខេត្តស្ទឹងត្រែង។បើសិនជាមានបទបញ្ជាណាមួយនោះខាងនគរបាលនឹងបន្ត ទៅតាមនីតិវិធីច្បាប់។
សូមបញ្ជាក់ថាខេត្តស្ទឹងត្រែងគឺជា កន្លែងបង្កើតរោងអារកែច្នៃឈើប្រណីតមានលក្ខណៈទ្រង់ទ្រាយធំដោយមាន ច្បាប់ត្រឹមត្រូវពីអាជ្ញាធរនិងខណ្ឌរដ្ឋបាលព្រៃឈើ។ ប៉ុន្តែសិប្បកម្មកែច្នៃឈើនោះគឺជាកន្លែងស្តុកឈើនិងដឹកជញ្ជូនឈើ យ៉ាងអាណាធិបតេយ្យបំផុត ហើយក៍ជាឆ្នាំងបាយរបស់អាជ្ញាធរខេត្តស្ទឹងត្រែងផងដែរហេតុដូចនេះទើប មិនសូវមានអ្នកចុះបង្ក្រាប៕
ចំនួនអ្នកទស្សនា
- ថ្ងៃនេះ1931
- ម្សិលមិញ4911
- សប្តាហ៍នេះ19501
- ខែនេះ1931
- ឆ្នាំនេះ245171
- សរុប20687627